Bezati: Fitoi drejtësia mbi provokatorët antishqiptarë

Kastriot Bezati, ka qenë drejtor i Qëndrës së Kulturës në Bashkinë e Përmetit. Është e njohur nga media qëndresa e tij e vendosur për të mbrojtur Pallatin e Kulturës së Përmetit nga kisha shoviniste greke dhe kryepeshkopi i saj Janullatos. Puna e tij gjithnjë ka treguar atdhedashuri dhe mirëkuptim me Komunitetin Orthodoks të Shqipërisë. Në këtë intervistë për gazetën ‘DITA” ai flet nga Përmeti dhe shprehet i entuziazmuar nga fakti që më në fund drejtësia fitoi për pallatin e Kulturës të Përmetit, të uzurpuar në mënyrë të dhunshme prej rreth 15 vjetësh nga Kisha Ortodokse.

– Zoti Bezati, si ndiheni tashmë që fund odisea e historisë së Pallatit të Kulturës në Përmet?

– Unë ndihem shumë i kënaqur që më në fund u vendos drejtësia për një çështje që u bë tërkuzë për 15 vjet me radhë. Pavarësisht ndërhyrjeve të jashtëzakonshme që u bënë, ku u përzien edhe politika dhe kisha ortodokse, më në fund mund të themi me plot gojën se në këtë vend po fillon të funksionojë drejtësia. Tashmë gjithë komuniteti i Përmetit ndihet krenar se iu rikthye një vlerë e patjetërsueshme, Pallati i Kulturës që mban emrin e poetit të shenjtë kombëtar, Naim Frashërit.

– Si dhe pse nisi ky konflikt?

– Ky konflikt nisi më 25 shtator të vitit 1997 midis qendrës kulturore të Bashkisë së Përmetit dhe Kishës Ortodokse. Gjykimi kaloi në të gjitha nivelet e gjykatave deri më 5 maj 2004 dhe në të gjitha nivelet u vendos në favor të Pallatit të kulturës. Gjykimi u bë mbi bazën e dokumenteve autentike arkivore të Arkivit qendror të Tiranës si dhe të akteve të ekspertizës të specialistëve të pranuar nga të dyja palët. E vërteta e pranuar nga të gjithë është se Pallati i Kulturës u ngrit tërësisht nga shteti dhe nga e gjithë sipërfaqja e truallit prej 584 metrash katrore vetëm 25 metra katrore i takonin truallit të Kishës së Përmetit.

– Cili ka qenë qëndrimi i shtetit në këtë konflikt?

– Duhet thënë se në gjithë këtë histori qëndrimi i shtetit ka qenë i papërfillshëm, ndaj dhe historia zgjati për 16 vjet me radhë. Merre me mend, janë zhvilluar mbi 100 seanca gjyqësore, në të gjitha nivelet deri në Gjykatën Kushtetuese dhe të gjitha pa përjashtim kanë qenë në favor të Pallatit të Kulturës. Moszbatimi i vendimit të gjykatave është tërësisht përgjegjësi e shtetit, i cili ishte gjunjëzuar para presioneve të Kishës Ortodokse dhe personalisht të kreut të saj Janullatos, si dhe të qarqeve të caktuara greke që kanë ndërhyrë brutalisht në punët tona.

– Domethënë, sipas jush ka qenë Kisha dhe Greqia që kanë penguar ekzekutimin e këtij vendimi?

– Po. Kjo është një histori e përplasjes mes përmbarimit dhe policisë së shtetit. Kur vinte njëri nuk vinte tjetri. Ndërsa ndërhyrja e Greqisë ka qenë mjaft e dukshme. Mjafton të përmendim këtu se për këtë çështje ka vizituar disa herë Përmetin konsulli grek në Gjirokastër. Nga ana tjetër unë kam akuzuar drejtpërdrejt Anastas Janullatosin për ndërhyrje dhe presion në këtë histori, një qëndrim tërësisht antishqiptar.

– Si e komentoni qëndrimin e Vangjel Dules dhe të Athinës zyrtare për këtë çështje?

– Ishte i pritshëm një qëndrim i tillë. Ne nuk prisnim që Athina dhe Vangjel Dulja të gëzoheshin që përmetarët rifituan pallatin e kulturës me emrin e Naim Frashërit. Sidoqoftë, si qëndrimi i Dules ashtu dhe ai i Athinës është sa naiv, aq dhe për të ardhur keq, kur mendon se ky përfaqëson një linjë zyrtare. Më në fund ata duhet ta kuptojnë se fitoi drejtësia e një vendi sovran mbi provokatorët antishqiptarë dhe askush nuk mund të luajë me ligjet e një shteti sovran dhe askush nuk del dot mbi ligjet. Të gjithë, pa përjashtim, përshi edhe Dulen e Janullatosin janë të detyruar të zbatojnë Kushtetutën dhe ligjet e këtij vendi. /Intervistoi: Xhevdet Shehu

***

Dule: Shteti t’i përmbahet marrëveshjes së 2009, t’i kthehet subjekti kishës në Përmet

Objekti ti rikthehet menjëherë Kishës në Përmet. Me këtë apel i është është adresuar qeverisë ende në detyrë, kreu i PBDNJ-së Vangjel Dule, ndërsa ka reaguar në lidhje me ndërhyrjen e përmbarimit në Përmet për të kthyer në identitet Pallatin e Kulturës së këtij qyteti, që prej gati 16 vjetësh ishte kthyer në Kishë Ortodokse. Në një prononcim për mediat, Dule thekson se ngjarja në Përmet të kujton luftën ndaj fesë dhe shndërrimin e vendeve të kultit në Pallat Kulture, fenomene të cilat kanë cënuar jo pak imazhin e vendit tonë.

“Shteti ynë ka precedentët më të errët gjatë dy shekujve të fundit në marrëdhëniet me komunitetet fetare. Ngjarja në Përmet të kujton luftën ndaj fesë dhe shndërrimin e vendeve të kultit në Pallat Kulture. Denoncojmë këto shkelje që kanë prekur çdo besimtar dhe qytetar të ndershëmtë vendit tonë. Askush nuk ka alibi për qëndrimet e veta si qeveria në ikje, ashtu edhe ajo në ardhje. Këto fenomene kanë cenuar imazhin e vendit tonë” deklaron ai.

Sipas Dules zgjidhja e vetme bazohet në marrëveshjet e shtetit me komunitetin ortodoks miratuar në vitin 2009, e cila mbështet Kishën sipas detyrimeve të vendit për rikthimin e besimit dhe pronave e objekteve fetare. Bazuar në këtë marrëveshje, Dule thekson se shteti duhet të reagojë dhe t’i rikthehet menjëherë objekti Kishës në Përmet.

Këto deklarata kreu i PBDNJ-së i bëri nga Gjirokastra, ndërsa një ditë më parë lidhur me ngjarjen reagoi edhe Ministria e Punëve të Jashtme të Greqisë, e cila shprehu shqetësimin e thellë për atë qe e quajti “incident i dhunshme në Kishën e Virgjëreshës Mari në Përmet.”

Zëdhënësi i Ministrisë së Jashtme Koutras theksoi se shpreson që këto veprime të jenë kryer pa qënë në dijeni qeveria shqiptare. Ai deklaroi se Ambasada greke dhe autoritetet konsullore janë duke e monitoruar nga afër këtë çështje.

Përmet, hiqet kryqi, flamur në Pallatin e Kulturës

Përplasje mes zyrës së Përmbarimit dhe komunitetit Ortodoks në Përmet. Në bazë të një vendimi të gjykatës zyra e Përmbarimit ka ekzekutuar pardje vendimin e Gjykatës Kushtetuese, si dhe ka dorëzuar pranë Bashkisë së Përmetit Pallatin e Kulturës, të zaptuar 16 vite më parë nga Kisha Orthodokse.

Por përmbaruesit kanë hasur në rezistencën e priftërinjve ortodoksë, si dhe besimtarëve që ndodheshin në kishë.

Përmbaruesit të mbështetur dhe nga policia private kanë ndërhyrë me forcë, duke larguar nga Pallati i Kulturës, ikona të Kishës, këmbana, si dhe materiale të tjera. Përmbaruesit kanë hequr kryqin nga godina e Pallatit të Kulturës dhe kanë vendosur atje flamurin shqiptar.

Kryetari i zyrës Përmbarimore, Fatos Alimadhi, deklaroi se përfaqësuesit e kishës kanë përdorur forcën dhe presione për të bllokuar punën.

“Përmbarimi thjesht ka ekzekutuar një vendim të formës së prerë të Gjykatës Kushtetuese, veprim që duhet të ishte zbatuar 10 vite më parë”,- tha Alimadhi.

Përfaqësuesit e Kishës ortodokse në Përmet pretendojnë pronësinë e truallit, ndërkohë që të gjitha shkallët e gjyqësorit kanë rrëzuar pretendimet e saj. Ambientet në Pallatin e Kulturës tashmë do t’i kalojnë Bashkisë së Përmetit.

Historia

Godina dykatëshe, dikur krenaria e përmetarëve, ka heshtur së funksionuari në vitin 1997. Prej 16 vitesh objekti në fjalë është bërë “mollë sherri” midis Bashkisë së Përmetit dhe Kishës Ortodokse. Të dyja palët kanë pretenduar pronësinë, por askush nuk i ka dalë zot.

Pallati i Kulturës u ndërtua 51 vjet më parë, në vitin 1962. Pas Luftës së Dytë Botërore, në truallin ky është ngritur Pallati i Kulturës dhe lulishtja e qytetit, jetonin në baraka 30 familje. Në vitin 1958 u shpërngulën, pasi sistemi komunist hartoi një plan rregullues.

Në nëntor të vitit 1962 u inaugurua lulishtja e qytetit së bashku me Pallatin e Kulturës. Gjykata Kushtetuese në vitin 2002 ka vendosur në favor të pushtetit vendor, por prej 11 vitesh ky objekt u mbajt forcërisht nga Kisha Ortodokse. Pallati i Kulturës funksionoi si objekt fetar prej 26 majit 1997, falë një vendimi të Komisionit të Pronave të rrethit të Përmetit. Pallati i Kulturës, me sipërfaqe rreth 6000 metra katror, figuron me nr. pasurie 16/9, ndërsa Zyra e Përmbarimit ka tentuar 15 herë të ekzekutojë vendimin e Gjykatës Kushtetuese, por fatkeqësisht janë penguar nga përfaqësuesit e Kishës.

Incidentet me Kishën në Përmet, reagon Athina zyrtare

Athina zyrtare reagon për incidentet e dhunshme që ndodhën në Përmet mes klerit të Kishës Ortodokse dhe përmbaruesve.

Zëdhënësi i Ministrisë së Jashtme greke, Konstantinos Kutras është shprehur në një deklaratë:

“Mësuam me shqetësim të thellë për incidentet e dhunshme që ndodhën sot në Kishën e Virgjëreshës Mari, në qytetin e Përmetit.

Largimi me dhunë i klerit, ndalimi i besimtarëve për të hyrë në vendin e adhurimit fetar ditën e Shën Mërisë, heqja e ikonave dhe objekteve të shenjta nga tempulli, janë akte të papranueshme dhe të dënueshme, pavarësisht nga çdo pretendim ligjor.

Respekti për lirinë fetare, mbrojtja e vendeve të adhurimit dhe ushtrimi pa pengesë i detyrave fetare janë në themel të një shteti ku sundon ligji dhe një element themelor i kulturës institucionale evropiane.

Prandaj ne shpresojmë se këto veprime janë kryer pa dijeninë e qeverisë shqiptare. Ambasada jonë dhe autoritetet konsullore në vend janë udhëzuar për të monitoruar nga afër këtë çështje”, përfundon deklarata.