Çfarë kërkoi Andon Mëhillaj në këmbim të dorëzimit

Vetëm pasi ka nxjerrë familjen jashtë Shqipërisë, duke e fshehur nga frika e një hakmarrjeje të mundshme, Andon (Erjon) Mëhillaj, i ka telefonuar mesditën e së mërkurës avokatit të tij, ku i ka kërkuar të negociojë për vetëdorëzimin. Pas disa orësh bisedimesh me një drejtues të lartë të policisë Vlorë dhe aktit të vetëdorëzimit të firmosur në bashkëpunim edhe me prokurorinë, rreth orës 09:30 të mëngjesit të djeshëm, i shoqëruar nga një miku i tij, 43-vjeçari ka hyrë në Prokurorinë e Vlorës. Për arsye që ende nuk dihen, Mëhillaj nuk preferoi të dorëzohej në komisariat, duke ndjekur një praktikë tjetër, që ndoshta e ka konsultuar edhe me avokatin. Prej aty, në masa të rrepta sigurie, i dyshuari si porositës dhe ndërmjetës i të paktën 5 atentateve me armë dhe bomba të telekomanduara, është përcjellë për në drejtorinë e Policisë Vlorë. I pranishëm në këto procedura, edhe avokati i tij Edmond Demaj, i cili do shoqëronte vetëdorëzimin me një deklaratë publike, sipas të cilës, mbi Mëhillajn ishin hedhur shumë akuza në media që nuk qëndronin, porse prokuroria nuk kishte asnjë akt-akuzë ndaj klientit të tij. Dhe sipas avokatit, Andoni ka qëndruar në Vlorë, nuk ishte arratisur, por ka rregulluar disa punë të tijat dhe siguruar familjen. Pasditen e djeshme, po në një operacion sekret, 43-vjeçari është sjellë në një operacion sekret në policinë e Tiranës, për llogari të Prokurorisë së Krimeve të Rënda.

 

Negociatat sekrete

Sipas avokatit Edmond Demaj, Andoni nuk ishte larguar asnjë ditë nga Shqipëria. Por ka qenë i fshehur në Vlorë, pa treguar vendin se ku dhe ka ndjekur të gjitha zhvillimet. Prej aty ka siguruar familjen e tij, gruan dhe fëmijët, duke i dërguar jashtë vendit. Edhe vendi se ku janë çuar mbahet sekret. Dhe bindjen se Andon Mëhillaj ishte në Vlorë, avokati e sqaron duke treguar se fliste herë pas here me klientin e tij në telefon. “Flisja shpesh në telefon. Nuk ka qenë jashtë vendit, por iu desh të rregullonte disa punë të tij dhe të siguronte familjen. Ato që thotë Julian Sinanaj dhe ato që kanë dalë në media nuk janë të vërteta për akuzat ndaj Mëhillajt”, tha Demaj. Dhe mesditën e së martës, Andoni i ka telefonuar, duke i thënë se do vetëdorëzohej për t’u përballur dhe sqaruar gjithçka. “Më tha të negocioja”, thotë avokati. Dhe bisedat mësohet se janë bërë fillimisht me policinë vendore, me drejtues të saj, ku është rënë dakort që Mëhillajt t’i njihej ky vetëdorëzim.

 

Vetëdorëzimi

Burime nga prokuroria thanë se është përgatitur edhe një procesverbal për vetëdorëzimin e Andon Mëhillajt pas negociatave dypalëshe. Ai ka qenë në kërkim ndërkombëtar prej disa ditësh, pasi Interpol Tirana publikoi fotografitë e kushërinjve, si dy nga më të kërkuarit e drejtësisë. Dhe rreth orës 09:30 u përhap lajmi se Andon Mëhillaj ishte vetëdorëzuar. Jo në Polici, por në Prokurori. Ndoshta kjo edhe referuar deklaratës së mëpasshme të avokatit, se “prokuroria nuk ka ngritur asnjë akuzë ndaj tij”. Por arsyet nuk janë sqaruar ende plotësisht. Prej aty është njoftuar policia, që ka tërhequr 43-vjeçarin në ambientet e saj. Është pyetur për procedurë dhe iu komunikuan akuzat për “akte terroriste”, ku i dyshuari ka mohuar lidhjet me vrasjet e Julian Sinanaj.

 

Dëshmia në polici

Policia i ka komunikuar se ai ishte shpallur në kërkim si porositës dhe ndërmjetës në disa vrasje dhe atentate. Por Andon Mëhillaj ka mohuar gjithçka. “E njoh Julian Sinanaj, kam pasur mosmarrëveshje me të dhe më kërcënonte herë pas here. Por nuk kam lidhje me asnjë nga krimet e tij. Jemi konfliktuar që pas vrasjes së Sokol Veizit, por nuk e kam urdhëruar unë. Do ju tregoj të tjerat më vonë”, ka thënë Mëhillaj, duke u mbrojtur edhe nga avokati i tij. Por seanca e pyetjeve nuk është bërë e plotë, pasi kompetenca është e Prokurorisë së Krimeve të Rënda. Mëhillaj është pyetur edhe për kushëririn e tij Genis Mëhillaj, por ka thënë se nuk dinte asgjë se ku ndodhej dhe nuk kishte folur me të, pasi ka qenë i shqetësuar për vete dhe familjen, për akuzat që po i bëheshin me pa të drejtë. Por Mëhillaj ka kërkuar ndihmë nga prokuroria për sigurinë e familjes së tij më tej, pasi ndihen të rrezikuar nga hakmarrja, sidomos pas shpërthimit të 9 shkurtit në banesën e tyre, në lagjen “28 nëntori” në Vlorë.

 

‘Deportimi’ sekret

Menjëherë nga Tirana janë nisur drejt Vlorës disa makina me targa civile dhe me agjentë specialë. Qëllimi ka qenë “deportimi” i menjëhershëm i Andon Mëhillaj nga Policia e Vlorës në atë të kryeqytetit. Operacioni ka qenë sekret për shkaqe sigurie. Dhe dje në 12:55, në hyrje të drejtorisë së Policisë Tiranë, është shfaqur një fuoristradë, nga e cila agjentët nxorën me shpejtësi Andon Mëhillajn, që për të mos u kapur nga kamerat dhe aparatet, kishte vendosur edhe kokoren e xhupit në kokë.

 

Vishet me antiplumb

Një tjetër detaj sekret i operacionit ka qenë veshja me antiplumb e Andon Mëhillajt për shkaqe sigurie dhe për shmangie të ndonjë sulmi të papritur hakmarrës. Poshtë xhupit ngjyrë gri i kanë veshur jelekun antiplumb, ndërsa gjatë rrugës nuk ka pasur asnjë incident në rreth një orë e gjysmë udhëtimi. Edhe në Policinë e Tiranës, Mëhillaj është njohur me akuzat, ku ka përsëritur mohimin e tij dhe u vetëdeklarua i pafajshëm.

 

Prokuroria dhe Gjykata

Prokuroria e Krimeve të Rënda pritet të zhvillojë një seancë të gjatë pyetjesh me Andon Mëhillajn, për ta përballur me akuzat, faktet, dëshmitë dhe ballafaqimin me të penduarit Sinanaj dhe Gjokona. Gjithashtu do dëshmojnë edhe familjarë të viktimave Veizi dhe Çela. Nëna e Sokol Veizit ka deklaruar publikisht se Mëhillajt e kishin kërcënuar me jetë që të mos fliste, ndërsa kishin konflikt pronash në bregdetin e Orikumit. Brenda dy ditësh pritet që Mëhillaj të dalë edhe në Gjykatën e Krimeve të Rënda për masë sigurie.

 

Misteri për Genisin

Prokuroria e Krimeve të Rënda thotë se dëshmia e Julian Sinanaj është e provuar në detajet e saj dhe së bashku me Ndriçim Gjokonën kanë statusin e të penduarit. Por tashmë nis përplasja dhe ballafaqimi mes killerit dhe porositësit të vetëdorëzuar. Megjithatë ende në kërkim është edhe Genis Mëhillaj, kushëriri i Andonit. Për të nuk ka asnjë informacion se ku ndodhet. Nuk dihet nëse edhe ai do vetëdorëzohet pas negociatave. Apo do i mbetet e gjithë pesha e akuzave në dëshminë e Sinanaj. Bëhet fjalë për të paktën 5 atentate, dy prej të cilëve me vdekje. Për kapjen e tyre ishin vënë në dispozicion 10 mijë euro shpërblim nga Policia e Shtetit. Prokuroria nuk sqaron nëse Sinanaj ka specifikuar se me cilin nga kushërinjtë ka ndërmjetësuar për porositë në dy vrasje dhe 3 atentate me bomba, si dhe takimin me biznesmenin Ilir Karçini. Të dy kushërinjtë në dosje përmenden si porositës dhe ndërmjetës.

 

“Veizi, e vetmja përfshirje që Andoni pranon se ka lidhje, por si kontakt dhe jo si urdhërues”

Avokati mbrojtës i Andon Mëhillaj, Edmond Dema, deklaroi se klienti i tij është akuzuar padrejtësisht nga mediat, pasi prokuroria nuk ka ngritur asnjë akuzë ligjore ndaj tij.

“Pas vendosjes së tritolit në banesën e tij, Andoni mori masa për të mbrojtur familjen. Andoni do të përballet me akuzat, të cilat nuk i pranon. Ai nuk pranon se ka porositur ndonjë vrasje dhe nuk ka asnjë të vërtetë në të gjithë këtë histori. Andoni nuk ka lidhje me botën e  krimit. Ekziston një lidhje, por do t’i japim detajet gjatë hetimit. E vetmja përfshirje që pranon se ka lidhje, por që nuk është ashtu siç është shkruar në shtyp, është vrasja e Sokol Veizit. Në lidhje me vrasjen e Sokol Veizit, është i vetmi kontakt që ka pasur. Nuk ka pranuar asnjëherë që ka qenë personi që ka urdhëruar vrasjen dhe nuk ka lidhje me asnjë ngjarje të tjera siç është thënë nga shtypi. Kanë pasur një grindje mes tyre rreth dy vite më parë”, tha avokati.

“Ka qenë një vetëdorëzim vullnetar i tij. Është bërë tërësisht në vullnetin e tij të lirë. Është vonuar pak, pasi të rregullonte problemet e veta familjare, ka lënë jashtë gruan dhe dy fëmijë. Mediat kanë ngritur akuza ndaj tij, por nuk ka pasur asnjë akuzë ligjore të ngritur nga ana e prokurorisë. Ai nuk i pranon akuzat, të cilat shtypi i ka drejtuar ndaj tij. Nuk ka pranuar asnjëherë se ka qenë ai personi që ka urdhëruar dhe sidomos nuk ka lidhje me të gjitha ngjarjet e tjera, siç është thënë nga shtypi se ka qenë ndërmjetësi. Andon Mëhillaj realisht është rënduar nga ana e shtypit, është quajtur si sekser, ndërmjetës, ai është baba i dy fëmijëve, ka bërë një jetë të rregullt familjare, nuk ka qenë asnjëherë i dënuar”, deklaroi avokati. Por avokati pohoi se mes Andonit dhe Julianit ka pasur njohje dhe madje ishin armiq, sepse Sinanaj e kërcënonte dhe përndiqte.

“Ka pasur njohje me Sinanaj, por jo të asaj shkalle dhe në atë kohëzgjatje të madhe që ka pretenduar Juljani. Ka pasur një periudhë kohe të gjatë kur ata nuk kanë folur, ka qenë nën kërcënimin e Juljanit për pak kohë. Andoni ka qenë i përndjekur nga ana e Juljanit”, deklaroi avokati, pa dhënë hollësi rreth arsyeve të përplasjeve mes tyre. Gjithashtu ka mohuar që Andoni të ishte arratisur pasi u shpall në kërkim. “Gjatë kësaj kohe, Andoni ka qenë në Vlorë. Këmbëngulja për tu vetëdorëzuar ka qenë e tij. Dorëzimi i tij nuk është nga frika, por vetëdorëzim i ndërgjegjshëm. Nga ana e policisë është ofruar ndihma që për familjen e tij do t’i qëndrojnë afër”, deklaroi avokati.

 

 

Arrest me burg Andon Mëhillajt, avokati: Ka probleme mendore

Gjykata e Krimeve të Rënda ka dhënë masën e sigurisë “arrest në burg” për Andon Mëhillajn, i akuzuar si porositësi i vrasësit Julian Sinanaj. Seanca është zhvilluar me dyer të mbyllura, ndërsa avokati mbrojtës i Andon Mëhillajt, Lazer Sokolaj, deklaroi se klienti i tij vuan nga probleme mendore. Ai ka theksuar se Andon Mëhillaj nuk ka lidhje me killerin Julian Sinanaj dhe me akuzat e ngritura nga Prokuroria e Krimeve të Rënda.

“Andon Mëhillajt iu komunikuan akuzat të cilat ai nuk i ka pranuar. Ai merr mjekim për probleme mendore. Ai është i terrorizuar, është i tronditur dhe do të japë shpjegime në një moment tjetër”, tha avokati.

AVOKATI: JULJAN SINANAJ E KA PËRNDJEKUR DHE KËRCËNUAR KLIENTIN TIM

Avokati mbrojtës i Andon Mëhillaj, Edmond Dema deklaroi se klienti i tij është akuzuar padrejtësisht nga mediat, pasi prokuroria nuk ka ngritur asnjë akuzë ligjore ndaj tij.
“Ka qenë një vetëdorëzim vullnetar i tij. Eshtë bërë tërësisht në vullnetin e tij të lirë. Eshtë vonuar pak pasi të rregullonte problemet e veta familjare, ka lënë jashtë gruan dhe dy fëmijë. Mediat kanë ngritur akuza ndaj tij, por nuk ka patur asnjë akuze ligjore te ngritur nga ana e prokurorisë. Ai nuk i pranon akuzat te cilat shtypi i ka drejtuar ndaj tij. Nuk ka pranuar asnjëherë se ka qenë ai personi qe ka urdhëruar dhe sidomos nuk ka lidhje me të gjitha ngjarjet e tjera siç është thënë nga shtypi se ai ka qenë ndërmjetësi. Andon Mëhillaj realisht është rënduar nga ana e shtypit, është quajtur si sekser, ndërmjetës, ai është baba i dy fëmijëve, ka bërë një jetë të rregullt familjare, nuk ka qenë asnjëherë i dënuar.”- deklaroi avokati.

Sipas avokatit Dema, Andon Mëhillaj ka patur njohje me vrasësin Juljan Sinanaj, madje ky i fundit e ka përndjekur dhe kërcënuar.

“Ka patur njohje me Sinanaj por jo të asaj shkalle dhe në atë kohëzgjatje të madhe që ka pretenduar Juljani. Ka patur një periudhë kohe të gjatë kur ata nuk kanë folur, ka qenë nën kërcënimin e Juljanit për pak kohë. Andoni ka qenë i përndjekur nga ana e Juljanit”- deklaroi avokati.

Avokati ka hedhur poshtë pretendimet se Andon Mëhillaj ka kaluar kufirin shqiptar, pas arrestimit të Juljan Sinanajt, duke siguruar se gjatë kësaj kohe ai ka qëndruar në Vlorë.

“Gjatë kësaj kohe Andoni ka qenë në Vlorë. Këmbëngulja për tu vetëdorëzuar ka qenë e tij. Dorëzimi i tij nuk është nga frika, por vetëdorëzim i ndërgjegjshëm. Nga ana e policisë është ofruar ndihma që për familjen e tij do ti qëndrojnë afër.”- deklaroi avokati.

Akuzat

Andon Mëhillaj së bashku me kushëririn e tij Genis Mëhillaj, i cili është ende në kërkim, akuzohen se janë punëdhënësit e killerit Julian Sinanaj.

Ndaj dy kushërinjve Mëhillaj rëndojnë akuza si ajo e “akteve terroriste” dhe të “financimit të terrorizmit”. Akuza të tjera ndaj tyre vijojnë me “fshehje nga organet e drejtësisë”, “fshehje të fondeve dhe pasurisë që financojnë terrorizmin”, “dhënie informacioni nga persona që ushtrojnë funksione publike”, “prodhim dhe mbajtje të armëve dhe municioneve ushtarake” dhe “trafikim të armëve dhe municionit”.

Emri i kushërinjve Mëhillaj u lakua menjëherë pas arrestimit të vrasësit me pagesë Julian Sinanaj në 25 janar. Ata dyshohen se janë punëdhënësit në shumicën e rasteve për 31-vjeçarin Sinanaj dhe kryesisht e kryenin aktivitetin në qytetin e Vlorës, por jo vetëm.

Ky fakt është pranuar tashmë edhe nga Julian Sinanaj, i cili ka përfituar statusin e të penduarit të drejtësisë shqiptare.

Ai ka rrefyer për grupin hetimor se ka ndërtuar bombën, e cila më pas u vendos në makinën e prefektit të Vlorës, Besnik Dervishi. Ka vrarë biznesmenin Agron Çela në Vlorë, peshkatarin Sokol Veizaj në Orikum, ka vendosur tritolin në shtëpinë e Ardian Kollozit deputet i PD si dhe do të vriste biznesmenin e gazit Piro Bare,ku në të gjitha këto raste ndërmjetësit kanë qenë kushurinjtë Mëhillaj.