Ndërtimet pa leje, Blushi replikon me Ramën: Fjala burg më shqetëson, e provuam 50 vjet

Kuvendi miratoi me 84 vota pro riformulimin e amendamentit që bëri Komisioni i Ligjeve për projektligjin për ndryshimet në Kodin Penal për ndërtimet pa leje. Riformulimi u bë pas kundërshtisë së shprehur në seancë nga deputetet Blushi e Braho, e me herët edhe nga Xhafaj.

“Cilido që ofron e kryen shërbime sipërmarrje, dënohet me burgim deri në tre vjet, kjo dispozitë e re nuk ka fuqi prapavepruese, por do të zbatohet që nga momenti që do të hyjë në fuqi”- lexoi Braho riformulimin e ri.

Ndërkohë, mazhoranca u përfshi nga replikat mes deputetit të PS-së Ben Blushi dhe kryeministrit Edi Rama në lidhje me ndryshimet në Kodin Penal, i cili parashikon dënimin me burg për ndërtimet pa leje.

Deputeti Blushi kërkoi të rishikohet amendamenti pasi nuk beson se burgu është mundësia më e mirë për t’u korrektuar. Shqiptarët e kanë provuar 50 vjet, tha ai.

Në replikë Rama tha se vërejtja e Blushit nuk është origjinale ka kohë që e bën me zë të lartë e zhurmë të madhe opozita dhe se për të ndaluar ndërtimet pa leje duhet një reformë radikale.

Ben Blushi: “Amendamenti konsideron njësoj një fshatar në Ibë që i ra shtëpia jo për fajin e vet para tre ditësh, që është i detyruar të rregullojë murin por për shkak se komuna nuk jep leje ndërtimi janë bllokuar lejet e ndërtimit për arsye nevoje njësoj si për ata industrialistët e mëdhenj të Tiranës.

Amendamenti i fut të dy në një thes. Është e drejtë mendoni ju?! Që dikush në një fshat në tokën e vet, sepse amendatementi nuk përcakton se ku fillon e mbaron faji nëse je në tokën time apo të tjetrit.

Është e padrejtë, pa dashur të kthej në polemikë, që fjala burg më shqetëson, jo vetëm mua por shumicën këtu, dhe po e përdorim pak si pa masë kohët e fundit.  Nuk besoj se burgu është mundësia më e mirë për të korrektuar. E kanë provuar 50 vjet shqiptarët. Kush thyente ligjin shkonte në burg, nuk jemi më aty Ka instrumenta të tjerë shteti didaktik, verbal pastaj gjoba dhe pastaj burgu për t’i korrektuar.

Dhe ne si shoqëri kemi nevojë të vetëkorrektohemi sepse kemi abuzuar shumë, por nuk mund të shkojmë në burg që ditën e parë. Ka shumë mundësi që amenamentit ë rishikohet për ta regulluar. Jam dakord me propozimin zotin Braho që ky amendament mund të rishikohet.

Dhënia e ndihmës është nëse një fshat ndërton një mur apo rregullon shtëpinë tënde dhe merr një punëtor me mëditje. Ai të jep ndihmë që të rregullosh shtëpinë dhe ai duhet dënuar njësoj si ai që e paguan?!” Esht e padrejtë. Ka shumë mundësi  që të rishikohet për ta regulluar.

Edi Rama: Vërejtja nuk është origjinale. Ka kohë që e bën me zë të lartë e zhurmë të madhe opozita për përdorimin e më tepër të fjalës burg. Unë dua që çdo gjëje ti vihet fjala që ka. Nuk bëhet fjalë për të futur në burg që ditën e parë dikë që ndërton pa leje, por për t’i dhënë fund historisë që vazhdon prej 25 vitesh, është çerek shekulli i humbur. Përballë këtij kanceri nuk shoh mundësinë e një terapie tjetër përveç intensive e radikale. E përsëris nuk ka asnjë shpikje ky është Kodi Penal i Republikës së Shqipërisë. Nuk ka raste kur një idivid i tillë të ketë përfunduar në burg. Dy vende të rajonit kanë çuar ekspertë për të parë qoftë për aksionit qoftë me kalimin e inspektoriatit të ndërtimit nën ombredhën e ministrisë së Brendshme.

Menjëherë pas fjalës kryetari i Parlamentit i kërkoi kryetarit të komisionit të Ligjeve Fatmir Xhafaj të mbledhë komisionin për të riparë riformulimin e amendamentit pasi nëse ka qoftë dhe një votë të vetme atëherë rrezikon që ky amendament të mos kalohet.