Bode sulmon Bashën: Udhëzimi të vinte nga organet, jo përmes individëve

Deputeti demokrat, Ridvan Bode, në një intervistë për emisionin “Prizëm” të gazetarit Aleksandër Furxhi, sulmoi kryetarin Lulzim Basha për udhëzimin e shumëdiskutuar për zgjedhjen e drejtuesve të rinj.

Bode tha se një udhëzim i tillë duhej të vinte nga organet dhe jo nga individët.

“Pavarësisht se gjithësecili mund të ketë rezervat e tij personale lidhur me një kriter apo të themi procedurë, por në fund të fundit në qoftë se ato janë në funksion të shëndoshjes së përgjithshme të gjendjes, mendoj që kanë justifikimin brenda. Edhe po të ishte vendim kryesie, do të ishte i njëjti mospranim apo i njëjti reflektim nga ata që preken drejtpërdrejt. Mirë është që të tilla kufizime të vijnë përmes organeve dhe jo përmes individëve. Jo vetëm nga kryetari, pavarësisht se ka vetëm një mandat. Por rrethanat janë të tilla që më shumë u përdor udhëzimi i kryetarit sesa vendimi i forumeve të tjera që edhe mund të ishin mbledhur,” tha Bode.