Pse bomba ndaj Dervishit u planifikua të shpërthente përballë Kryeministrisë

Hetimet për krimet e asaj që ka nisur të quhet “banda e tritolit” kanë një segment që merret edhe me qëllimet e porositësve. Interesa private dhe interesa politikë janë ngërthyer në porositë e dhëna në ditët pas prishjeve në bregdet – tha për DITA një zyrtar i lartë i policisë i përfshirë në hetime.

Mes porositësve dhe ekzekutorit Sinanaj ishin në shumicën e rasteve kushërinjtë Mëhillaj, të cilit luanin rolin e “agjencisë”. Sinanaj ka dëshmuar se ka patur raste që u ka kërkuar përcjellësve Mëhillaj edhe arsyet pse porositësit dëshironin vrasjet apo atentatet. Motivet që i thuheshin nuk kanë qenë gjithmonë të sakta. Për Kollozin i thanë se atentatin e kishte “porositur një politikan”, por motivet e vërteta sipas hetuesve lidhen me një tentativë për ta trembur ish-deputetin nga persona të cilëve ai u kishte borxhe kumari. Gjithçka mbetet në fazën e hipotezave, derisa hetimet të shkojnë në fund, por rasti më interesant mbetet ai i prefektit Dervishi.

Sinanaj ka dëshmuar se bombën ndaj Dervishit ai e ka përgatitur, por nuk e ka vendosur vetë. Sipas tij, bombën me celular që u gjend poshtë makinës së prefektit e ka vendosur vetë ish-punonjësi bashkiak Marion Mitro. Historia e vendosjes së kësaj bombe ka zënë fill pasi Sinanajt i ishte kërkuar të vriste një person, për të cilin i ishin dhënë rreth 20 mijë euro. Pasi kishte marrë paratë, për arsye ende të panjohura Sinanaj ka refuzuar të vriste personin në fjalë dhe në tentativat për të kthyer paratë është bërë një shkëmbim: në këmbim të 20 mijë eurove ai u porositi të përgatiste bombën me celular që u vendos në makinën e prefektit. “E kam përgatitur unë, por nuk e kam vendosur unë, por Mitro vetë – ka dëshmuar Sinanaj.

Motivet pse Mitro ka vendosur të veprojë vetë në këtë rast, hetuesit i lidhin me nevojën e grupit që fshihet pas Mitros për të bërë një shembull për prishjet në bregdet. Vetë Mitros, i është prishur një pronë nga aksioni i prishjeve në zonën e Vlorës. Në kontekstin e përplasjeve të krijuara mes dy pushteteve në Vlorë, ai vendosi të veprojë duke bërë shembull prefektin për të dhënë një mesazh të ngjashëm me atë të tritolit në shtyllën e tensionit ku u vendosën parulla politike.

Hetuesit dyshojnë se Mitro kishte planifikuar që makina me Dervishin të hidhej në erë në Tiranë dhe jo në Vlorë, pikërisht përballë Kryeministrisë për të dhënë një mesazh të qartë të reagimit kundër cenimit të interesave në aksionin për prishjen e ndërtimeve pa leje në bregdet. Fatmirësisht bomba nuk shpërtheu. Kurse ata që qëndrojnë pas ish-bashkiakut Mitro mbeten për tu zbuluar në hetimet që shënojnë përditë detaje të atilla sa një prej hetuesve e quajti për DITA procesverbalin e marrjes në pyetje të killerit Sinanaj si “kutia e Pandorës”.