1.SHBA
Sipas “The Sun”, Rihana është kontaktuar nga ideatori i spektaklit të talenteve “X-factor”, për të marrë pjesë në të si pjesëtare e jurisë. Nuk dihet ende vendimi i këngëtares, por kjo është një ngjarje pozitive për të, pasi në jetën personale nuk po i ecën. Dashurisë së jetës së saj, Kris Braun, nuk i shqiten mikeshat e shumta.
2. Francë
Një tragjedi familjare ka ndodhur në Salon de Provence të Francës, ku një burrë ka ekzekutuar gruan dhe dy vajzat e tij dhe më pas është vetëvrarë. Në rindërtimin e ngjarjes, burimet policore njoftuan se burri së pari kishte therur bashkëshorten, më pas vajzat dhe në fund ishte vetëvarur.
3. Itali
Një 22-vjeçar nga Milanoja është gjendur përballë një propozimi ‘të pahijshëm’, kur shoku i tij 50-vjeçar që i kishte huazuar 6 mijë euro, i kërkoi t’ia shlyente të hollat në këmbim të raporteve intime. I riu ‘iu hodh përsipër’, por për ta goditur me thikë. Si pasojë ai u arrestua, ndërsa miku i tij u dërgua në spital.
4. Angli
Duke ndjekur shembullin e prindërve të tij, Romeo, djali i dytë i David dhe Viktoria Bekamit është bërë modeli kryesor i fushatës publicitare të markës së veshjeve “Burnerry”, për linjën pranverë-verë 2013. Shpërblimi monetar i ‘yllit’ të vogël ka mbetur i fshehtë, por, duke pasur parasysh markën, besohet se do të jetë i lartë.
5. Egjipt
Prokurori i Përgjithshëm egjiptian, Talat Abdullah, i cili u emërua në këtë post nga presidenti Mohamed Morsi para një muaji, paraqiti dorëheqjen. Vendimi i Abdullah erdhi pas protestës së qindra prokurorëve publikë. Sipas tyre, vetëm Këshilli i Lartë Gjyqësor mund të emërojë një prokuror të përgjithshëm.
6. Mal i Zi
Sekretari i përgjithshëm i NATO-s, Rasmusen, gjatë takimit që pati në Bruksel me ministrin e Jashtëm të Malit të Zi, Igor Lukshiç, deklaroi se Mali i Zi është një shembull pozitiv për shtetet e Ballkanit Perëndimor dhe se përparimi i tij mund të shërbejë si nxitje për ato vende që synojnë anëtarësimin në NATO.
7. Rusi
Departamenti i shtypit i Ministrisë së Mbrojtjes ruse njoftoi se luftanijet e flotës së Baltikut dolën nga baza kryesore në qytezën e Balltijskut dhe morën kursin drejt Detit Mesdhe. Ky grup anijesh do të zëvendësojë anijet e flotës së Detit të Zi, të cilat janë të angazhuara në zbatimin e detyrave në Mesdheun Lindor.
8. Zvicër
Modelet e aristokracisë evropiane janë mbledhur në Gastad të Zvicrës për të marrë pjesë në një ‘festë dëbore me 5 yje’. Mes koktejeve, garave me ski dhe darkave në hotelet luksoze, është e pamundur mos të të bien në sy me elegancën e tyre. Fituesja sa i përket hireve dhe veshjes është Anxhela Martini, bën të ditur faqja e internetit “Mediaset”.
9.Irak
Televizioni shtetëror në Irak njoftoi se presidenti Jalal Talabani pësoi një trompozë në tru. Zyra e presidentit nëpërmjet një kumtese në faqen e saj zyrtare shprehet se Talabani ishte dërguar në spital për shkak të një “emergjence shëndetësore”, pa specifikuar shkakun e përkeqësimit të shëndetit të tij.
10. Arabi Saudite
“Princess Nora bint Abdul Rahman University”, universiteti më i madh i femrave në botë, me 50 mijë studente e që ndodhet në Riad, lëshoi një dekret që i ndalon ato të vijnë në mësim me pantallona. Burime nga universiteti thanë se ndalimi erdhi si pasojë e sjelljes së shthurur të studenteve të Fakultetit të Arteve.
11. Pakistan
Katër infermiere të fushatës së UNICEF-it kundër poliomelitit u qëlluan për vdekje në qytetin më të madh të Pakistanit, Karaçi. Punonjëset u qëlluan në tre zona të ndryshme të qytetit, thuajse në të njëjtën kohë. Besohet se vrasjet janë vepër e militantëve talebanë, që edhe më parë kanë kërcënuar punonjëset e organizatave ndërkombëtare.
12. Kinë
Portretet e famshme të Mao Ce Dunit të realizuara nga artisti amerikan, Endi Uarhol, nuk do të jenë pjesë e ekspozitës që do të prezantohet në Kinë. Në ekspozitë do të jenë më shumë se 300 piktura, fotografi dhe filma, pjesë e të cilave qenë edhe 10 portretet e udhëheqësit të madh, që autoritet kineze vendosën të përjashtojnë.