1. Brazil
Në San Paolo, qytetin me të madh të Amerikës Jugore, janë regjistruar 14-ditëshin e fundit 140 të ekzekutuar. Rekordi i vrasjeve tejkalon edhe muajin shtator, i cili u mbyll me një bilanc prej 144 viktimash. Sipas policisë, janë vrasje të urdhëruara nga liderët e organizatave kriminale që ndodhen në burg.
2. Siri
Të dielën u zgjodh kreu i ri i Këshillit Kombëtar sirian, organi kryesor i opozitës jashtë vendit që drejton kryengritjen kundër presidentit Bashar al-Asad. George Sabra, një aktivist i krishterë dha konferencën e tij të parë për shtyp si drejtuesi i ri. Ai u zotua të zgjidhë mosmarrëveshjet dhe të kthejë bashkimin brenda opozitës.
3. Greqi
Ndonëse u miratuan masat e forta të kursimit, kreditorët vazhdojnë të kenë mosmarrëveshje mbi nivelin e huasë që do t’i jepet Greqisë. Borxhi vlerësohet në 175% dhe objektivi është që deri në vitin 2020 ai të ketë rënë në 120%. Zyrtarët e FMN-së dhe KE-së thanë se nuk pajtohen për madhësinë e kësaj diference.
4. Turqi
Kryeministri turk Rexhep Taip Erdogan tha se Ankaraja po reflekton mbi mundësinë për të rikthyer dënimin me vdekje për krimet e rënda të terrorizmit. Fuqia për të falur një vrasës i takon familjes, dhe jo neve, – tha Erdogan, një dekadë pasi dënimi me vdekje u hoq. – Ne duhet të marrim masat e nevojshme”.
5. Jordani
Ish- shefi i Shërbimit Informativ në Jordani, Mohamed al Dahabi dhe një prej figurave më ‘të frikshme’ në vend është dënuar me 13 vjet burg, i cilësuar fajtor nga gjykata për akuzat e korrupsionit, pastrimit të parave, abuzim me pushtetin etj. Ai duhet të dorëzojë edhe 30 milionë dollarë në arkën e shtetit.
6. Angli
Drejtori i përgjithshëm i kanalit prestigjoz të lajmeve BBC, Xhorxh Entuisëll, dha dorëheqjen pas transmetimit të një hetimi, në të cilin akuzohej për pedofili Lord Alistir Mekalpin, një ish-politikan i palës konservatore i epokës së Theçerit. Akuzat ndaj Mekalpinit rezultuan të padrejta.
7. Birmani
Një tërmet i fuqishëm goditi paraditen e së dielës rajonin e Mandalait në Birmani duke shkaktuar 13 të vdekur, 48 të plagosur dhe disa të humbur në ndërtesat e shkatërruara prej tij. Tërmeti kishte fuqinë e 6.6 ballë të shkallës Rihter dhe shkaktoi edhe dëme të mëdha materiale.
8. Çeki
Gara e makinave e zhvilluar në Lopenik të Moravisë Jugore në Çeki u ndërpre kur një prej makinave që garonte, doli aksidentalisht nga traseja e garës dhe përfundoi mbi njerëzit që ishin duke bërë tifo. Si pasojë, mbetën të vrarë katër persona, midis të cilëve një fëmijë 10 vjeçar. Tre të tjerë u plagosën.
9. Spanjë
E përdishmja spanjolle “El Pais” do të ketë 129 gazetarë më pak, pasi u pushuan nga puna paraditen e së dielës. Ndër ta, ka dhe emra të njohur të shtypit në vend. Të gjithë e morën njoftimin për pushimin përmes një e-maili. Gazeta më e famshme në Spanjë ka pësuar humbje të mëdha të ardhurash muajt e fundit.
10. Sri Lanka
Më shumë se 27 persona gjetën vdekjen paraditen e së dielës në burgun Uelikada gjatë përleshjeve që ndodhën mes të burgosurve dhe rojeve të burgut. Sipas autoriteteve lokake, dhuna filloi kur komandot e forcave të sigurisë mbërritën në burg për të garantuar qetësinë.
11. Portugali
Të paktën 10 mijë ushtarë u mblodhën në qendër të Lisbonës për të protestuar së bashku me qytetarët e tjerë kundër masave shtrënguese që qeveria ka ndërmarrë kohët e fundit. Ata i kërkuan presidentit Anibal Kavako Silva, që t’i vërë veto buxhetit të miratuar nga qeveria e qendrës së djathtë.
12. Irak
Iraku ka anuluar një marrëveshje prej 4,2 miliard dollarësh për blerjen e armëve nga Rusia. Zëdhënësi i kryeministrit, Nuri Maliki, tha se ai sapo është rikthyer nga udhëtimi i tij në Rusi dhe kishte dyshime për korrupsion brenda ekipit të vet ndaj dhe vendosi të rishikojë të gjithë marrëveshjen.