FIFA ushtron presion ndaj Katarit për të përmirësuar kushtet e punëtorëve të përfshirë në projektet për ndërtimin e infrastrukturës dhe stadiumeve të Botërorit 2022. Gjatë një takimi që presidenti Sepp Blatter zhvilloi me përfaqësuesit e Konfederatës Ndërkombëtare të Tregtisë, ai e cilësoi situatën si të papranueshme dhe kërkoi përmirësimin e kushteve të punës. Presidenti i FIFA-s, Sepp Blatter i ka cilësuar si të papranueshme kushtet e emigrantëve që ndodhen në Katar për të punuar në stadiumet për Botërorin e vitit 2022. Blatter është takuar me presidentin e Konfederatës Sindikale Ndërkombëtare, Michael Sommer, të cilit i ka shprehur nevojën urgjente për ndryshimin e situatës, me qëllim respektimin e të drejtave të punëtorëve. Takimi është zhvilluar tre ditë para publikimit të një raporti nga Amnesty International mbi mënyrën e trajtimit të emigrantëve të punësuar në kantieret e Emiratit. Në lidhje me situatën ka reaguar prokurori i përgjithshëm i Katarit, Ali bin Fetais, i cili ka folur për një komplot të ndërthurur ndaj vendit të tij. “Disa vende që aspironin të prisnin Botërorin 2022, e drejtë që më pas iu dha Katarit, fshihen pas hetimit të publikuar në “The Guardian” për shfrytëzimin e punëtorëve”, ka deklaruar Fetais. Zyrtari i lartë është shprehur skeptik për vërtetësinë e lajmeve për abuzimet dhe është shprehur i gatshëm të marrë në pyetje punëtorët e huaj, për të verifikuar situatën. Ai ka bërë gjithashtu të ditur se pas artikujve denoncues të publikuar në të përditshmen “The Guardian”, Katari ka hapur një proces hetimor.