Bozdo: Qeveria të marrë masa për të mos lejuar rritjen e çmimit të biletës

Bashkia e Tiranës i kërkon qeverisë të marrë masa për të mos lejuar rritjen e çmimit të biletës të transportit urban. Në një dalje para mediave në mesditë, nënkryetari i Bashkisë së Tiranës, Enno Bozdo, paraqiti disa kërkesa drejtuar qeverisë.

Bashkia kërkon subvencionimin operativ të shërbimit nëpërmjet granteve të kushtëzuara ndaj qeverisjes vendore. “Në këtë kuadër, Bashkia e Tiranës ka gjithë gatishmërinë për të rishikuar kushtet e kontratës që të mundësojë këtë lloj subvencionimi; Subvencionimi social për kategoritë që sipas ligjit përfitojnë transport publik falas; Ulja e TVSH për shërbimin e transportit publik; Heqja e akcizës së naftës për transportin urban qytetas. Ndryshimi i legjislacionit për emetimin dhe prodhimin e biletave të transportit për mundësimin e sistemit të biletave elektronike që shmang abuzivitetin në përdorimin e shërbimit urban qytetës.  Ndryshimi i sistemit të llojeve të biletave që është shumë i kufizuar duke mos lënë hapësira për përdorimin e llojeve të ndryshme të biletave shumë përdorimshe, siç mund të jenë 1 ditore, 1 javore, bileta për fundjavën. Këtë eksperiencë e gjejmë në shumicën e vendeve të BE-së por edhe në rajon”, tha Bozdo.

Numri dy i Bashkisë së Tiranës, i cili i ka shpeshtuar daljet në emër të institucionit për shkak të angazhimit të kryebashkiakut si kryetar i PD-së, tha se bashkia e kryeqytetit është e shqetësuar për heshtjen totale të qeverisë ndaj letrës së dërguar nga Bashkia, kërkesës së shoqatës së Transportit Urban dhe pritjes gjithë ankth të qytetarëve për çmimin e biletës.

“Deri më sot, ende nuk kemi asnjë reagim nga ana e qeverisë e cila vazhdon të fshihet me gjithfarë justifikimesh e pas çdo specialisti të mundshëm”, tha Bozdo.