Deputeti i PS Erion Brace shprehet pesimist për takimin mes Kryeministrit Rama dhe kryetarit te PD-së Basha për reformën në drejtësi. Duke folur në Report TV, Braçe tha se Lulzim Basha nuk ka ndikim dhe pushtet tek grupi parlamentar i PD-së dhe për këtë arsye nuk pret asgjë nga ky takim.
“Unë nuk pres asgjë nga ky takim sepse Basha nuk ka asnjë pushtet brenda Partisë Demokratike. Ai nuk ka ndikim mbi grupin parlamentar. Dhe për të fat të keq vendos ai grup parlamentar. Si mund ta ndihmojnë? Si mund të ndërhyjmë ne brenda Partisë Demokratike?
Ne nuk mund të ndërhyjmë brenda asaj partie edhe pse ata kanë futur gjithmonë hundët në Partine Socialiste”.
Gjithashtu kryetari i komisionit të Ekonomisë Braçe ka konfirmuar se qeveria do te rrisë në mënyrë të konsiderueshme pagat dhe pensionet për 2017.
“Është e mundur një rritje e konsiderueshme për pagat e pensionet për 2017. Them tani sepse e morëm në një gjendje të rrënuar. Na u desh të bënim një disiplinim te financave, të borxhit të shtetit. Do rriten pagat dhe pensionet kjo është e sigurtë”, deklaroi Braçe.