Britani, zbulohet plani terrorist që do t’i ngjante 11 shtatorit

Tre persona janë shpallur fajtorë nga drejtësia britanike për planifikimin e një sulmi terrorist që do t’i ngjante atij të 11 shtatorit në SHBA, nëse do të ishte realizuar. Irfan Naseer, 31 vjeç; Irfan Khalid, 27 vjeç; dhe Ashik Ali, 27 vjeç, të tre me banim në Birmingam, sipas drejtësisë janë figurat qendrore në një skenar ekstremist islamik, sipas të cilit në disa zona të mbipopulluara të Britanisë do të vendoseshin bomba. Policia beson se ky është komploti më i madh i zbuluar që nga viti 2006, kur u zbulua plani për të hedhur në erë linjat ajrore transatlantike, duke përdorur bomba të maskuara si pije të joalkoolike. Irfan Khalid pranoi para trupit gjykues se plani ishte një sulm që do t’i ngjante 11 shtatorit 2001 dhe do të ishte “një hakmarrje për gjithçka”.