Banka e Shqipërisë prezantoi dje për gazetarët Raportin e Politikës Monetare për tremujorin e tretë të vitit. Raporti konfirmoi se ekonomia është e plogësht dhe presionet inflacioniste janë të ulëta. Inflacioni i ulët dhe i gjeneruar në pjesën dërrmuese nga ushqimet është një simptomë e pesimizmit dhe pasigurisë konsumatore. Rritja ekonomike për vitin 2013 parashikohet edhe njëherë e dobët, në kushtet kur kërkesa e brendshme nuk po jep shenja përmirësimi, ndërsa kërkesa e jashtme dhe kontributi i sektorit publik pritet të japin kontribute në rënie. Duke analizuar përbërësit kryesorë të kërkesës, Banka e Shqipërisë konstaton se kërkesa e brendshme ka ngelur e dobët, sepse të ardhurat e disponueshme nuk po rriten, burimet e financimit janë të shtrënguara dhe individët ndjehen të pasigurt për të ardhmen. Kërkesa e ulët ka thelluar hendekun negativ të prodhimit në ekonomi dhe bizneset vazhdojnë të operojnë poshtë kapaciteteve të tyre. Kjo klimë nuk favorizon investimet e reja private, që sipas treguesve të tërhtortë gjatë këtij viti janë në rënie. Kërkesa e huaj, që ka mbështetur rritjen ekonomike në dy vitet e fundit pritet të zbehet dhe qysh në tremujorin e dytë të këtij viti Banka Qendrore ka konstatuar se eksportet reale neto kanë nuk kanë dhënë kontribut pozitiv në ritjen ekonomike. Nga ana tjetër, stimuli fiskal që ka qënë faktor shumë i rëndësishëm për rritjen ekonomike gjatë viteve të krizës, është i destinuar të zbehet, për shkak të rritjes së borxhit publik në kufijtë e 70% të PBB.