Braçe shpjegon replikat me Finon: Nuk ka lidhje fare me LSI-në (VIDEO)

Deputeti Erjon Braçe ka reaguar sërish ndaj votimit që u bë sot në seancë plenare lidhur me buxhetin e shtetit dhe një debati të ashpër që kishte të bënte me votimin e disa punonjësve që do të dërgohen nëpër qarqe  për të mbikëqyrur reformën territoriale.

“Ajo që ndodhi në Kuvend nuk ka lidhje fare me LSI-në. Ajo që ndodhi në Kuvend ka lidhje me seriozitetin ndaj procedurave të Kuvendit. Ajo që ndodhi në Kuvend ka lidhje me seriozitetin e diskutimit dhe miratimit të Buxhetit të Shtetit të një viti. Ajo që ndodhi në Kuvend ka lidhje me kundërshtimin tim për të improvizuar në sallë me shifrat e Buxhetit të Shtetit.  (Fjala bie, sot Ministri i Financave u detyrua të kthehet edhe një herë në Komisionin e Ekonomisë për të diskutuar e miratuar dy rregullime teknike të dakordësuar me FMN-në në fund të diskutimit)”, shprehet Braçe.

Sipas kryetarit të Komisionit të Ekonomisë, ajo që ndodhi në Kuvend ka lidhje me kundërshtimin e tij për të paguar me paratë e taksave burokratë pas burokrati, në mënyrë të paarsyeshme e thjesht për t’i bërë vend ndonjë udhëheqësi të vogël në administratë.

“Në fund, ajo që ndodhi në Kuvend ka lidhje edhe me etikën. Në atë sallë ka njerëz që e njohin mirë folklorin dhe romuzet, por të gjitha janë të padobishme për punën dhe miradministrimin e parasë publike. Kaq! Pjesa tjetër e thënë aty për punën e Komisionit të Ekonomisë është tërësisht një gënjeshtër e madhe”, thekson Braçe.

Buxheti i ri, sherr mes Finos dhe Braçes për një amendim (VIDEO)

Pak para votimit të buxhetit të vitit 2015 dhe paketës së re fiskale, mes deputetëve të mazhorancës, ka pasur një debat të ashpër që kishte të bënte me votimin e disa punonjësve që do të dërgohen në qarqe të vendit për të mbikëqyrur reformën territoriale.

Një debat që ka dashur ndërhyrjen e kreut të Kuvendit, por që ka shkaktuar një përçarje mes deputetëve të Partisë Socialiste në prani edhe të kryeministrit Rama, i cili u detyruar të bënte “gjyqtarin” mes Bashkim Finos dhe Erjon Braçes.

Fino kërkoi shtimin e stafit me 4 punonjës më shumë, pra nga 8, në 12, ndërkohë që Komisioni i Ekonomisë, i mbështetur edhe nga kryeministri Rama, ka kërkuar 8 punonjës. Fino u shpreh se propozimi i tij duhet të hidhet në votim dhe pas kësaj kërkese, i mbështetur edhe nga disa deputetë të tjerë, kreu i Kuvendit Meta lejoi hedhjen në votim.

Por në këtë rast, ndërhyri kreu i grupit parlamentar të PS-së, Gramoz Ruçi, i cili argumentoi se ndryshimi i Finos duhej të ishte bërë 24 orë përpara dhe se në këtë rast është shkelur rregullorja.

Braçe braktisi i zemëruar sallën e Kuvendit, pasi u votua me karton amendamenti i paraqitur nga Fino.

Meta më pas ndërhyri duke thënë se votimi i mëparshëm ishte i pavlefshëm, ndërsa kryeministri Rama vendosi që agjencia për Reformën Territoriale duhet të ketë 12 punonjës, duke lënë të vetëm Braçen.

Sipas kreut të qeverisë, kjo gjë që do të rregullohej me akte nënligjore, ndërsa votimi u anulua. Në këtë mënyrë, mes Finos dhe Braçes, “fitoi” ish-kryeministri, i cili këmbënguli që qarqet të kenë 12 punonjës në total për mbikëqyrjen e reformës territoriale.

“Kjo është e vetmja mënyre për të arbitruar ndeshjen mes Braçes e Finos. Këtu populli përmes deputetëve dha mendimin e tij dhe propozimi i Finos u miratua”, tha Rama.