Ish-zyrtari i Pentagonit përgjegjës për Ballkanin, Michael Carpenter ka komentuar mosmarrëveshjet midis Kosovës dhe Serbisë.
Carpenter është i mendimit se zgjedhjet e ardhshme në Kosovë, ashtu si dhe zgjedhjet e vitit 2020 në Serbi, mund të vonojnë marrëveshjen midis këtyre dy shteteve. Në një intervistë për VoA në gjuhën serbe Carpenter deklaroi se periudha e zgjedhjeve është një kohë shumë e keqe për të negociuar marrëveshje ndërkombëtare.
Ai nënvizoi: “Fakti që Kosova nuk ka një kryeministër është një pengesë e madhe, dhe koha e zgjedhjeve është gjithashtu e përshtatshme për ata që mbrojnë pikëpamje më të ashpra politike, gjë që është e keqe për të arritur një marrëveshje. Unë nuk do të thoja që një marrëveshje është e pamundur, por duket se nuk ka gjasa”.
Sipas tij, rrethanat politike të brendshme në Serbi dhe Kosovë duket se janë të tilla, që ideja e një “shkëmbimi territoresh” mund të ketë sukses, por sipas tij, momenti për këtë nuk ka ardhur endë, as në Kosovë e as në Serbi.
Carpenter, gjithashtu, u shpreh skeptik për dialogun, duke theksuar: “Unë nuk besoj se vazhdimi i dialogut, i udhëhequr nga Federica Mogherini, do të çonte në diçka konkrete. Unë mendoj se nëse Serbia dëshiron ta kapërcejë atë pengesë, dhe të njohë pavarësinë e Kosovës, do të duhet të marrë diçka shumë konkrete në këmbim, diçka që qytetarët do ta konsiderojnë të vlefshme”.
Carpenter shtoi se administrata aktuale e SHBA-së dëshiron të shfrytëzojë mundësinë për të zgjidhur mosmarrëveshjen midis Serbisë dhe Kosovës, duke theksuar se mbështetja për idenë e shkëmbimit të territorit, nuk ka asnjë lidhje me ndarjet partiake në Amerikë.
Duke iu referuar rolit të Rusisë, Carpenter tha se “nga këndvështrimi i Moskës, është më mirë të vazhdojë një konflikt midis Kosovës dhe Serbisë, sepse kjo i lejon Rusisë të paraqitet si mbrojtës i interesave serbe dhe kundërshtar i Kosovës”.
Ai shtoi: “Unë nuk mendoj se është në interesin e Kremlinit për të zgjidhur këtë çështje”.
e.ll./dita