Bullgaria ofron bursa për pjesëmarrje të studentëve dhe specialistëve shqiptarë në kursin veror të gjuhës, letërsisë dhe kulturës bullgare pranë Universitetit “Sv. Kliment Ohridiski” të Sofjes dhe Universitetit “Sv. Kiril i Metodi” të Veliko Tërnovos në Bullgari për një periudhë trejavore korrik-gusht 2013.
Burimet zyrtare pranë Ministrisë së Arsimit bëjnë me dije se kanë nsiur tashmë aplikimet për të interesuaririt. Aplikuesit duhet të dorëzojnë pranë Drejtorisë së Politikave dhe Programeve Ndërkombëtare në Ministrinë e Arsimit dhe Shkencës, deri më 10 maj 2013 dosjen e dokumenteve që duhet të ketë në përmbajtje “ kërkesën për ndjekjen e kursit veror të gjuhës bullgare, CV, vërtetim për ndjekjen e studimeve dhe listë notash, një letër reference, dëshmi për njohjen e gjuhës bullgare nëse ka, raportin mjekësor, fotokopje të kartës së identitetit/pasaportës, si dhe dy fotografi.
Pala bullgare përballon shpenzimet për ushqimin, akomodimin dhe programin mësimor dhe kulturor, ndërsa shpenzimet e udhëtimit vajtje-ardhje do të mbulohen nga vetë pjesëmarrësit në kurs. MASH thekson se për bursat e ofruara për kursin e verës në Bullgari duhet të aplikojnë kryesisht studentë të gjuhës bullgare pranë Departamentit të Gjuhëve Sllave e Ballkanike të Fakultetit të Gjuhëve të Huaja të Universitetit të Tiranës.