Hungaria ofron bursa studimi universitare, pasuniversitare ose në fushën e kërkimit, si dhe bursa për kurse vere për në universitetet publike të Hungarisë për vitin e ri akademik 2013-2014. Ambasada Hungareze në Tiranë ka konfirmuar dje se është shpallur programi i bursave shtetërore për shtetasit shqiptar që dëshirojnë të ndjekin studimet e larta sipas kategorive të përcaktuara. Konkretisht për studimet e pjesshme në nivelin Bachelor dhe Master ofrohen bursa nga 3-10 muaj. Për këto bursa mund të aplikojnë studentë të nivelit parë (Bachelor) ose studentë të nivelit të dytë (Master) për programe të ndryshme studimi. Preferohen ata studentë që studiojnë ose punojnë në fushën e gjuhës dhe të letërsisë hungareze ose studentë të regjistruar në programet e studimit: mjekësi e përgjithshme, stomatologji, farmakologji, veterinari, arkitekturë dhe drejtësi. Kërkohet që kandidatët e interesuar të kenë përfunduar të paktën 2 semestra në institucionet e arsimit të lartë të vendit të tyre. Mosha e rekomanduar duhet të jetë deri 30 vjeç.
Për studimet pasuniversitare ose në fushën e kërkimit ofrohen 1-10 muaj bursa. Për këtë kategori bursash të gjithë të interesuarit duhet të jenë të pajisur me një diplomë të nivelit Master. Gjithashtu, aplikantë që janë në vazhdim të studimeve rekomandohen në programin e Doktoraturës, por që dëshirojnë të kryejnë kërkime për tezën e studimit të doktoraturës.
Studentët që përfshihen në këtë nivel studimi, nuk përfitojnë kredite. Mosha e rekomanduar është deri në 40 vjeç. Për ciklin e studimeve në Doktoraturë (PHD,) program i plotë, ofrohen 36 muaj bursë. Për këtë lloj programi mund të aplikojnë vetëm studentë që zotërojnë gjuhën hungareze.
Bursa jepet me kusht për ata kandidatë që i nënshtrohen provimit para pranimit në universitet për programin e doktoraturës. Mosha e rekomanduar është deri në 35 vjeç. Për kurse vere ofrohen 1-4 javë.
Afati i fundit për dorëzimin e aplikimeve për këto bursa është data 8 prill 2013. Për një informacion më të detajuar për mënyrën e aplikimit dhe të përgatitjes së dokumentacionit referojuni materialeve informativë bashkëlidhur këtij njoftimi që gjenden në faqen e internetit: www.scholarship.hu.
Pranvera Kola