Çfarë fshihet pas përplasjes mes Vangjush Dakos dhe “këshilltarit të kryeministrit” Baton Haxhiu?

Shqiptari i ndershëm (në kuptimin që i japin kësaj fjale serbët) Baton Haxhiu, live në televizion theksoi se si këshilltar i Kryeministrit Rama kishte qenë kundër rikandidimit të Vangjush Dakos për kryebashkiak të Durrësit. Madje-madje Batoni, një rrugë e dy punë, me këtë rast e emëroi veten edhe këshilltar të Kryeministrit Rama.

Normalisht Batoni u shpreh se ishte i bindur në fitoren e padiskutueshme të zonjës Grida Duma (Shqina) përballë Dakos. Të kuptohemi drejt, në këtë kontekst sigurisht edhe unë në linjë gjinore, jam pro Gridës njëlloj si Batoni. Gjithsesi, duke folur nga këndvështrimi i politikës apo më mirë të themi i gjeopolitikës, lind natyrshëm pyetja çfarë kishte me Dakon, shqiptari i ndershëm Baton Haxhiu?!

Vangjush Dakoja asnjëherë nuk është afishuar si antiserb i tërbuar, kështu që Batoni nuk kishte pse të investohej fuqishëm në këtë pozicion anti-Dako. Kryebashkiaku i Durrësit vërtet është patriot, shqiptar i mirë, pro-amerikan i deklaruar të paktën që në kohën e ambasadores Marcie Ris, por gjithnjë i përmbajtur dhe modest, kështu që nuk besoj që patriotizmi dhe proamerikanizmi i Dakos t’ia kenë ngritur nervat shqiptarit të ndershëm Baton. Në dijeninë time, Dako nuk i ka bërë ndonjëherë karshillëk “Princit” të Devollit, kështu që edhe kjo arsye për kërleshjen e B. Haxhiut bie, se fundi i fundit si qeni i racës sharrplaninc, si qeni i racës chiwawa, kur hanë në çanak Devolli, po në çanak Devolli do lehin.

Mbetet enigmë dhe objekt investigimi gazetaresk pse dhe kush ia dha shqiptarit të ndershëm Baton ustanovkën për të sulmuar kandidaturën Dako. Vallë çfarë interesash serbe prish një fitore e tretë radhazi e Dakos në Durrës?! Pse duhet të telekomandohet Batoni për të sulmuar Vangjush Dakon, kur dihet tashmë se Durrësi për serbët është Verboten, që në kohën e Austro-Hungarisë.

Shqiptari i ndershëm Baton për t’u dhënë peshë fjalëve të veta u vetëshpall si këshilltar i Kryeministrit Rama. Zyrtarisht nuk ekziston asnjë Baton këshilltar i Ramës. Kryeministri i Shqipërisë ka vetëm një këshilltar, shqiptar etnik nga Republika e Kosovës. Ai është Shkëlzen Maliqi. Fundi i fundit është luks i tepërt për Kryeministrin e Shqipërisë të ketë për këshilltar qoftë edhe vetëm një shqiptar të ndershëm nga Kosova. Mozomakeq sikur të ketë dy. Normalisht krahasuar me Batonin tonë Shkëlzen Maliqi ka shumëfish merita në këtë lëmi, duke qenë shqiptar i ndershëm tre breza rresht. Gjyshi i Shkëlzenit ishte shqiptar luajal, që në kohën e reformës agrare të Kral Aleksandrit. I ati Mehmet Maliqi ishte shqiptar i ndershëm, që në shkurt të vitit 1945 (anëtarësimi zyrtar në OZNA) e deri sa u bë sekretar rajonal në Kosmet për punët e brendshme. Shqiptarin e ndershëm Mehmet Maliqi-Cukulli e kishin zili në Prizren edhe serbë të tillë të shquar si Cedo Mijoviçi, Zdravko Mustaçi apo Gojko Medenica. Madje, madje edhe shqiptarë të ndershëm të kalibrit të Selim Broshës e Muharrem Danës ndiheshin inferiorë para shqiptarit të ndershëm Mehmet Maliqi. Vetë Shkëlzeni ishte shqiptar i ndershëm, që student në Beograd e theksojmë pas Pleniumit të Brionit, që likujdoi Rankoviç-in.

Në foton ilustruese janë disa shqiptarë kosovarë luajalë, që me pushkë në dorë pozojnë bashkë me xhandarë serbë dhe me Vojvodën, kasapin Miliq Krstiç pranë kufomave të kaçakëve shqiptarë, që kanë guxuar të ngrenë armët kundra Serbosllavisë. Nga kjo foto kanë kaluar nja 90 vjet dhe shumë gjëra kanë ndryshuar.  Fjala vjen, shqiptarët luajalë të kohës së Jugosllavisë mbretërore sot quhen shqiptarë të ndershëm. Vojvodës Miliç Krstiç ka ca dekada që ia pshurrin varrin qentë, por vendin e tij e ka zënë David Gaiç, “djali” i shkëlqyer i BIA-s. Sipas dëshmisë së hebreut çekosllovak, diplomatit amerikan dhe dhëndrit të familjes tiranase Caslli, Karl Zibentrit, pikërisht ky David Gaiç-i i ditëve të tmerrshme të pranverës së vitit 1999 kishte zakon t’i ndihmonte shqiptarët e ndershëm. Personalisht Gaiç-i hipur në xhipin Lada Niva në ngjyrë qumështi, i shoqëronte shqiptarët e ndershëm deri në pikën e kontroll-kalim-kufirit të quajtur Gjeneral Jankoviç, jo për ndonjë gjë, po do të ishte me të vërtet gjynah sikur ndonjë shqiptar të tillë të ndershëm ta vrisnin gabimisht paramilitarët Franki Boys të Simatoviç-it apo kasapët e Momës, atij kolonit serb nga një fshat afër Gorni Novosello të Gjakovës.

Shyqyr zotit që Gaiç-i, aktualisht zë autoritar në radhët e BIA-s, bëri të tilla “sevape” në pranverën e vitit 1999, se larg qoftë nuk do të kishim privilegjin të shikonim ndonjë shqiptar të tillë të  ndershëm se si kapërdiset si maçoku në thekër ekraneve të televizioneve këtej dhe andej kufirit të vitit 1913. Shpresoj që shqiptari i ndershëm Baton si specialist në shkencat e komunikimit, tashmë ka arritur ta kuptojë që deri tani në shkrim qëllimshëm është përdorur metoda e komunikimit me publikun e quajtur Names dropping technique.

Unë ia di hallin dhe e mirëkuptoj shqiptarin e ndershëm Baton Haxhiu. Normal që vija e sjelljes që të japin duhet zbatuar, por siç thotë latini: Est modus in rebus: gjella me kripë dhe kripa me karar. I ndershmi z. Baton: sot as arkivat e BIA-s, as ato të VOA-s nuk janë më të virgjëra. Para Dajë Samit i uli klinat edhe vetë Stanishiçi i tmerrshëm. Vallë, Baton, shqiptari i ndershëm Baton, këta djemtë-zonjusha të BIA-s së sotme, me çorape të kuqe e flokë me xhel do mund të jenë më kokëfortë se Stanishiçi?! Duke përdorur metodën e komunikimit me publikun të quajtur iceberg technique për ilustrim të shkrimit janë vënë dy dokumente, të rrjedhura nga arkivat serbo-sllave. Në këto dokumente të para 4-5 viteve provohet bashkëpunimi i MEICO-s sonë me kontrabandistin famëkeq të armëve serbin Sllobodan Tesiç për të trafikuar armatime serbe drejt një vendi të Lindjes së Mesme. Kur nga arkivat e MDI-së malazeze apo edhe vetë VOA-s (pasardhësja e KOS-it), rrjedhin dokumente që ofrojnë të dhëna të detajuara për kontrabandën e armëve, a mos vallë është e pamundur të rrjedhin edhe lista qoftë edhe të pjesshme të shqiptarëve të ndershëm?!