Inter nuk ka mundur të shkojë përtej barazimit 1-1 kundër SPAL, duke vazhduar momentin e dobët të formës që po kalon.
Zikaltërit nuk fitojnë prej nëntë ndeshjesh të luajtura në të gjitha veprimtaritë, shtatë prej të cilave në Serie A, ku të besuarit e Luciano Spalletti kanë arritur katër barazime radhazi, si nuk ndodhte që nga viti 2004.
Inter kaloi në avantazh në minutën e tretë të pjesës së dytë. Ishte një autogol “klasik”, kur Vicari devijoi në rrjetën e tij një krosim të ardhur nga Joao Cancelo.
Ky ishte autogoli i parë në favor të Inter në këtë edicion të Serie A.
Gjithsesi, pikërisht kur miqtë nisën të shijojnë fitoren erdhi zhgënjimi i madh. Në minutën e fundit të ndeshjes SPAL tundi rrjetën.
Sulmuesi i rritur te Akademia e Milan, Alberto Paloschi, shënoi me kokë golin e barazimit për vendasit.
Kësisoj, Inter mbetet në vendin e katërt të renditjes me dy pikë më pak se Lazio e vendit të tretë, edhe pse bardhekaltërit kanë luajtur një ndeshje më pak, atë që do të zhvillojnë pasdite në “San Siro” kundër Milan.
SPAL është në vendin e tretë nga fundi, por mban ende gjallë shpresat për “mbijetesë”.