Çfarë po ndodh me Braçen

Prapaskenat e tensionit dhe debateve mbi kandidimin e një prej deputetëve më të spikatur të Partisë Socialiste. Propozimi për nga Berati në Tiranë e më pas ripropozimi për në Fier. Çfarë thotë vetë Erjon Braçe, çfarë është thënë në një takim mes Braçes dhe Gramoz Ruçit dhe çfarë ka komunikuar Braçe orët e fundit me një mikun e tij në FB. Çfarë po ndodh me të tjerët në PS, pak orë para dërgimit të listave në KQZ.

 

Përgjatë gjithë ditës së djeshme mediet kanë raportuar një “kërkesë emergjente” të organizatës rinore socialiste, FRESH-it, e cila këmbëngulte publikisht në drejtim të kreut të PS-së, Edi Rama, se ku i fundit duhej të përfshinte në lista  me doemos Erjon Braçen dhe Elisa Spiropalin. Kjo e fundit është dhe vetë kryetare e FRESH-it, ndërsa “problemi” me Erjon Braçen përfaqëson një shqetësim më të veçantë ndër radhët e socialistëve.

Në fakt të panjohurat në lidhje me një kandidim të Erjon Braçes kanë qarkulluar në qarqet politike dhe mediatike në Tiranë prej disa javësh. Vetë Braçe më parë nëpërmjet disa statuseve publike në faqen e vetë zyrtare në “facebook” ka dhënë  disa mesazhe pakënaqësie, por duket se në realitet brenda radhëve të kryesisë të Partisë Socialiste ka pasur një tension konstant dhe debate të vazhdueshme në lidhje me pozicionimin e tij në raport me alternativën e PS-së për zgjedhjet e 23 qershorit.

Mbrëmë “DITA” kontaktoi deputetin Braçe, i cili si gjithë këto ditët e fundit, refuzoi të bëjë publike detaje dhe ka preferuar të flasë shumë shkurt në lidhje me këto zhvillime. “Shikoni, mund t’iu them vetëm  se do të respektoj deri në sekondën e fundit frymën institucionale të partisë time. Jam duke pritur mbledhjen e radhës së kryesisë. Bëj pjesë te ata socialistë që kanë luftuar në mënyrë të pakushtëzuar për dinjitet dhe jo për deputet”, – na tha Braçe i cili më pas ka refuzuar në mënyrë  kategorike kërkesat e gazetës për të ofruar detaje në lidhje me situatën e shumëpërfolur të tij në partinë Socialiste ditët e fundit.

 

Prapaskenat

“DITA” ka mundur të mësojë disa nga detajet e debateve mes Braçes dhe një pjesë të lidershipit socialist në javët e fundit. Duket se fillesa e mosmarrëveshjeve ka qenë komunikimi që i është bërë deputetit nga disa drejtues të PS-së, të cilët i kanë bërë të ditur atij në muajin janar, se nuk do të ishte më një kandidat në rrethin e Beratit, të cilin Braçe e përfaqëson që prej vitit 1996, por do të transferohej në listat e Tiranës.

Mësohet se deputeti nuk e ka pritur mirë këtë vendim fillimisht, madje në momentin që i është komunikuar ai ka sfiduar lidershipin e PS-së duke i ftuar që “të shkonin së bashku në Berat dhe nëse dikush në Berat do të kërkonte largimin e tij atëherë ai do të hiqte dorë përfundimisht nga statusi i deputetit”. Pasi ka bërë këtë sfidë, Braçes i është thënë se transferimi i tij në Tiranë nuk lidhej aspak me rezultatet apo popullaritetin e tij në Berat por me nevojën që ka Partia Socialiste për të pasur figura sa më të spikatura në qarkun e Tiranës, në të cilin pritet të zhvillohet dhe beteja më e fortë e zgjedhjeve të 23 qershorit.

Duket se deputeti ka pranuar këtë arsyetim dhe ka rënë në paqe me idenë se do të shkëputej nga një zonë të cilën ai e përfaqëson prej 16 vitesh. Por javët kalonin dhe po trokiste afati final i dorëzimit të listave të kandidatëve nga PS-ja në KQZ, ndërsa për Braçen asgjë nuk ishte konfirmuar edhe për sa i takon përfaqësimit në Tiranë.

Mësohet se së fundmi Braçe ka pasur një komunikim me kreun e grupit parlamentar të PS-së, Gramoz Ruçin në lidhje me kandidimin e tij, madje mësohet se Ruçi nga ana e tij e ka ftuar Braçen që të kandidonte së bashku me të në Fier. Kjo ofertë e ka acaruar edhe më tej Braçen i cili ka bërë të qartë se nuk ka nevojë “për lëmoshë” dhe se kërkonte një vlerësim në bazë të meritave dhe të produktit dhe jo thjesht të vegjetonte në parlamentin e ardhshëm.

Është ende e paqartë nëse Braçe do të jetë ose jo në listat e deputetëve të PS-së, mund të vendosë gjithçka edhe sekonda e fundit.

 

Konfliktet

Pakënaqësitë dhe debatet në Partinë Socialiste në lidhje me hartimin e listave të kandidatëve për deputetë janë shpeshtuar ditët e fundit. Një pjesë e deputetëve aktualë që pritet të kenë pozita më të dobëta në listat e ardhshme kanë kërkuar nga kryesia që të zbardhë metodologjinë e hartimit të këtyre listave.

Burime të besueshme nga PS-ja bëjnë të ditur se një debat të “zjarrtë” kanë shkaktuar ata që së fundmi në PS etiketohen si “Katërshja e Korçës”. Bëhet fjalë për Ben Blushin, Pandeli Majkon, Mimi Kodhelin dhe Arben Ahmetajn. Që të katërt tashmë kryesojnë listat në të tjera qarqe por disa prej deputetëve të PS-së kanë kundërshtime me promovimin e tyre në qarqe të tjera pasi sipas këtij grupi deputetësh ata janë përgjegjës për rezultatet e dobëta të PS-së në Korçë në vitin 2009, madje edhe në zgjedhjet lokale të vitit 2011.

“Katërshja e Korçës” është komentuar gjatë sidomos javën e fundit në korridoret politike të Partisë Socialiste madje deputetët apo zyrtarët socialistët që kanë rezerva mbi procesin e hartimit të listave e përmendin “Katërshen” si një shembull të mungesës së analizës mbi produktivitetin dhe meritokracinë gjatë hartimit të listave zgjedhore.

 

 

 

Një bisedë e Braçes me një mik në FB

 

“Më mirë të më çajë trapin 4 ditë se të më çajë trapin 4 vjet, ka thënë” – i thotë ai bashkëbiseduesit duke iu referuar me sa kuptohet nga konteksti i bisedës, Edi Ramës

 

Më poshtë është një bisedë në një faqe në FB mes Braçes dhe një personi afër mediave, të cilin nuk po e identifikojmë. Biseda është zhvilluar orët e fundit.

 

G: S’po marr vesh. Seriozisht e ka ai?

Braçe: Po

G: Ke përkrahje të madhe nga të gjithë, po bëjmë ç’është e mundur. Ishalla na dëgjon ai shalëgjati.

Braçe: Nuk dëgjon ai jo! Më mirë të më çajë trapin katër ditë se të më çajë trapin katër vjet – ka thënë

G: Po lexoj tek muri yt. Njërës i paska thënë që je në lista. Do e hajë po s’të vuri ty.

Braçe: S’do ai. Dhe unë nuk kam asnjë mundësi të hyj në Kuvend me forcë. Na mbajti zvarrë deri tani dhe humbëm edhe mundësinë të kandidonim të pavarur.

G: Futu me partinë e Dojakës.

Braçe: Po jo mor vëlla, nuk e ndërroj unë PS-në, pavarësisht Ramës…

G: Po thonë se do të të vënë ministër.

Braçe: Hahahahahahah! Nuk kam pranuar kur më ulërinte Nano në fytyrë që të pranoja.

G: Do të organizoj njerëzit në protestë te shtëpia e Ramës.

 

Pas disa orësh…

G: O gjigant, hë mo ç’u bë? Mua më thonë se do të të fusin ministër, e vërtetë apo jo?

Braçe: Hahahahahaha, i shtati në Fier përhapën llafe lart e poshtë.

G: Po tallen ata?

 

Më shumë, sot në DITA