Çfarë po ndodh në Kërrabë me folklorin?

Me iniciativë të drejtuesve të ansamblit folklorik “Visaret e Kërrabës” në skenën e hapur në natyrë të “Teatrit Kame” në kuadrin e Festës së Bajramit, ditës së parë të çeljes së vitit mësimor është zhvilluar një veprimtari e gjerë folklorike më shtrirje mbarëkombëtare. Grupe dhe ansamble folklorike shqiptare nga Shqipëria, Kosova dhe Maqedonia prezantuan vlera unikale të folklorit shqiptar në prani të qindra shikuesve nga krahina e Kërrabës, Tirana dhe Elbasani. “Jo vetëm në ditët e shënuara dhe shenjtëruara të Bajramit që festohen me madhështi brenda dhe jashtë kufijve dhe nga besimtarë të feve të ndryshme si një festë e të gjithëve, e të pasurve dhe të varfërve, festë ku të gjithë gëzojnë, por edhe në evente të tilla si dita e çeljes së vitit shkollor, por edhe në ditë të tjera si Festa e Verës, Dita e Pavarësisë, dhe ditë të tjera të shënuara të historisë, në njësinë administrative Kërrabë ne i përcjellim me veprimtari të tilla folklorike me qëllim që vlerat tona kulturore unikale t’i përcjellim të pastra tek brezat e rinj”, thotë imam Ilir Selba, njëkohësisht edhe drejtues artistik i ansamblit  “Visaret e Kërrabës”.

Ndërsa inspektori i kulturës pranë Këshillit të Qarkut të Tiranës, Fatmir Veleshnja, lidhur me këtë traditë të veçantë të Kërrabës thotë se: “Nuk është kaq e lehtë të arrish atë vlerësim dhe nivel të organizimit të veprimtarive folklorike që ka në Kërrabë. Është për t’u habitur se si është ruajtur këtu tradita e festës së lashtë pagane të Ditës së Verës e cila në mars të këtij viti shënoi edicionin e 10-të të Festivalit Folklorik Mbarëkombëtar të Ritet Pranverore”.

Në koncertin e fundit folklorik të zhvilluar së fundi në Teatrin Kame në Ibë të Kërrabës, morën pjesë 7 grupe folklorike nga Medvegja në Serbi, nga Malisheva e Kosovës, nga Gramshi, nga Berati, ansamblet e njohura: Visaret e Kërrabës, AlbaFolk nga Kamza, ansambli Shqiponja i Bashkisë së Tiranës dhe Benda i Krujës. Të pranishmit si spektatorë në shkallët e teatrit natyror duartrokitën bartësit e njohur të folklorit, këngëtarin gramshiot Xhevair Bora nga Gramshi, rapsodin Xhemali Berisha nga Presheva dhe këngëtaren dhe interpretuesen virtuoze Paro Zilfaj nga Tepelena. Kjo veprimtari që organizohet për rreth një dekadë nga Ansambli Folklorik “Visaret e Kërrabës” dhe SHKA Tirana, për herë të parë ka patur mbështetjen e Bashkisë dhe këshillit të qarkut të Tiranës. Ekspertë dhe bartës të folklorit nga gjithë hapësira mbarëshqiptare të pranishëm në koncert e kanë vlerësuar këtë veprimtari si një mundësi më shumë për të ruajtjen e trashëgimisë së lashtë kulturore folklorike me synim evidentimin, interpretimin dhe përcjelljen e vlerave të folklorit të pashtershëm autentik shqiptar nëpërmjet nëpërmjet koncerteve të përbashkëta.

Për regjisorin e njohur Gëzim Kame, trashëgimia shpirtërore folklorike shqiptare është një vlerë e pamatshme që ruhet me fanatizëm nga vetë njerëzit e thjeshtë. “Më bën shumë përshtypje se si këto interpretime të vjetra dhe të rralla janë të ruajtura me kujdes e fanatizëm nga vetë njerëzit dhe janë të trashëguar me po kaq kujdes brez pas brezi”, shprehet regjisori Kame.

Ndërsa nënkryetari i Bashkisë së Tiranës, piktori i njohur Abas Hado, vlerësoi si origjinale veshjet e larmishme popullore të interpretuesve në skenë si vlera të rralla të etnografisë për të gjitha hapësirat dhe trevave shqiptare brenda dhe jashtë kufijve të vendit. “Kostumet tradicionale shqiptare janë impresionuese dhe të mahnitshme. Veprimtari të tilla me vlera për ruajtjen e traditave të identitetit kulturor kanë gjetur dhe vazhdimisht do të gjejnë mbështetje të Bashkisë së Tiranës”, u shpreh Hado.

Veprimtaritë folklorike të zhvilluara në Kërrabë të Tiranës kanë shënuar interesim në rritje, si në aspektin e pjesëmarrjes së grupeve folklorike edhe në gjurmimin, zbulimin dhe paraqitjen e vlera unikale folklorike, nga të gjitha trevat e hapësirës mbarëshqiptare. Folkloristi i njohur dhe organizator i disa festivaleve folklorike kombëtare në Gjirokastër, Prof. Ermir Dizdari, në mbyllje të veprimtarisë e vlerëson atë si një koncert krejt të veçantë folklorik që organizohet nga një grup i vogël dashamirësish dhe interpretuesish të folklorit në Tiranë dhe në zonën e Kërrabës si Fatmir Veleshnja, Ilir Selba, Refik Velia, Alfred Braja etj., të cilët duke ftuar grupe dhe bartës të folklorit nga mbarë hapësirat shqiptare, njëkohësisht kanë kontribuar kështu në qarkullimin e këtyre vlerave unikale brenda këtyre hapësirave shqiptare duke i dhënë frymë dhe përjetësi folklorit shqiptar të pasur dhe të larmishëm.

Engjëll SERJANI