Champions League do të njohë sot të kualifikuarit e fundit për fazën me eliminim direkt dhe e gjithë vëmendja është në Stamboll, ku Gallatasaraj dhe Juventus do të luftojnë për një vend. Vendi i parë në Grupin B i përket Real Madridit, i cili luan në Kopenhagë, ku Gallatasaraj u mund dy ndeshje më parë, çka mund t’i kushtojë shtrenjtë sot. Fitorja e munguar në atë takim i hoqi mundësinë për të qenë në vendin e dytë sot, çka do të thotë se Juventusit i mjafton edhe barazimi për t’u kualifikuar. Megjithatë, turqit kanë premtuar se nuk do të dorëzohen lehtë e se do të bëjnë gjithçka për të arritur fitoren e nevojshme. Italianët kanë shkuar në Stamboll duke marrë me vete edhe Andrea Pirlon, por vetëm për të pasur të gjithë grupin të bashkuar, pasi mesfushori veteran nuk mund të luajë, për shkak dëmtimi. Në Grupin A, takimi në “Old Trafford” nuk do të jetë një formalitet, edhe pse Manchester United është kualifikuar. Nëse humbet kundër Shahtjor Donjeck zbret në vendin e dytë dhe pikërisht ky fakt i jep shpresa Bajer Leverkusenit, që luan në San Sebastian, kundër Real Sociedadid të eliminuar. Fitorja kualifikon gjermanët në rast se Shahtjor nuk merr tri pikë në Angli, ndërkohë që suksesi i United bën që Leverkusen të kalojë më tej edhe me një barazim, pasi ka rezultatet më të mira në përballjet direkt me Shahtjorin. E njëjta situatë edhe në Grupin C, ku vendi i parë është pronë e Paris SG, ndërsa Olimpiakos e Benfika luajnë për vendin e dytë. Është e favorizuar skuadra greke, pasi pret Anderlehtin. Fitorja do ta çonte më tej edhe në rast se fiton Benfika, pasi janë me pikë të barabarta, por me përballje direkt pozitive kundër portugezëve. Në Grupin D, luhet vetëm për vendin e parë, por shanset e Manchester City-t janë shumë të vogla. Për të zbritur Bajernin nga vendi i parë, City duhet të fitojë 3-0 në “Allianz Arena”, një sipërmarrje vërtet gjigante duke parë se si ecin bavarezët, duke shtypur çdo skuadër që u ka dalë përpara. Sfida më interesante e këtij grupi është ajo midis Viktoria Plzen e CSKA-së së Moskës, për vendin e tretë. Çekët nuk kanë asnjë pikë, por një fitore minimale kundër rusëve me tri pikë do t’i çonte në Europa League. Në takimin e parë, CSKA ka fituar 3-2, çka e lë të hapur luftën për kompeticionin tjetër evropian.