“Check-up” për të gjithë!

Ministria e Shëndetësisë, pasi ka përgatitur pyetjet për testimin e infermierëve, i ka publikuar më pas në faqen e saj në internet. Edhe pse mjekët kanë filluar një valë protestash, ministria duket se është e vendosur për ta çuar deri në fund planin e saj në lidhje me testimin e bluzave të bardha.

Ndërsa i hedh një sy testit, në mes tyre gjen edhe pyetje që mund të duken qesharake, por më pas, mendohesh: Mos vallë duhen kështu dhe ne që nuk jemi profesionistë nuk i dimë…?! Por kur këtë fakt e denoncojnë mjekët vetë, atëherë këtu ka diçka që nuk shkon.

Njëra prej tyre, e cila kohët e fundit reagon sa herë ka ndonjë lajm të tillë dhe jo vetëm lajm, por edhe kur mendon se ka ndonjë gjë që nuk shkon në sistemin shëndetësor, është Anika Dokle, mjeke gjinekologe në spitalin “Koço Gliozheni”, vajza e deputetit Namik Dokle.

Pasi ka publikuar njërën prej pyetjeve që ajo e quan “Fond gallatash”, Dokle shton se mjekët nuk i tremben testimit, pasi vite të tëra kanë studiuar dhe kanë kaluar në duar me qindra studentë. “Mjekët i tremben marrëzisë së testuesit dhe pyetjeve të tilla”, ka thënë Dokle.

Probleme me bazat ligjore

Më tej, në një shënim të sajin ajo sqaron disa pika që i konsideron problem. “Aktualisht ka një bazë ligjore të qartë për Kurrikulat e Edukimit në Vazhdim. Pa u shfuqizuar kjo bazë ligjore nuk mund të ndërmerren iniciativa të tjera”. Sipas gjinekologes, ka një terr informativ që e shoqëron testimin dhe qëllimin e tij, të cilin ajo e quan pjellë e histerisë kolektive.

“Thellohet hendeku mjek-pacient, një raport ky që ndër dekada, me shumë mund dhe përpjekje është ruajtur. Me qindra jetë njerëzish të shpëtuara, me qindra sëmundje të shëruara. Këtë e dëshmon radha e gjatë e pacientëve nëpër spitale. Pra, nuk është se mungon besimi!! Dështimet në mjekësi janë komplekse dhe varen më së shumti nga politikat menaxheriale (mund të jap shembuj pa fund)”, sqaron mjekja në shënimin e saj.

Pika tjetër ku ajo ndalet është fakti se, sipas saj nxit “hordhinë” e injorantëve që mund të shkruajnë dhe thonë çfarë t’u teket për mjekët, edhe pse në shtëpitë e tyre rrahin gratë, përdhunojnë bijat, therin nënat dhe baballarët, vriten për një vijë uji, vjedhin komshiun, vrasin vajzën pse përshëndet tek gardhi i shtëpisë një djalë… Këta e duan mjekun e mirë? Jo mor shokë jo! Këta duan “varfëri” dhe “destabilitet” si në shtëpitë e tyre”.

“Check-up” për të gjithë!

Ndërsa në këtë paragraf ajo sqaron se, përse, sipas saj, shefat dhe pedagogët janë fajtorë për këtë zullum të madh që e ka emrin shëndetësi. “Është diskriminues dhe i pabarabartë. Përjashton shefat dhe pedagogët, të cilët sido që t’i shohësh janë bashkëfajtorë në këtë “zullumin” e madh me emrin Shëndetësi. Janë ata që ndër vite kanë kaluar nëpër duar studentë, specializantë, mjekë specialistë, doktorantë etj. Janë ata që ndër vite, në cilësinë e

kryetarëve të shoqatave të ndryshme të profesionistëve, kanë kredituar edhe formalisht bluzat e bardha. Pse ta kenë bërë vallë? Duhen testuar dhe ata për praktikat klinike, se ndodh shpesh që shefat “konjukturalë” të bëjnë më shumë gabime mjekësore se mjekët e tjerë. Tjetër. Po mjekët e spitaleve private a do të testohen?”- pyet Dokle.

Po ashtu, sipas gjinekologes: “Mungon transparenca sa i takon faturës financiare. Sa i ka kushtuar një mjeku procesi i kreditimit në 5 vjet dhe për çfarë i ka shërbyer? Sa do të kushtojë testimi?

Më e rëndësishmja, në këndvështrimin tim, ka lëkundur njëherë e përgjithmonë besimin se SHENDETËSINË mund ta drejtojnë njerëz të mençur, me integritet dhe me ndjeshmërinë e një lideri normal, të aftë për të dëgjuar (minimalisht) të gjitha palët e përfshira në proces”. Anika e mbyll mendimin e saj me një ton më të ashpër “ …Dhe ju dritëshkurtërve që mendoni se mjekët tremben prej testimit!! Jo, mor jo! ‘Tremben” prej marrëzisë së testuesit! Shumë shpejt është radha juaj!! “Check-up” për të gjithë!!”

Reagimi i Ministrisë

Është në të drejtën e gjithkujt ta kthejë në qesharake çdo përpjekje serioze që bëhet në Ministrinë e Shëndetësisë

Në këtë situatë, Dita kontaktoi me këshilltarin për Media të Ministrit të Shëndetësisë, Thanas Goga, dhe i kërkoi një sqarim: “Kjo puna e pyetjeve për testimin që do u bëhet infermierëve në vendin tonë është përhapur gjithandej në rrjetet sociale dhe portalet informative. Pyetjet konsiderohen si qesharake, ka këtu edhe mjekë që i kanë quajtur të tilla. Nga ana tjetër, ishin me shumë gabime (ortografike)! Por, ato pyetje ishin te kolona e stresit, alternativat edhe mund të qëndrojnë…. A keni ju një reagim, për këtë valë që është përhapur?”.

Goga nuk nguroi të na sqaronte si më poshtë:

“E para, deri tani ka dalë vetëm fondi i pyetjeve lidhur me procesin e vlerësimit të njohurive dhe aftësive të personelit infermieror në sistemin e kujdesit shëndetësor.

E dyta, çdo pyetje është marrë nga libri “Bazat e Infermierisë” dhe një pjesë e pyetjeve shtesë janë shqipërime nga literatura përkatëse.

E treta, çdo pyetje në këtë fond është hartuar nga komisioni i ngritur për këtë qëllim, i cili përbëhet nga profesionistët e fushës, nga mjekë, Fakulteti i Shkencave Teknike Mjekësore dhe specialistë të tjerë, përfshirë kryeinfermieret.

Është në të drejtën e gjithkujt ta kthejë në qesharake çdo përpjekje serioze që bëhet në Ministrinë e Shëndetësisë, por unë s’gjej asgjë qesharake aty.

E pesta, për sa u përket gabimeve ortografike, sigurisht që në 500 a më shumë pyetje, mund të ketë dhe pasaktësi gramatikore apo ortografike, që s’e hedhin kurrë poshtë punën e përkushtuar të specialistëve që po e përgatisin këtë proces”.