“Përshëndetje Cristiano, jam Max”, kanë qenë fjalët e para të trajnerit të Juventusit, Max Allegri, që gjatë ditëve të fundit ka telefonuar 5 herë fituesin e Topit të Artë, lojtarin e ardhshëm të bardhezinjve, Cristiano Ronaldo.
Lajmin e ka konfirmuar sot e përditshmja italiane “Gazzetta Dello Sport”, që konfirmon se ka patur një bisedë telefonike mes trajnerit dhe lojtarit, për t’i dhënë mirëseardhjen te kampionët e Italisë.
Mësohet se biseda telefonike është bërë të premten e kaluar dhe ndërmjetës në këtë bisedë ka qenë Andrea Agnelli, presidenti i bardhezinjve.
Allegri i ka premtuar një surprizë CR7, por edhe është prezantuar te “nxënësi” i tij i ardhshëm, që nuk është një lojtar dosido.
Biseda është bërë në anglisht dhe ka qenë e ngrohtë mes trajnerit e lojtarit, që e ka falënderuar Allegrin për telefonatën.
Tashmë pritet që dy personazhet të takohen në stërvitje.
a.s/dita