Çmimi i naftës drejt 190 lekë, pse po rritet?

Fundjava që lamë pas shënoi shifra thuajse rekord në çmimin e karburantit, ku në nivel mesatar ishte 187 lekë për litër, e në përqindje rreth 18 për qind më shumë se në fillim të këtij viti.

Nga ana tjetër në bursën ndërkombëtare nafta nga java në javë po shënon ulje të çmimit, tendencë që sipas specialistëve do të jetë dhe për vitin 2016.

Por në tregun tonë po ndodh e kundërta dhe gjasat janë që çmimi të mos ketë një tendencë rënëse.

Një nga arsyet sipas specialistëve është dhe mundësia për t’u mbajtur ky çmim për shkak të sezonit turistik, ku dashje pa dashje pushuesit do të përdorin makinat e tyre.

Një arsye tjetër që sipas specialistëve nuk do të afrojë ulje çmimi të karburantit është dhe shtrenjtimi i dollarit, apo ecuria në tregjet ndërkombëtare.

Por tregjet ndërkombëtare po reflektojnë çmime të tjera të ulëta dhe konsumatori shqiptar në të vërtetë pret që kjo të reflektohet dhe në tregun e brendshëm.

Në tregjet ndërkombëtare, nafta referencë europiane e mbylli të premten me rreth 57 dollarë për fuçi, larg niveleve rekord prej 120 dollarë për fuci, që arriti në janar 2014. Herën e fundit, që u rrit çmimi i naftës në vend (në fillim të majit 2015), nafta europiane kuotohej në bursa me 65-66 usd/fuçi dhe dollari në rreth 127 lekë.

E që prej asaj dite çmimi i karburantit në vendin tonë ka shënuar vetëm rritje. Në tregun tonë reflektimi i rritjes së çmimit të naftës në bursën ndërkombëtare është i mënjehershëm, ndërsa kur ajo pëson ulje nuk reflektohet lehtë.

Grosistët e naftës këtë e lidhin me faktin e taksimit të lartë të saj dhe faktit të rezervave që duhettë sigurohen për tre muaj.

Pra sipas tyre mungesa e bursës dhe listimit në të, bën që çmimi të mos reflektohet në kohë reale.

Me një logjikë të tillë i bie që kjo rënie në bursë tani, të reflektohet pas mbylljes së sezonit turistik në vendin tonë dhe ne duhet të qarkullojmë me këtë çmim që ka kapur shifra rekort

Nafta në bursat ndërkombëtare

Nafta në bursat ndërkombëtare iu afrua territorit të dobët, pasi vuajti rënien më të madhe ditore në pesë muaj, teksa Greqia hodhi poshtë termat e paketës shpëtuese dhe Irani iu afrua marrëveshjes nukleare me fuqitë perëndimore.

Nafta referencë europiane ICE Brent për dorëzimet e gushtit ra 6.3% në nisje të javës që lamë pas, duke shënuar rënien më të fortë ditore që nga 4 shkurti.

Treguesi ra me $3.78 në $56.54 për fuçi. Treguesi referencë i naftës amerikane Nymex August West Texas Intermediate regjistroi një rënie prej 7.7%, duke zbritur me $4.40 për t’u mbyllur në $52.53. “Çmimet e naftës kanë mbetur të dobëta, duke qenë nën presion si nga situata e sigurt e krijuar me Greqinë ashtu dhe programit bërthamor me Iranin,” tha Paul Horsnell, në Standard Chartered.

Shqetësimet rreth kërkesës së dobët europiane për naftë, në rast se kriza në Greqi do të ketë amplifikime të gjera ekonomike dhe një marrëveshje me Iranin që mund të shtojë furnizimin me naftë, edhe pse në sasi të vogla, po ndikojnë në çmimin e naftës.