Ç’po ndodh brenda çadrave me grevistë që kërkojnë punë…

Edhe dje vazhdoi greva e urisë e të larguarve nga administrata, në çadrat e vendosura para Piramidës. Në ditën e gjashtë 4 grevistë janë larguar përfundimisht, duke hequr dorë nga misioni i nisur. Mësohet se në çadrat ku po zhvillohet greva e urisë kanë mbetur 13 persona. Përfundimisht nga greva janë larguar Mimoza Boçari, Mehmet Cemurati, Gladiola Bardhoshi e Ludovik Berisha. Ndërsa në mëngjesin e djeshëm grevisti Tonin Kolthi është ndjerë keq dhe ka lënë ambientet e grevës, pasi ka pasur shqetësime në stomak, çka sollën edhe shoqërimin e tij për në spital. Rreth mesditës, është dërguar në spital edhe kryetarja e shoqatës së të larguarve nga administrata, Nertila Qafzezi, për shkak të luhatjeve të tensionit. Të dy këta grevistë pasi morën ndihmën shëndetësore në QSUT u rikthyen në grevë. Dje kanë shkuar për mbështetje sërish deputetë të PD-së, por ata ndryshe nga ditët e tjera nuk kanë hyrë në çadra, pasi edhe gjendja e grevistëve është e rëndë.

Jashtë çadrave

Piku i ditës. Te piramida qëndrojnë 35-40 vetë. Janë familjarët e grevistëve që protestojnë për heqjen nga puna. Një pesë minutësh, vëzhgoja nga larg qytetarët që rrinin në mes të vapës. I avitem turmës që i bënin roje grevistëve. Hapësira e parkut ku janë ngritur çadrat është rrethuar me shiritin që të pamundëson futjen te çadrat. “Çfarë do të  fitojnë këta?”, dëgjoj tek i thotë një grua me syze në kokë shoqes së vet, të cilat duket se kanë ardhur vetëm “për të bërë sehir’. “Asgjë nuk do të fitojnë”, i kthehet shoqja me zë të ulët dhe ashtu të kapura për krahu humbasin mes dhjetëra qytetarëve, që pjesa më e madhe e tyre janë të afërm të grevistëve. Nuk janë të paktë as kameramanët që presin prononcimet e grevistëve ose të përfaqësuesve të tyre. Ndërsa gazetarët nuk duken rrotull. Të lodhur nga pritja janë larguar të freskohen të kafja e 2 Kullave. Vijnë me vrap vetëm kur të ketë deklaratë ose ndonjë vizitor VIP. Ndërsa mes gumëzhimës së madhe të qytetarëve dëgjoj batuta pafund. Njëri që ankohet se po i gërryente stomaku për bukë. Shante në dialekt pa e ditur se kënd. “…pse s’vjen ndonjë zgarë këtu që të hanim ndonjë qofte. Me këtë rast t’i jepnim edhe atyre ( e kishte fjalën për grevistët)? Dhe qesh ai dhe tre barkmëdhenj që rrinin në këmbë pak më tutje. Të tjerë qeshin për qejfin e tyre. Ngjanin të lumtur. Nuk fliste njeri për shëndetin e grevistëve. Kishte dhe prej atyre që bënin dhe ndonjë selfi në drejtim të çadrave të mbyllura në mënyrë hermetike nga qytetarët, media… kanë frikë se mos gazetarët zhbirilojnë në lidhje me grevistët. Ulem tek bordura ngjitur me qytetarët, një pjesë e të cilëve rrinë pa e ditur pse. Të gjithë të këputur nga vapa, kequshqyerja… Ngjitur kam një të moshuar rreth të 70-ve. Kishte zgurdulluar sytë dhe po shihte prej 10 minutash çdo veprim të tre barkmëdhenjve. “Xhaxhi të shqetëson ndonjë gjë pse na ke  ngulur sytë”, i thotë njëri prej tyre dhe i buzëqesh. “Kot po të shihja”. Ndërsa unë sa ul kokën për të nxjerrë lapsin nga çanta për të shkruar këtë detaj, para çehres më vjen një grua e djersitur nga vapa më thotë: “Këta qelbësirat ç’na dalin në grevë? Po ne, po ne që kemi 23 vjet që nuk hamë për fajin e këtyre”. E kishte fjalën për grevistët. Mendonte se ishin politikanët ata që ishin në çadra. Foli një copë herë pa u ndalur dhe në fund tha: “të gjithë qelbanikë e maskarenj janë” dhe iku. Iku nga ai cep me një nënqeshje dhe doli në një pozicion disi më të fshehtë. Vazhdoi të shihte. Para Kryeministrisë rrugës për punë një grua që po shihte nga larg çadrat e ngritura më ndalon “Basha fitoi para tre vitesh. Në gusht më larguan nga puna. E tani ç’të bëjmë, të ngremë një çadër tjetër, t’i mbledh ata të bashkisë unë?” Ishte bërë pikë e vrer.

Ja kush e nisi grevën e urisë prej 21 majit:

Nertila Qafzezi

Artan Murrizi

Olgerta Shkurti

Vera Picaku

Hastrit Likaj

Agron Dervishi

Prek Vukaj

Edmond Idrizi

Sokol Ukperaj

Mehmet Cemorati

Leonard Strazimiri

Tonin Kolthi

Mahir Reçi

Petrit Fejzullai

Gladiola Bardhoshi

Ludovik Berisha

Mimoza Bocari

Nga 17 që janë në grevë , 4 prej tyre janë larguar përfundimisht

Mehmet Cemurati

Gladiola Bardhoshi

Ludovik Berisha

Mimoza Bocari

Për “bukën e gojës” edhe ish-kontrollori i poliklinikave me vilë 5-katëshe

 Në mesin e grevistëve janë disa ish-nëpunës, por jo dosido, por nga ata që deri dje kanë pasur poste të tilla që u kanë lejuar të bëjnë para, para që u kanë lejuar të ndërtojnë madje, në toka ku nuk lejohet dhe ku duhen po shumë para që të ndërtohet. Njerëz që kur u vunë në postet që kishin nuk pyetën se vendin e kujt zunë, pasi ishin “lodhur” shumë për ardhjen e qeverisë që ua siguroi atë punë. E madje bashkë me të drejtën për të punësuar të tjerë. Dhe, gjithashtu nuk e pyetën veten a ishin të kualifikuar për atë punë pasi tashmë kishte ardhur dita e tyre. Dhe janë pikërisht këta të fundit protagonistët e grevës pranë kryeministrisë që bërtasin me të madhe para mikrofonave duke hequr edhe të drejtën e dyshimit nëse kjo grevë është për një kauzë të drejtë, kauzë e atyre profesionistëve që janë hequr padrejtësisht nga puna, edhe pse po padrejtësisht ndoshta i kishin zënë këto vende. E këtu më vjen në ndihmë një shembull, një emër: Petrit Fejzullai. Personi në fjalë prej vitesh ka punuar në drejtorinë e ISKSH, me rimbursimin e ilaçeve, dhe kohët e fundit dhe përgjegjës për kontrollin e poliklinikave. Poste me përgjegjësi, por ai ka qenë aq i kualifikuar në punën e tij sa paga e shtetit për shërbimet në interes të qytetarëve, i ka lejuar të ndërtojë një ndërtesë pesë katëshe, katet e para mund të shfrytëzohen nga bizneset. Ndërtesa është pranë sanatoriumit. Dhe është pikërisht Fejzullai, që si një Petrit i vërtetë merr në dorë fatet e bashkëvuajtësve të tij, duke ngritur zërin, sepse e kanë hequr nga puna padrejtësisht, ndërkohë që ai ndershmërisht i ka shërbyer qytetarëve, dhe ka vënë interesin e tyre para çdo gjëje. Njësoj siç po bën dhe me grevistët duke u bërë zëdhënësi tyre, për një kauzë në emër të tij.