Cutillo: Akuzat e opozitës për drejtësinë, të pabazuara

Përplasjet dhe akuzat politike, ambasadori italian në Tiranë Alberto Cutillo i sheh normale në një sistem demokratik, por ai kërkon më shumë solidaritet mes palëve në raport me Europën.

Thotë se i gjen të pabazuara akuzat e opozitës se për vënien e sistemit të ri të drejtësisë në dorën e mazhorancës, por ngre si shqetësim bllokimin e Gjykatës Kushtetuese.

“Besoj se reforma e drejtësisë që po bën Shqipëria nuk ka precedent në historinë europiane, ndoshta s’ka askund. Është reformë e thellë dhe vendimtare, por që has në vështirësi në fazën aktuale fillestare. Më shqetëson më shumë fakti i akuzave se mazhoranca po kontrollon drejtësinë, që nuk më rezulton se i përket realitetit, por ajo që më shqetëson është fakti i mos-kompletimit të Gjykatës Kushtetuese, që janë të paralizuar për një periudhe kohe deri në zgjedhjen e kandidateve të ri, që kalojnë në vetting. Por natyrshëm ky është çmim që duhet paguar për një reformë kaq të thellë”.

I pyetur për çështjen “Tahiri”, ambasadori italian përgjigjet shkurt: “Di që në Katania është një proces që po ecën përpara, që nuk është direkt për ministrin Tahiri, por di atë që dini ju”.

Nga Shkodra, kryediplomati italian shpreh besim për çeljen e negociatave duke theksuar punën e bërë në reformën në drejtësi.

Ambasadori italian komenton edhe qeverinë e re italiane duke theksuar se nuk sheh arsye për ndryshimin e marrëdhënieve mes Tiranës dhe Romës.

a.s/dita