Ambasadori i Italisë në Shqipëri, Alberto Cutillo, e cilëson klimën e të bërit biznes në Shqipëri si të “infektuar” nga korrupsioni, dhe për këtë arsye kompanitë italiane kanë shfaqur shqetësim ndaj fenomenit.
Sipas Alberto Cutillo, sipërmarrja private është ajo e cila haset më së shumti me fenomenin e korrupsionit.
“Korrupsioni është problem që dëmton qytetarët dhe bizneset në të gjitha vendet, prandaj qeveritë përfshi edhe atë shqiptare duhet të angazhohen për ta luftuar. Sipërmarrësit italianë janë shumë të interesuar për Shqipërinë dhe këtë e dëshmon edhe takimi i shkurtit ku rreth 200 biznese italiane shfaqën interesin për investime, por ata dëshirojnë që qeveria juaj ta luftojë në mënyrë të vendosur korrupsionin. Ka sipërmarrës italianë që janë shqetësuar prej fenomenit, dhe në rastet kur ka pasur thyerje të ligjit i janë drejtuar gjykatave”, deklaroi kryediplomati italian në Tiranë.
Ambasadori italian komentoi edhe rekomandimin për hapjen e negociatave me Bashkimin Europian.
“Rekomandimi i 18 prillit është një arsye e favorshme për të qenë optimist. Qytetarët shqiptarë shpresojnë që ata që kryejnë krime të gjykohen, dhe kur gjenden fajtorë të dënohen. Peshq të vegjël apo të mëdhenj, ata që thyejnë ligjin duhet të bëhen përgjegjës. Shqipëria po përpiqet të demonstrojë një nivel të funksionimit më të mirë të drejtësisë dhe këtë BE e ka vlerësuar, dhe shpresojmë që të kthehet në një argument për çeljen e negociatave”, thotë Cutillo.
Komentet e ambasadorit italian vijnë nga Universiteti i Gjirokastrës, ku zhvilloi një leksion të hapur lidhur me sfidat e integrimit.
s.a/dita