Dade: PS pro rezolutës çame, s’ka probleme brenda koalicionit opozitar

Në një intervistë për “News24”, deputetja e Partisë Socialiste, Arta Dade, thekson se PS-ja është në favor të zgjidhjes së çështjes çame dhe do të mbështesë rezolutën e PDIU-së e cila ka mbërritur tashmë në komisionin e jashtëm parlamentar. Anëtarja e kryesisë së PS-së konsideron se koalicioni opozitar ka funksionuar siç duhet, duke hedhur poshtë çdo aludim për mosmarrëveshje me PBDNJ-në, pas mosdakordësisë me kryetarin Dule për votimin e kreut të ILDKP-së në Kuvend. Dade foli edhe për përgatitjen e listave të deputetëve, duke nënvizuar se përgatitja e tyre do të bëhet me mendimin e bazës.

Pak ditë me parë u komisionet parlamentare morën në shqyrtim rezolutën çame, pro deri në këto momente PS ka pasur një lloj hezitim, cili pritet të jetë qëndrimi i selisë rozë ?
Partia Socialiste s’ka asnjë hezitim lidhur me problematiken që ka komuniteti çam, përkundrazi ne e kemi ngritur këtë çështje edhe në takime me autoritetet e larta greke, në takime të ndryshme. Ne kërkojmë që këto çështje të zgjidhet në bazë edhe të konventave ndërkombëtare. Do ta dëmtonte zgjidhjen e çështjes çame, fakti që një numër aktorësh politik, kërkojnë të nxjerrin përfitime politike dhe kjo çështje dhe ta përdorin për efekte elektorale. Rezoluta ka ardhur në komisionin e jashtëm dhe po punohet për rezolutën, në kohën e duhur do kemi qëndrimin tonë, dhe do të jetë në favor të zgjidhjes së çështjes çame. Pra zgjidhje reale e problematikes që ka komuniteti çam.

Po përsa i përket diskutimeve që kanë të bëjnë me hartimin e listave të deputetëve , një numër i madh deputetësh të partisë socialiste kanë deklaruar se, duhet të ketë një përzgjedhje që të marrë parasysh edhe mendimin e bazës dhe strukturave të partisë. Cili është qëndrimi juaj?
Këtu nuk kemi të bëjmë më çfarë mendon secili prej nesh, Partia Socialiste është serioze dhe ka statutin e saj dhe rregulla që janë respektuar. Ne e kemi një praktikë të konsoliduar që merret mendimi i partisë, në numrin e kandidatëve që i paraqitet strukturave të tjera, dhe në asnjë rast , kjo përzgjedhje s”mund të anashkalojë strukturat e bazës së partisë. Sepse puna nuk është individuale por e përbashkët dhe e strukturave. Nuk gjykoj se kemi pasur ndonjë problem, sigurisht është evidentuar ndonjë pakënaqësi në të shkuarën , por do i eliminojmë. Përveç asaj duhet të ketë kritere profesionale , duhen specialistë përveç figurave të spikatura publike, përveç figurave që janë të votuara nga elektorati dhe të respektuar përtej elektoratit tonë.

Po përsa i përket koalicioneve si duhet të jenë ato , ka mundësi bashkëpunimi me LSI, FRD ose me AK. Dhe mund të quhet si një krisje e koalicionit opozitar duke qenë se zoti Dule bashkoi votën me mazhorancën për zgjedhjen e kreut të ri të ILDKP-së?
Ne kemi treguar se jemi parti e koalicioneve , jo vetëm në opozitë, dhe koalicionet kanë funksionuar kur kemi qeverisur vendin. Dimë të respektojmë rregullat dhe partitë e tjera. Koalicionet ngrihen në baza programore dhe ideore, por padyshim të ngrihen edhe duke u bazuar në norma etiko-morale . Koalicioni opozitar ka funksionuar pavarësisht se ka pasur ndonjë votë ndryshe nga partia socialiste . Vota e Dules për ILDKP-në s”mund të jetë interpretuar si diçka negative sepse s”kemi pasur një diskutim paraprak për mënyrën e votimin . Në nivel lokal koalicionet funksionojnë dhe në veçanti qarku i Gjirokastrës , ku në drejtojmë qarkun edhe me PBDNJ-në , pra nuk ka pse krijohet ideja se ka probleme në koalicion.