Asnjë lojtar i Juventusit nuk e ka më të sigurt vendin në klubin bardhezi pas eliminimit nga Champions League. Skuadra e Antonio Kontes është në prag të një revolucioni, ku më të rrezikuarit janë ata që kanë treguar formë të dobët deri në këtë pjesë të sezonit dhe më shumë nga të gjithë rrezikojnë Markizio, Vuçiniç, Xhovinko e Kualjarela. Vidal dhe Pogba janë të vetmit që, të paktën deri tani, cilësohen si të paprekshëm dhe si elementët bazë mbi të cilët do të ndërtohet skuadra e re. Megjithatë, mbetet për t’u parë se sa mund t’u rezistojë klubi tentativa për t’ia marrë dy lojtarët, të cilët kanë admirues të shumtë. Shumë shpejt do të rinisin bisedimet me agjentin e francezit për rinovimin e kontratës. Ajo do të jetë me përmirësim të kushteve ekonomike, ndaj bardhezinjtë janë të detyruar të shesin dhe Markizio është lojtari që ka më tepër klube që i janë vënë pas, brenda e jashtë Italisë. Tre të tjerët rrezikojnë sepse sulmi ka shumë lojtarë dhe Kontes nuk i intereson mbipopullimi. Llorente e Tevez janë dy titullarët, kështu që për të tjerët ka pak vend, sidomos pas eliminimit nga Champions, edhe pse skuadra do të luajë në Europa League, me synimin për të dalë patjetër në finalen që luhet në stadiumin e saj. Ndërkaq, te kampionët e Italisë nuk është shuar ende zemërimi për humbjen e pësuar nga Gallatasaraj. Reshjet e shumta ranë për të dyja skuadrat, por pamjet televizive treguan qartë që pjesa nga sulmonte Juventus në pjesën e dytë ishte shumë më e dëmtuar se pjesa tjetër e fushës. Dyshohet për prishje të qëllimtë para rifillimit të ndeshjes, pasi turqit do të sulmonin më pak se 15 minuta në atë anë, ndërsa pas pushimit aty duhej të punonte Juventus. Dyshim për akt të qëllimshëm forcohet nga ngjarja e vjetshme me CFR Kluzh, trajneri i së cilës u ankua se në gjysmëfushën ku sulmonin rumunët nuk ishte hequr uji i shiut në pushim, ndryshe nga ana tjetër e saj.