Kur Matt Damon dhe Ben Affleck fituan një çmim “Oscar” për filmin “Good Will Hunting” në vitin 1997, dy shokët e fëmijërisë së rritur në Boston u përfshinë në thashethemet që përflisnin një lidhje homoseksuale midis tyre.
Zërat u shtuan edhe më shumë, pasi asnjëri prej dy aktorëve nuk denjoi ndonjëherë të komentonte rreth tyre.
Megjithatë, pas 15 vitesh pritje, të martën u publikua qëndrimi i parë i Damon, rreth homoseksualitetit të tij të përfolur, në një intervistë të cilën ai dha për revistën “Playboy”.
“Nuk i përgënjeshtrova kurrë ato zëra sepse u ofendova, por nuk doja që të ofendoja miqtë e mi homoseksualë, duke thënë se të jesh i tillë është diçka e keqe apo ndonjë lloj sëmundje. Në këtë kuptim, jam ndierë në një pozitë tepër të çuditshme”, deklaroi aktori 42-vjeçar, i martuar, baba i tre fëmijëve.
“Mendoj se kohët e fundit, ka pasur shembuj me të vërtetë pozitivë në këtë drejtim, me shumë persona të famshëm që kanë dalë dhe kanë mbrojtur homoseksualitetin e tyre. Ajo që bëri Anderson Cooper dhe Ellen DeGeneres ishte e fuqishme dhe tepër kurajoze, ashtu siç ka bërë më parë Elton John”, shtoi ylli i “Bourne Identity”.