Ja “lajmi” mbi përplasjen Ndreu – Noka

Ndër scoop-et e djeshme të disa të përditshmeve, ishte dhe një përplasje me fjalë e dy deputetëve të Komisionit të Sigurisë,  Pjerin Ndreut e Flamur Nokës, që përpak sa nuk u kacafytën dhe fizikisht, por e trajuar me një përmasë gjasme investiguese, ku ajo çfarë ishte zbuluar, ishte….lloji i fjalëve. “Ja çfarë I thanë njëri-tjetrin…”  ose  “Zbulohen fyerjet….” , ishin pak a shumë  ndoca tituj ku veçohej etiketimi ‘idiot’ si dhe përbetimi ‘të zhduk”. Lajmi pra, ishte gatuar në një mënyrë të atillë, për t`u servirur si diçka e paparë, e për të cilin gazetarët kishin derdhur djersë për të arritur tek e vërteta e madhe e tronditëse njëherësh. Zbulohen fyerjet! Pra, ishte informuar publiku mbi faktin se ata janë fyer ndërsjelltazi, ama lloji i fyerjeve kishte mbetur pa zbardhur duke lënë njerëzinë në ankth.                                          

Po a ka ndonjë lajm në meselenë e dy deputetëve?! Po ka, e që është fakti se ata, ndërsa këmbenin  sharrje e kërcënime, ruajtën një standart etik gjithsesi, duke mbajtur larg familjen nga përplasja mes vedi. Pra, mungoi “libri i shtëpisë”. Fletët nuk u hapën. Lajmi tjetër është përlot trishtim dhe që ka të bëjë me gazetarinë: gazetarët e ngarkuar për të ndjekur komisionet kuvendore e punimet e Parlamentit, e që zakonisht i përkasin redaksisë së Politikës, duhet të bëjnë tashmë dhe gazetarin e Kronikës; pra, që ndjek çështjet e Rendit. Sigurisht, është dhe një aspekt tjetër trishtues: ai mbi rënien e dukshme të cilësisë së jetës parlamentare  nga Legjislatura në Legjislaturë, duke u “ndyrë” me banalitete të çdo lloji por dhe me persona tejet banalë, që paçka shumë moderniteteve që ka sjellë koha,  është ku e ku  më i trishtë se ai i pari (pluralist), me Adil Çarçanin në krye. Sa për kujtesë e nostalgji, pa ndonjë lidhje me qasjen e  mësipërme: “Na mo ti…bëre dekllaratën, rri të dëgjosh përgjigjen …” (Adil Çarçani drejtuar Neritan Cekës).  E.H.      

*************

Sherr mes Nokës e Pjerin Ndreut, ndërhyn Garda për ndarje 

Debatet në mbledhjen e Komisionit të Sigurisë janë pasuar nga fyerje dhe konflikt fizik mes ish- Ministrit të Brendshëm, Flamur Noka dhe deputetit socialist, Pjerin Ndreu. Konflikti ka degjeneruar në atë pikë sa është dashur ndërhyrja e Gardës.

Fillimisht dy deputetët e kanë nisur sherrin gjatë zhvillimit të mbledhjes.
Noka: Po ik se s’merrem me ty unë, nuk merr vesh ti, po flas me atë. Po ik o qërohu se s’merrem me plehra unë, po flas me atë.
Ndreu: O ti qurravec, mos fol me mua me atë gjuhë
Braho: Po të vazhdojë kështu unë jam i detyruar ta ndërpres.
Noka: Me kë je tu fol ti, do të zhduk halabak
Ndreu: Ik ore injorant
Por deputetët Ndreu dhe Noka nuk e lanë me aq. Ata tentuan të konfliktoheshin dhe fizikisht, madje duke përdorur dhe fjalë kërcënuese ndaj njëri-tjetrit. Për të shuar konfliktin ka ndërhyrë Garda, deputetë dhe gazetarë.

Debate në Komisionin e Sigurisë, Noka akuzon Tahirin për terr informativ

Mbledhja e sotme e Komisionit të Sigurisë Kombëtare është shoqëruar me debate të ashpra mes deputetëve të opozitës dhe ministrit të Brendshëm. Ky i fundit ka raportuar në komision lidhur me vrasjen e vëllezërve Çollaku nga pala greke. 

“Policia kufitar u njoftua mbi ngjarjen në orën 00:30 minuta. Policia greke kishte tërhequr trupat pas ekspertimit. Kjo çështje mbi vrasjen e 2 vëllezërve është jashtë juridiksionit të Shqipërisë, por ne presim që çështja të zbardhet”. “Dy vëllezërit Çollaku qëlluan me armë ndaj policisë greke dhe ata iu kundërpërgjigjën. Ne nuk mund ta këqyrim vendin e ngjarjes, sepse është jashtë juridiksionit tonë. Ministria e Brendshme nuk bën ekspertizë mjeko-ligjore pasi kjo është kompetencë e organeve të tjera. Garantoj, që shteti shqiptar ka ushtruar të gjitha kompetencat për ngjarjen në kufi me Greqinë”.
Tahiri kërkoi që çështja të mos përdoret për qëllime politike, por deputeti demokrat, Flamur Noka, akuzoi ministrin për terr informativ.
“Ngjarja ka një terr informative. Duam të vërtetën e ngjarjes në kufirin me Greqinë ku u vranë dy vëllezërit Çollaku. Policia jonë dha të njëjtin version të ngjarjes në kufi, si policia greke”, tha ai, ndërsa ministri Tahiri e hodhi poshtë një pretendim të tillë.

Ndërsa, deputeti demokrat Astrit Patozi tha se Tahiri duhet të mendojë dorëheqjen nga posti i ministrit.

“Tahiri nuk ka kohë të vijë në komision, pasi është kthyer në një “Star mediash”. A e keni menduar dorëheqjen nga posti apo shkarkimin nga detyra e ministrit?” iu drejtua Patozi ministrit.
Më tej, deputetët diskutuan edhe rreth situatës së  rendit në vend dhe në veçanti shpërthimeve të tritolit të regjistruara ditët e fundit.

Ministri Tahiri tha se Shërbimi Informativ Shtetëror nuk ka dhënë  asnjë informacion në lidhje me këto çështje.

“Është përhapur një fole kriminaliteti, që ka qenë e mbyllur deri dje”, tha Tahiri, duke shtuar se ka një rritje të pajustifikuar të kriminalitetit në fushën e eksplozivit.