Deklarata e papritur e Papës: Më kanë mbetur edhe 2-3 vjet jetë (FOTO)

Papa Françesku ka bërë një deklaratë shokuese rreth vdekjes së tij dhe atë që ai nuk e quan vdekje por mundësi e një takimi të afërt me krijuesin e tij, Zotin.

– Më ka mbetur 2 ose 3 vjet jetë, – mësohet të ketë thënë Papa, në një konferencë për shtyp me gazetarët, në avionin me të cilin kthehej nga vizita në Korenë e Jugut. Një deklaratë nga ajri, por nga ato me shumë këmbë në tokë!

Për herë të parë Papa Francesku ka folur publikisht për një problem shëndetësor të tij, i cili mund t’a detyrojë atë, të ndjek shembullin e paraardhësit Ratzinger, i cili la papatin për arsye shëndetësore vitin që shkoi, duke përshpejtuar zgjedhjen e një pape të ri. ( Për Ratzinger “La Stampa” pretendoi se ishte detyruar të jepte dorëheqjen, por Benedikti i XVI, reagoi me një letër se ky ishte një spekulim dhe se ai la papatin vetëm pse ishte shumë I vjetër në moshë për të mbajtur detyrën e tij).

Papa Francesku, nuk ka dhënë detaje, por ka treguar se ka të bëje me një “çështje nervash” pa dhënë sqarime të mëtejshme për sëmundjen, e cila nuk i jep më shumë se 3 vite kohë jete, sipas tij.

“- E shikoj këtë, si një bujari të zotit. Përpiqem të reflektoj për gjithë mëkatet e mia, për gabimet, pa u krekosur sikur jam krenar. Dhe e dini pse? Sepse unë e di që do të zgjas pak”,-tha ai për gazetarët në bordin e avionit.

Menjëherë pas kësaj deklarate, zemërndriçuar, ai shtoi:” Dy ose tre vjet dhe pastaj do të pushoj në shtëpinë e zotit”.

Papa Françesku është 77 vjeç, dhe ai është Papa më vital në vite. Energjitë e tij janë edhe çelësi i popullaritetit që ai e fitoi menjëherë sapo mori drejtimin e Vatikanit.

Në kohen kur ai ishte kandidat për tu zgjedhur Papë, reporterët zbuluan se ai kish vetëm një veshkë. Njërën, e ka hequr për shkak të një infeksioni kur ishte adoleshent ne Argjentinë.

Por ai nuk e lidh sëmundjen aktuale me veshkën e munguar.

-“Një nga arsyet e neurozës sot, duhet të jetë fakti që jam natyrë shtëpiaku”. Ai kujtoi për gazetarët, se hera e fundit që ai ka bërë një pushim jashtë Argjentine, ka qenë me komunitetin e jezuitëve, në vitin 1975. ( Papa edhe në Vatikan jeton në një apartament tepër modest. Ai ka refuzuar të gjithë privilegjet duke bërë një jetë të thjeshtë, gati shumë pranë të varfërve).

Papa Francesko do të mbërrij në Tiranë në 21 shtator të këtij viti. Ai është Papa i dytë pas Vojtilës, që do të prek tokën shqiptare. Në Tiranë kanë nisur prej disa kohësh pregatitjet për vizitën e Papa Franceskos. Përgjatë gjithë bulevardit dhe në disa institucione të rëndësishme po kryhen punime si dhe pritet të ketë ndryshime edhe në aeroportin Nënë Tereza.

Një pjesë e axhendës së Vatikanit është publikuar, por në kushtet e deklaratës së fundit të Papa Franceskut, duhet të lutemi për të dhe t’i urojmë shëndet si dhe të pranojmë që jemi me fat për një vizitë të tillë, aq më tepër kur koha në rastin e këtij Pape, është vërtet flori!

Përktheu dhe përgatiti Mira Kazhani.

Marrë nga Daily Mail.