Dekriminalizimi? Ja ç’thonë Fatos Klosi dhe Myslim Pasha

Po flitet kaq shumë për dekriminalizimin e parlamentit shqiptar, sa që kjo është bërë tema e ditës dhe epiqendra e politikës shqiptare. Nuk do të merrem në këtë koment me rastet konkrete që kërkon opozita dhe me ato që justifikohet mazhoranca. Dekriminilazimi i politikës shqiptare për mendimin tim është shumë më i thjeshtë nga ç’shkruhet dhe trumbetohet. Krimet janë konkrete, njerëzit që akuzohen për këto krime janë konkretë, atëherë pse t’i biem nga Kina për dekriminalizimin e politikës shqiptare?

Nëse ka një dëshirë të sinqertë për dekimininalizimin, atëherë le të fillojmë dhe të veprojmë sinqerisht me dekriminilazimin pa u ndikuar nga politika e ditës.

Dje isha në një tavolinë duke pirë kafe me dy emra të njohur: Fatos Klosin, ish-shefin e Shërbimit Informativ Kombëtar dhe Myslim Pashën, që ndryshe njihet si Koloneli i Detit. Dhe, pavarësisht se takimi ishte midis miqsh, biseda në shumicën e kohës u vërtit rreth këtyre temave të ditës, ku në epiqendër ishte dekriminalizimi i politikës.

Fatos Klosi, me atë mënyrën tolerante tha:

– Po, duhet të dekriminalizohet politika. Por nga kush? Fillimisht duhet të zbulojmë kriminelët, ata që kanë bërë krime, t’ua vërtetojmë dhe t’i çojmë para drejtësisë. Është një hipokrizi të flasësh për krimet e diktaturës komuniste, autorët e së cilës në shumicën e rasteve nuk jetojnë më ose kanë dalë përfundimisht nga politika. E rëndësishme është që të dekriminalizohet politika aktuale, nëse duam të shikojmë nga e ardhmja… Dhe mendoj se më e rëndësishme është që të dekriminalizohet politika nga krimet që janë bërë pas viteve ’90 dhe që janë aq të dukshme si krime nga autorë që vazhdojnë të jenë aktivë në politikë…

U hodh Myslimi dhe në thelb tha thuajse të njëjtën gjë, por me një natyrë më poetike, siç e ka në natyrë. E, Myslimi tha:

– Kjo përralla me dekriminalizimin që kërkon opozita aktuale më kujton atë përrallën me ujkun dhe gjurmët. Ujku është në parlament, ka një emër konkret që quhet Sali Berisha. Ju të gazetës ‘DITA’ bëni shumë mirë që e denonconi përditë, por kjo nuk mjafton. Kur bëhet një krim, duhet ndëshkuar. E, ky njeri me emrin Sali Berisha ka bërë një sërë krimesh të përbindshme: Ai është autori i 21 janarit ku u vranë 4 njerëz të pafajshëm, ai është autori i Gërdecit, ku humbën jetën 26 njerëz, ai shiti detin dhe trojet shqiptare, pa folur për 97-n dhe 98-n e për sa e sa ngjarje të tjera tragjike. Prandaj më lejoni t’u them deputetëve: Ndëshkoni kryekriminelin që e kini midis jush, që t’u besojmë se e kini seriozisht këtë dekriminalizimin!

Ja kështu! Kjo çështja e dekriminalizimit, sa e komplikuar duket në pamje të parë, aq e thjeshtë është në të vërtetë. Unë iu referova një bisede midis dy miqsh që bëra dje pasdite në kafene, ndërkohë që kam dhe deklaratat e dy figurave të Partisë Socialiste, Taulant Ballës dhe Valentina Leskajt. Dhe në thelb, si Balla dhe Leskaj deklaruan dje pak a shumë të njtën gjë: Dekriminalizimi duhet të fillojë nga Sali Berisha!