Demokracia sipas “të fortëve” (II)/ Një arkë me peshk dhe anijet që lundrojnë në detin e korrupsionit!

Jorgo Mandili

 (Vijon nga numri i kaluar)

Më lart folëm se ç’janë të fortët? Tani do shohim se si të fortët lindën nga kjo teori e cila i realizoi synimet e saj përmes ANARKISË dhe degjenerimit moral të shoqërisë duke goditur arsimin dhe drejtësinë për të mbjellë PADITURI DHE PADREJTËSI. Ç’ të mbjellësh do korrësh” – thotë një fjalë e urtë. Ne korrëm një marrëzi, unikale në llojin e vet. Marrëzi shqiptare! Marrëzi si produkt i injorancës dhe anarkisë! Një diktaturë tjetër kjo më e rrezikshme se proletariatit,se ishte e pakontrolluar. Me një strategji të qartë e të mirëmenduar me parullën ku të gjithë të ishin fajtorë të mos dallohej “gruri nga egjwra”, të mos merrte vesh i pari të dytin. Përmes shkatërrimit iu hap rruga anarkisë. Njerëzit u lanë të lirë, në mëshirën e një të ardhmeje të panjohur, në të cilën ata duhet të gjenin strategji të reja për të jetuar. Gjithçka rrëmujë. Vepronin ligjet e xhunglës. Kishe frikë për çdo gjë. Shteti nuk ekzistonte. Pati dhunë, shkatërrime pronash, shkatërrim i vlerave arsimore, kulturore e artistike. Në të gjitha fushat. Në emër të “antikomunizmit”, Teoria “zero”. Gjithçka do bëhej e re si në Amerikë, Francë, Angli, Gjermani … me një fjalë përpara drejt shfarosjes të të gjitha vlerave materiale e morale të komunizmit, për t’a bërë” Shqipërinë si Europa”. Ishin vitet, e shijimit të lirisë pa fre dhe injorancës, të shpërfaqjes së emocioneve dhe instinkteve dhe patjetër edhe të një naiviteti në perceptimin e lirisë individuale. Ajo kohë ishte liri për ujqërit,liri .. Liri për të dominuar të tjerët. Një xhungël e vërtetë, ku u shfaqën të fortët- halabakët, gangsterët, kusarët, kriminelët ku prevalonte dhuna ,forca dhe kallashi. Këta të fortë u sulën mbi pronat e të tjerëve, uzurpuan dhe e privatizuan duke abuzuar me vlerën reale të uzinave,fabrikave,punishteve, pronave publike, institucioneve e gjithçka tjetër që lidhej me to përmes djegieve,shkatërrimeve e falsifikimeve të dokumenteve për tjetërsimin e  pronësive. Akumuluan për një kohë relativisht të shkurtër aq pasuri marramendëse sa që do t’ua kishin zili edhe shumë biznesmenë të suksesshëm të botës perëndimore ,që punojnë një jetë të tërë, por që kanë pasë edhe trashëgimi. Paligjshmëria u thellua ,vota e lirë u zhbë dhe nën trysninë e instiktive ataviste para arsyes e ligjit dhe të leverdive vetjake para përgjegjshmërisë publike e çuan këtë vend në ANARKI TOTALE. PADITURI E PADREJTËSI, DUKE KRIJUAR ATË PABARAZI ME POLARIZIM TË SKAJSHËM KU TË “FORTËT” NË PAKICË SUNDOJNË NJË SHUMICË TË NDERSHME E PUNËTORE.

Të “fortët”, pastaj filluan të mendojnë në këtë mënyrë – ne kemi paratë, kemi pushtetin, atëhere gjithçka e kontrollojmë ne “gjithçka për ne asgjë për të tjerët … për të tjerët ,dmth për popullin- ç’të mbetet diçka aq sa për të mbijetuar dmth “kockat që mbeten nga mbeturinat e tavolinës sonë .Për ne i vetmi interes specifik nuk është interesi kombëtar por ai privat ,prandaj duhen çmontuar të gjitha institucionet publike e gjithçka të privatizohet .Ne kemi paratë dhe për të siguruar pushtetin dhe kontrrollin absolut,kemi të drejtën të blejmë zgjedhjet ,të zgjedhim legjislativin me njerëz që duam ne me lista të mbyllura ,emërojmë ekzekutivin për të marrë vendime në interes të maksimalizimit të pasurisë sonë përmes një rikonceptimi tërësor të ekonomisë sipas interesit tonë. Ne – thonë ata – nuk na intereson që industria vendase të rikthehet të lulëzojë sepse fitojmë më shumë me koncesione e ppp e investime, por edhe sepse nuk duam të krijojmë klasën punëtore e sindikatat si rrezikshmëri për interesat e tona private prandaj i themi ndal industrisë kombëtare.

Kjo është demokracia sipas të fortëve – mundësi e artë për të bërë gjithçka! Kjo marrëzi e kamufluar me demagogji dhe hipokrizi dhe e servirur si “DEMOKRACI” është forma më e sofistikuar e saj dhe më e rrezikshme se vetë marrëzia sui generis. Është TIRANI E MASKUAR.  Në këtë diktaturë të sofistikuar kemi tash e 30 vjet që po jetojmë …iluzionistët ndoshta jetojnë në ndonjë habitat tjetër demokratik, por realistët e kuptojnë që jetojnë në një demokraci neoliberale… Sigurisht që  u bëmë pre e ligjeve të të “fortëve”. “Mjerë ai qytetar që arrin në shkallë të fundit të dëshpërimit e,me qëllim që të shpëtojë, dorëzohet në mëshirën e perëndisë e të ligjeve te kusarëve”!-(Sokrati) Historia përsëritet! Ligjeve të kusarëve ,sipas të cilëve paraja ,”tregu dikton gjithçka madje edhe ligjet e shoqërisë “.Gjithçka është mall tregu!Aksioma universale e demokracisë neoliberale!

***

Ideologjia absurde e ” diktatit të ligjeve të shoqërisë nga tregu” çoi në ” reduktim të demokracisë” ,që do të thotë reduktimi i pjesëmarrjes së popullit në qeverisje, dobësimi i  demokracisë si “fuqia e popullit”. Këtë  duan të ” fortët” – dobësimin  e demokracisë si fuqi e popullit .E kundërta është fatale për ta ” Demokraci si fuqi e popullit” do të thotë që përfaqësuesit e popullit ,krijojnë parlamentin dhe qeverinë e popullit ,ku të ” fortët” i kanë ” dyert të mbyllura” . Një qeveri popullore me reformat e saj sociale  do të synonte të dobësonte të ” fortët e të pasurit” e të forconte të varfërit e shtresat vulnerable të shoqërisë …me një fjalë një qeveri e tillë e dalë nga përfaqësuesit e vet synon të “zgjerojë demokracinë dhe të përmirësojë mirëqenien dhe shërbimet sociale të popullit të vet “, kurse demokracia neoliberale e të “fortëve” përpunon teori politike e ekonomike për të krijuar iluzionin e një demokracie popullore , por që në të vërtetë, përtej fasadës demokratike ka instaluar një kapitalizëm antihuman përmes masave e instrumentave të sofistikuara për të ” reduktuar demokracinë e  jo për të ” reduktuar pabarazitë” .

Një politikë e aftë ,që luan rolin e saj, që për shumë kohë i është lënë financës dhe përrallës së tregjeve, të cilat po na sillkan mirëqenie për të gjithë, pa pasur nevojë të qeverisemi po e mund politikën e mirë, kultura e mbështetur në një industri propaganduese publicitare  e të marrëdhënieve publike e inspiruar nga ideologjia absurde”që ” tregu mund të diktojë ligje për çdo aspekt të shoqërisë njerëzore ” është mbizotëruese për të krijuar qytetarin spektator jo pjesëmarrës aktiv në jetën sociale duke e transformuar atë në një qenie irracionale për të mos marrë vendime të arsyeshme , as si prodhues të të mirave materiale të shoqërisë në fabrika, uzina,  ferma, institucione publike, por thjesht si konsumatorë të produkteve e modeleve të huaja – siç thotë edhe ekonomisti i madh politik Thorstejn Veblen “nëse mund të fabrikosh nevojat, të bësh që qëllimi i jetës të jetë sigurimi i gjërave që serviren do të arrihet që njerëzit të kthehen në konsumatorë dhe kështu do t’i zesh në kurth” …

Sipas të “fortëve” të parasë duhet të shqetësohemi vetëm për veten, jo për të tjerët, që është e dobishme për ta ,por shkatërruese për të varfërit …është një parim që ndeshet në politikat publike duke sulmuar reformat sociale për përkrahjen e shtresave të varfëra e vunerable . Të “fortët” nuk i duan reformat e përkrahjes sociale se u zvogëlohet pasuria, madje edhe e urrejnë si smirëzinj që janë … falë këtij sistemi qytetarët mbijetojnë shkollohen, mjekohen etj ,.. kjo nuk u leverdis pronarëve dhe prandaj ata me ligjet e tyre përpiqen ta reduktojnë financimin për këto shërbime për ta bërë të paefektshme këtë sistem … Është teknikë e përdorur për të sulmuar të gjitha shërbimet publike duke dhënë prioritet absolut privatizimit.

Kështu u ndërtua një shoqëri që bazohet në kontrollin e ushtruar nga ideologjia e tregut gjë, që është e pashmangshme të mos tjetërsonte vlerat në antivlera , virtytet në vese , që përnjëmend reflekton lakminë dhe babëzinë për përfitime maksimale personale në kurriz të të tjerëve ..sipas maksimës së pështirë “gjithçka për ne ,asgjë për të tjerët”.

***

Jo vetëm të “fortët”, por edhe korrupsioni është pjellë e këtij neoliberalizmi, jo thjesht si korrupsion i thjeshtë, si vjedhje, abuzim, apo mashtrim, por si një ” kancer”,që është përhapur si metastazë në çdo qelizë të shoqërisë ,përmes virusit të të ” fortëve ” .Ekziston një lidhje midis tyre si simptoma të neoliberalizmit .

SPAK-u kapi një arkë me peshk dhe ne thirrëm Urrra! U ngazëllyem! Para kohe, natyrisht. Sepse anijet e mëdha lundrojnë të qeta në detin e korrupsionit. U kapën ca cironka, ndërsa peshqit e mëdhenj vazhdojnë të bëjnë kërdinë…

Duke e cilësuar korrupsionin si “kancer” theksojmë një të vërtetë sa e saktë dhe po aq e trishtë. Ekziston një analogji mes korrupsionit dhe kancerit në kuptimin që kanceri si sëmundje që fillon kur qelizat jonormale fillojnë të shpërbëhet në mënyrë të pakontrolluar dhe përhapen në formën e një metastaze në gjithë trupin duke bllokuar funksionimin normal të çdo organi dhe trupi vdes, ashtu edhe korrupsioni është një sjellje jashtë ligjeve dhe normave dhe çrregullon funksionimin e shtetit duke shkaktuar dëm ndaj buxhetit dhe ekonomisë, duke shkelur ligjet dhe rregullat, duke minuar besimin në institucione, duke dëmtuar zhvillimin dhe progresin e shoqërisë dhe duke përhapur një kulturë shoqërore e cila në vend të mbrojtjes dhe përparimit, shkel dhe mashtron rregullat dhe ligjet në dëm të shoqërisë.

Nën këtë prizëm Drejtësia e Re ( SPAKU,BKH ) a ka mundësi ta luftojë korrupsionin publik kur ai është  i ligjëruar në sistem dhe ka kapur shtetin si oktapodi dhe të ” fortët” si mutacione shfaqen kudo në forma të shumta po … kaq të shumta saqë nuk ka vaksina ta parandalojnë atë .E vetmja vaksinë janë ” antitrupat social- demokratë” për të eliminuar virusin neoliberal .Këtë ne nuk e disponojmë dhe si gjithmonë avazi i vjetër – shashka e tullumbace, fasada e autostrada .Asnjë përpjekje serioze për një rilindje të vërtetë me reforma substanciale.Përralla e Sokratit me kusarët do të vazhdojë t’u tregohet nipërve e mbesave ,por ndoshta edhe stërnipave ,

Prandaj zotërinj të Drejtësisë së Re ,mirë e keni filluar me përgjime ” arka peshqish” e ” teendera kanalesh” ,si sinjal popullit tuaj ” heroik,trim e punëtor” ,që të mos ketë pritshmëri të mëdha. Kjo është fisnikëri nga ana juaj.. Është më e ndershme të bëni detyrë ligjore,se sa të sakrifikoheni për një një mision më të madh e jetik për vendin: për të çliruar Shqipërinë nga ” korrupsioni si ” kancer” që gjenerohet nga sistemi neoliberal , që krijon të ” fortët” dhe i mbron ata.Mision i pamundur!Gjithsesi populli do t’ju paguajë me ato bonuse të majme që ju të ndjeheni rehat në punën e familjen tuaj dhe ndonjëherë hidheni grepin se mos rastësisht kapni ndonjë ” peshkaqen” !

 Për shkak të masakrës që është bërë me pronat, vendi ynë nuk është tërheqës për investime të mëdha nga investitorët e mëdhenj. Ja një Dosje tjetër për Drejtësinë e Re – ajo e pronave që ka shkaktuar mijëra viktima por nëse nuk zgjidhet perspektiva e zhvillimit dhe progresit të vendit mbetet e zymtë. Si pasojë e drejtpërdrejtë e mungesës së investimeve, industritë dhe ndërmarrjet e reja humbin gatishmërinë për t’u zgjeruar . Kjo ngadalëson apo edhe ndalon krejt procesin e rritjes së një rajoni.

Prandaj zgjidhja e problemit të pronës është çështje jetike për brezat. Prona duhet të ruajë “shenjtërinë” e saj dhe duhet të shkojë tek i zoti. Asnjë mëshirë për të gjithë ata që kanë bërë këtë masakër “gjenocidale” me pronat që nga institucionet e legalizim- urbanizimit , IKMT- së, kryetarët e bashkive, kryetarët e komunave, kryepleqtë hipotekat gjyqtarët që kanë tjetërsuar pronësinë, kushdo që ka abuzuar e shkelur ligjin me pronat. Asnjë mëshirë për ta! Hetoni të gjithë ata që kanë lidhje me këtë korrupsion, ndiqni pasuritë e tyre kudo ku i kanë dhe bëni gati sekuestrimin e pasurisë së tyre dhe kthejuni pronarëve të ligjshëm pronat e tyre. Atje të stivosura i keni denoncimet. Nga ju kërkohet vetëm impenjim e përkushtim. Nëse hasni vështirësi pyesni popullin që iu dinë të gjitha pasuritë që nga kryepleqtë,kryetarët e komunave, kryebashkiakët e deri në qeveri e parlament me ministra e deputetë…

***

A mund të jetë prioritare në tempullin e dijes dhe moralit kuleta kundrejt shkencës, virtytit dhe të vërtetës? Një absurditet i pa imagjinueshëm në shek. XXI, në institucione që shoqëritë moderne i kanë krijuar si institucione ku investohet intelekt, kurse tek ne…. injorancë dhe mediokritet me…. para. Ironi dhe idiotësi njëkohësisht! Një maskaradë absurde! E papërfytyrueshme dhe e pabesueshme për një vend që pretendon drejt Europes. Nuk mundet njëkohësisht edhe të jesh i korruptuar edhe të moralizosh virtytin dhe të vërtetën. Këtë mund ta bëjë Mediu në politikë, por jo Mësuesi!

***

Korrupsioni kanceroz çon në humbjen e respektit dhe besimit të autoriteve. Siç po ndodh aktualisht tek ne, ku qytetarët e kanë humbur respektin dhe besimin për autoritetet dhe anëtarët e partive politike qeverisë,drejtësisë ,arsimit,shëndetsisë,policisë organizatave shoqërore, sindikatave inekzistente medias e shtypit komercial .Sondazhet tregojnë se shqiptarëve u ka ardhur në majë të hundës me këta ” gangsterë” të të gjitha llojeve e shfaqjeve mutacionale të tyre . Besimi është kriteri më i rëndësishëm për qytetarët kur hedhin votën e tyre për një kandidat politik. Mungesa e transparencës dëmton këtë besim dhe gjeneron pasiguri në popullatë.Për më tepër, duke e ditur që korrupsioni është metastazë ,njerëzit kanë humb edhe respektin për forcat e mbrojtjes kombëtare si policia dhe ushtria. Kjo ka gjeneruar urrejtje brenda shoqërisë, e cila reflektohet në veprimet e mosveprimet midis civilëve dhe autoriteteve policore. A nuk i duhet kthyer besimi dhe respekti njerëzve për autoritetet shtetërore e politike për një bashkëveprim harmonik në shoqëri ? Kjo varet nga ju e nderuar Drejtësi e re! Asnjë mëshirë për “gangsterët e korruptuar të të gjitha llojeve”.

Ky lloj korrupsioni ngjall edhe neveri politike tek njerëzit punëtorë dhe të ndershëm ,të cilët shpesh përbuzin kandidimin për zyra politike në lokalitete ose vende të korruptuara ,për të mos u bërë pjesë e këtij korrupsioni që shpesh herë ushtrohet edhe presion për abuzime apo përfitime të paligjshme, veprime që janë në kundërshtim me karakterin e tyre. Kjo u krijon terren të korruptueshmëve ,që përkeqësojnë nivelin e përgjithshëm të shoqërisë. Përveç këtyre pasoja më e rëndë shoqërore e këtij kanceri është përkeqësimi i mirëqenies së popullatës në të gjithë vendin. Prania e korrupsionit ndikon drejtpërdrejt në mirëqenien e qytetarëve. Ajo gjeneron një ndjenjë të vazhdueshme zhgënjimi dhe dëshpërimi në popullatë, pasi korrupsioni shpesh i bën autoritetet të injorojnë ligjet dhe të veprojnë si të duan.

***

Si përfundim mund të themi se korrupsioni “kanceroz” ,i përhapur si metastazë në të gjitha fushat e jetës së një shoqërie shkatërron vendet e punës dhe pengon zhvillimin, i kushton ekonomisë së vendit miliarda dollar çdo vit. I ngujon të varfërit në varfëri përderisa qeveria e korruptuar vjedh buxhetin e shtetit dhe parandalon që njerëzit e devotshëm që punojnë me djersë dhe me ndershmëri të fitojnë nga frytet e punës së tyre. Korrupsioni vjedh investimet që duhej të shkonin në shkolla dhe spitale përderisa të korruptuarit u shmangen taksave që duhet paguar.

A nuk përbën ky korrupsion “kanceroz” objektivin tuaj themelor se sa të merreni me përgjimin e “arkave të peshkut” e tenderit e kanaleve”. A mund t’u bini më fort këmbanave ju të “përzgjedhurit” nga Drejtësia e vjetër, për të mos lejuar sjelljen ,veprimet e qëndrimet e këqija që godasin në zemër besimin e publikut nga gangsterët e politikës e pushtetit të zgjedhur e nga gangsterët e krimit, biznesit, mediakomit, të pazgjedhur prej nesh? A mundeni ju që të bëni gjithçka që mundeni duke u rënë fortë këmbanave, po …kaq fort sa të tronditet gjithë vendi nga “tërmeti” i drejtësisë? Këtë kërkon populli nga ju, por jo me mendësinë e vjetër, por me një mendësi krejtësisht të re, konceptualisht e filozofikisht ndryshe për drejtësinë për të depërtuar në thellësi të problemit të korrupsionit,për ta parë atë përtej korrupsionit të thjeshtë e të rëndomtë si vjedhje apo abuzim me ligjin,pushtetin .Jo si detyrë ligjore, por si një mision të madh e jetik për vendin: për të çliruar Shqipërinë nga ” korrupsioni si ” kancer” që gjenerohet nga sistemi neoliberal , që krijon të ” fortët” dhe i mbron ata .Është ky sistem që gjeneron mjerim,varfëri,Pabarazi,shpopullim përmes ” kancerizimit” të shoqërisë! A mundeni ? Dhe pa mëshirë?

Është një mekanizëm i sofistikuar i demokracisë neoliberale që investon fuqishëm për maksimalizimin e pushtetit dhe pastaj përmes këtij të fundit për maksimalizimin e parasë sipas maksimës neveritëse : ” Gjithçka për ne, asgjë për të tjerët” e inspiruar nga ideologjia absurde sipas së cilës ” tregu dikton edhe ligjet e shoqërisë ” duke privatizuar gjithçka e duke trajtuar si mall tregu edhe jetën e shpirtrat e njerëzve . Nën këtë prizëm duhet Drejtësia e Re (SPAK, BKH ) ta shikojë korrupsionin publik si një korrupsion i ligjëruar në sistem nga kapja e shtetit nga të ” fortët” dhe me pasoja fatale për shoqërinë .

Paratë publike të vjedhura e abuzimet e tyre me pushtetin nuk janë asgjë në krahasim me pasojat që sjellin në varfërinë pabarazinë, dëshpërimin, humbjen e shpresës dhe të ardhmes së vendit. Nuk është kusari, as abuzim, as mashtrim (veprime halabakësh nga njerëz halabakë), por është një veprimtari kriminale e politikës dhe drejtësisë që në mënyrë të sofistikuar ushtron një dhunë tek qytetarët duke ua bërë jetesën të pamundur në vendin e tyre . Është një krim në përmasat e një gjenocidi. A mund të ketë mëshirë për këto monstra që kanë sjellë pasoja të tilla në këtë tranzicion? Aspak ! A mund të dënohen këto monstra thjesht si kusarë dhe abuzues ? Do të ishte një padrejtësi tjetër më e rëndë nga një Drejtësi e Reformuar! Zhgënjimi dhe lëndimi i popullit do të ishte akoma më i madh dhe besimi tek demokracia e drejtësia do të ishte një proces i pakthyeshëm.