Dënimi i Shukriut dhe një histori nga koha e komunizmit

Në rrjete sociale ka gëluar çështja e Shukri Xhelilit. Janë treguar lloj-lloj historish dhe janë bërë shumë montazhe. Një prej historive që na bëri përshtypje vjen nga Facebook.

Ja çfarë shkruan një qytetar: “Video skandali i Kryetarit të Bashkisë më kujtoi një histori nga periudha komuniste. Në një institucion të rëndësishëm kapën një punonjës duke vjedhur. Menjëherë u mblodh organizata e partisë i këtij institucioni, për ta analizuar e për ta gjykuar hajdutin që i turpëroi. Mbas diskutimeve të zjarrta e parimore i dhanë fjalën dhe punonjësit hajdut. Ai u ngrit serbes dhe tha:

“E di si është puna, ju të gjithë vidhni, nuk po e kuptoj se çfarë inati keni me mua?!” Sekretari i Partisë e pa me vëmendje dhe qetë e qetë i thotë: “Shoku ynë, duket që nuk e paske kuptuar gabimin, ne po të dënojmë jo se vodhe, por se të kapën!” Kështu që në këtë realitetin e sotëm, ku thuajse të gjithë zyrtarët e lartë, të mesëm e të ulët, bëjnë të njëjtën gjë si ajo që bëri Bashkiaku i Dibrës, duhet të kenë në konsideratë motivin e dënimit te Sekretarit të Partisë: “Po të dënojmë se të kapën, jo se e bëre!”