Me rikandimin e tre deputetëve aktualë nga grupi parlamentar i Partisë Socialiste, pritet që të futen në Kuvend për herë të parë edhe te figura të reja.
Me largimin e Armando Subashit, si deputet i qarkut të Fierit pritet që të zgjidhet Xhevit Bushaj.
Ndërsa në vend të deputetes Majlinda Bufi që kandidon në Roskovec, pritet të vijë Antoneta Dhima. Një emër i ri pritet që të vijë edhe në qarkun e Durrësit, ku tashmë kandidatet femra janë ezauruar nga lista e PS-së. Në vend të Artur Bushit, tashmë në Kuvend pritet që të hyjë Shkëlqim Troplini.
Kjo legjislaturë do të mbahet mend për numrin më të madh të deputetëve të cilët kanë bërë betimin. Ndonëse prej zgjedhjeve të 23 qershorit dolën 140 deputetë, një pjesë e mirë e tyre dhanë dorëheqjen për t’u emëruar në funksione të tjera.
Fillimisht do të ishin ministrat ata që do të jepnin dorëheqjen, kjo nga një pakt që Rama bëri që në fillim duke deklaruar se ministrat do të ishin të obliguar gjithë kohës ndaj detyrës.
Vetëm Shkëlqim Cani dhe Damian Gjiknuri kanë ende mandatin e deputetit. Ndërsa më pas, do të ishin edhe dorëheqje të tjera të cilat ishin për arsye personale.