Dëshmitë në DITA, media turke interviston Izet Haxhinë: Berisha më përdori si karrem dhe ma hodhi krimin e tij mua

Pas 16 vitesh në Turqi, Haxhia tërheq vëmendjen e shtypit turk.

Gazeta Milliyet bisedon me ish truprojën e Sali Berishës dhe ndërton një profil të së kaluarës së tij.

Ish truproja e presidentit dhe kreut të PD-së Sali Berisha, që prej një viti është bërë personazh i dorës në parë në opinionin publik shqiptar, përmes intervistave të para e pastaj, prononcimeve të tij të njëpanjëshme në DITA.

Haxhia eshte njeriu që është akuzuar për shumëçka dhe di shumë gjëra mbi qeverisjen dhe presidencën Berisha dhe shumë prej ngjarjeve të rënda që shënuan Shqipërinë në periudhën 1990-1998.

Permes intervistave ne DITA ai eshte shndërruar në një “të penduar” dhe rrëfimtar të vendosur për të ekspozuar një politikan dhe një regjim autokratik, pjesë e të cilit ka qenë edhe vetë siç e pranon.

Së fundi, ka tërhequr vëmendjen edhe të së përditshmes turke Milliyet, e cila ka bërë një profil të të arratisurit prej 16 vjetësh nga Shqipëria. Duke rindërtuar edhe historinë e tij.

Haxhia është larguar nga Shqipëria në vitin 1999. Ndaj tij gjykata mori vendim për 25 vjet burg nën akuzën e pjesëmarrjes në vrasjen e Azem Hajdarit.

Haxhia u arrestua në Turqi në qershor 2006, por pa 4 vitesh e 4 muajsh burg, në vitin 2010 ekstradimi i tij në Shqipëri u ndalua nga gjykatat turke me arsyetimin se ndaj tij ishte bërë një gjyq jo i drejtë.

Paralelisht Izet Haxhia kërkoi azil politik në Turqi. Ndërkaq, kaloi edhe një 4 vjeçar heshtjeje, para se DITA të arrinte të kontaktonte dhe të intervistonte njeriun që menjëherë ngjalli interes të jashtëzakonshëm në publikun shqiptar.

Paçka se, mesa duket, jo në sistemin tonë të drejtësisë.

Ja ç’shkruan Millyet për Izet Haxhinë:

I akuzuar për tentativë për grusht shteti dhe për vrasjen e liderit të opozitës shqiptare Azem Hajdari, ish truproja i ish presidentit Sali Berisha flet pas 16 vitesh qëndrimi në Turqi.

I njohur si “kutia e zezë” e Shqipërisë për informacionet që ka, ai flet për vrasjen e Hajdarit më 12 shtator 1998 dhe kaosin që pasoi më pas, për çka emri i tij u fut në buletinin e kuq të Interpolit.

Ndaj tij ishte vënë edhe një shpërblim prej 200 mijë dollarësh për ta vrarë, ndaj iu deshtë linte pas dy fëmijët dhe familjen, për të kërkuar azil politik në disa vende.

Kërkesa iu refuzua nga këto vende. Më vonë, në vitin 1999 ai hyn në Turqi me pasaportë false. Vetëm shtatë vjet më pas ai u arrit të kapej në një operacion në një hotel, në qytetin Ajdin. Me dënimin 25 vjeçar që i rëndonte nga Shqipëria, Izet Haxhia u vendos në burgun e Ajdinit.

Pas 5 vitesh burg, Haxhia lirohet dhe vazhdon të jetojë në Kushadasi, gjithnjë në ruajtje.

I vendosur në një vend të rezervuar dhe i mbrojtur nga të afërmit e tij, Haxhia thotë se ende merr kërcënime me vdekje. “Protesta e funeralit të Azemit u bë e dhunshme, dhe u kthye në kryengritje të armatosur.

Ky rebelim tentoi të rrëzonte qeverinë, asokohe ne sulmuam selinë e kryeministrisë, morëm televizionin shtetëror. Pas kërkesës së prerë të SHBA dhe Europës, Berisha u tërhoq.

Unë erdha në Turqi në vitin 1999. Pas grushtit të shtetit në Tiranë, ishte dhënë një urdhër ndaj meje, të vritesha sapo të më shihnin. Dhe kur erdha në Stamboll, mësova se një vrasës profesionist ishte pajtuar për të vrarë.

I di të gjithë këta skenarë, është gishti i Sali Berishës dhe vrasësve të tij. Sa i përket akuzës ndaj meje, unë pyes, ku është telefoni i Azem Hajdarit? Nuk u gjet pas vrasjes, as autopsi nuk u bë. Si shkoi Hajdari në makinën ku e prisnin njerëz të armatosur”, thotë ai.

Berisha ma hodhi krimin e tij mua. Unë jam i kërkuar nga Interpoli në çdo vend. Kam qenë në rrethet e larta të pushtetit, dhe jam dëshmitar i shumë veprimeve të paligjshme. Sali Berisha më përdori si karrem. Sot marr kërcënime të vazhdueshme, por nuk u trembem atyre.

Merak të vetëm kam familjen time”, thotë Izet Haxhia.