Në nisje të mbledhjes së radhës të qeverisë, kryeministri Berisha ka fajësuar opozitën dhe kreun e saj për dështimin për herë të tretë të Shqipërisë në marrjen e statusit të vendit kandidat për në BE. Berisha tha se Shqipëria nuk e mori statusin për shkak të bllokimit të tre ligjeve nga opozita dhe tha se zgjedhjet nuk janë kusht për statusin.
“Dje ministrat e Jashtëm të BE-së vendosën që Shqipëria nuk merr dot statusin pa votuar tre ligje në Parlamentin shqiptar. Në këtë kontekst, Edi Rama realizoi një qëllim ogurzi, bllokimin e marrjes së statusit, me besimin e verbër se statusi do të forconte pozitën e qeverisë në zgjedhjet e ardhshme. Por, unë mendoj se statusi do të forconte pozitën e të gjithë shqiptarëve në procesin e integrimit.
Në këtë veprimtari bllokuese të koordinuar, Rama u deklaroi mbështetësve se statusi do të kushtëzohej me zgjedhje. Kjo nuk ndodhi jo sepse zgjedhjet nuk janë me rëndësi jetike, por sepse KE kur rekomandoi statusin, institucioni që ndjek më afër dhe me hollësi çdo zhvillim, nuk pranoi kërkesën e Ramës për të futur zgjedhjet si kusht për statusin”, tha Berisha.