Dhe para kohe u plakëm…

Dhe s’kemi ç’të bëjmë akoma

Dhe s’kemi ç’të themi më tepër

Aty ku kish fllad e aroma

Të shpon sot gjembi i vjetër.

 

Të ndezur s’e mbajtëm dot zjarrin

Të gjallë s’e mbajtëm dot flakën

E pimë të gjithë nektarin

Dhe para kohe u plakëm.

 

Asgjë nuk kërkoj sot prej teje

Dhe ti nuk ke ç’të kërkosh

Tani s’ka më dridhje rrufeje

Se kupa ka mbetur krejt bosh.

 

Dhe s’kemi ç’të bëjmë akoma

Asnjë sekondë dot s’e shtyjmë

Aty ku kish fllad e aroma

Sot gjembat të shpojnë e të grijnë.

6.11.2000

 

Pa titull

 

Ne jemi pranë e pranë

Porsi dy sytë

Ti Toka je-planet

Unë-satelit.

 

Një mrekulli si ty

S’ka lindur nëna

Rreth teje rrotullohem

Porsi hëna.

 

Rreth teje rrotullohem

Nëpër mjegull

Njëlloj si Toka-Hënën

Më mban pezull.

2.10.2000

 

Për ca ish miq…

 

Ç’më dolët kaq të pështirë

Injorantë e të pabesë

Tani që ju njoha mirë

Krejt i lumtur do vdes.

27.12.2000

 

Në mes jush…

 

Në mes jush unë jam i huaj

S’i përkas batakut tuaj

Në llum trupin s’mund ta zhgrryej

Se jam zog, që rroj në qiej.

28.12.2000

 

Po luftës nuk i trembem…

 

Tani nga pabesia

As vuaj, as çmendem;

Unë jam njeri i paqes

Po luftës nuk i trembem.

 

Unë të afroj buqetën

Ti më vërtit çomangen

Unë jam njeri i paqes

Po luftës nuk i shmangem.

 

Unë ndez qiri për jetën

Që koha s’mund t’i fiki

Se jam njeri i paqes

Po luftës nuk i iki.

 

Unë thur ëndrra magjie

Po ti magjitë i shemb:

Unë jam njeri i paqes

Po lufta nuk më tremb.

 

Ti zhytesh në mes llumit

Unë Zotin shkoj takoj

Se jam njeri i paqes

Po luftën e fitoj!…

2001