Digji – more – digji!

Drafti në Kuvend,
së shpejti do shkojë,
dhe Luli vazhdon,
të na kërcënojë!

Po na kërcënon,
me tone të forta,
se ka frikë mos bëhet,
një trafik me vota!

Nëpër hollësira,
Lulashi nuk hapet,
po deklaron prerë:
“Do djegim mandatet!”

Një term juridik,
ky s’është-o idiot,
ndaj dhe unë kuptimin,
nuk e kuptoj dot!

Kështu masivisht,
Kuvendi do lihet,
apo publikisht,
shkrepësja do t’u vihet?!

Nuk besoj se kini,
nevojë për recetë,
se për djegiet jini,
mjeshtra të vërtetë!

Idenë Saliu,
në mendje ta vuri,
ndaj dhe ne të themi:
“Digji-more-Luli!”

Digji-more-digji,
edhe nxirre zinë,
se ju kini djegur,
kaq herë Shqipërinë!

Digji-more-digji,
digji ose plas,
që bllokim Kuvendi,
të kemi më pas!

Thua-me mandatet,
punë kur të mbaroj,
që të gjithë Kuvendin,
do ta përvëloj!

Do ta përvëlosh,
bashkë me qoftëlargun,
siç dikur nazistët,
rrafshuan Raihshtagun!

Na trego për djegien,
në është deçizive,
në është me tamam,
a figurative!

Meqë vetëm zjarrin,
sot na ke ofruar,
kuptohet që je,
shumë i dëshpëruar!

Shumë i dëshpëruar,
në gjendje termike,
saqë mendon vetëm,
qëndrime drastike!

Ne e dimë që Drafti,
dhe po shkoi sot,
votat që i duhen,
nuk do t’i marrë dot!

Kaq i dëshpëruar,
kot që je-o burë,
por votimi duhet,
për një procedurë!

Dihet-në Kuvend,
s’do kemi një bum,
ndaj do hapet rruga,
për Referendum.

Me Referendumin,
ty të bëhet nder,
se ti je me popull,
mjaltë dhe sheqer!

A s’thua gjithnjë,
se do t’i drejtohesh,
ndaj se ke problem,
që të rivotohesh!

Ky Referendum,
një test do të jetë,
ta kuptosh-o Lule,
se sa vlen vërtetë!

Po ti do t’i djegësh,
se je një kodosh,
që Referendumin,
krejt ta sabotosh!

Po dhe kur në sallë,
bosh të mbeten vëndet,
është e sigurtë,
se zgjidhja do gjëndet!

Duket që me Botën,
sot nuk e ke vaj,
edhe Amerikën,
s’e tall dot kollaj!

Po gishtin tek ty,
e ka dhe BE-ja,
epo kësaj radhe,
nuk do shkojë hileja!