Dinamo ka siguruar mbijetesën në Kategorinë e Parë, pasi ka mundur 3-2 Pogradecin, ndërkohë që Besëlidhja dhe Iliria shoqërojnë Gramshin e Naftëtarin në Kategorinë e Dytë. Në javën e fundit ishin të shumta skuadrat që rrezikonin, megjithatë nuk pati rezultate surprizë, ndonëse në stadiumin “Selman Stërmasi” blutë u tronditën nga avantazhi i miqve. Dinamo kishte katër mungesa në formacion, tre pezullime dhe Imami i dëmtuar, çka i dëmtonin shumë planet e trajnerit Dalipi, ndërkohë që pjesa e parë u mbyll në disavantazh, pas golit të Shkullakut, në minutën e 13-të. Sapo nisi pjesa e dytë, blutë barazuan me anë të Sorrës, ndërkohë që Turtulli u dha avantazhin 2-1, në minutën e 63-të. Goli i qetësisë erdhi në minutën e 76-të, kur Ferhati e çoi në dy gola diferencën.
Megjithatë, gjashtë minuta para përfundimit, Pogradeci shënoi me Tushinkën, por minutat e mbetura nuk sollën më rreziqe në portën e bluve. Miqtë mbetën me dhjetë lojtarë në fundin e lojës, duke i lehtësuar punën Dinamos, e cila në fund feston mbijetesën. Për të dytin vit radhazi, skuadra 18 herë kampione e vendit do të luajë në Kategorinë e Parë, me shpresën që majin e ardhshëm të rikthehet në elitë. Ndërkohë, në takimin e Lezhës, ishte Iliria që kaloi në epërsi, duke krijuar iluzione për mbijetesë, por Besëlidhja e përmbysi rezultatin me dy gola. Gjithsesi, nuk mjaftuan, pasi fitorja e Dinamos bëri që të dyja këto skuadra të bien në Kategorinë e Dytë për sezonin e ardhshëm. Kampionati përfundon sot, me takimin midis Lushnjës e Partizanit në stadiumin “Roza Haxhiu”. Do të jetë një ndeshje pa vlera për renditjen, pasi të dyja skuadra i kanë të paprekshme pozitat në dy vendet e para.
Kategoria e Parë
Java e 30-të
Dje
BESËLIDHJA – ILIRIA 2-1
Danaj 61′, Miliç 69′, 81′ / Gjonpalaj 53′
DINAMO – POGRADECI 3-2
Sorra 47′, Turtulli 63′, Ferhati 76′ / Shkullaku 13′, Tushinka 84′
BURRELI – MAMURRASI 3-2
Pjetrani 22′, Farruku 45′, Mllugja 65′ / Metaj 58′, 82′
TËRBUNI – GRAMSHI 2-0
Rroca 29′, Baze 68′
ELBASANI – HIMARA 1-2
Kaçuli 20′ (p) / Dhrami 42′, Zdravkoviç 71′
BUTRINTI – NAFTËTARI 3-0
Xhibro 15′, Alzeneli 34′, Kola 83 (p)
ADA – KAMZA 2-2
Mujeci 29′, Erkoçeviç 62′ / Keta 12′, Maho 54′
Sot
LUSHNJA – PARTIZANI 17:00
Renditja
Kategoria e Parë
1 Lushnja 65
2 Partizani 55
3 Tërbuni 43
4 Mamurrasi 43
5 Pogradeci 42
6 Himara 42
7 Burreli 42
8 Ada 41
9 Kamza 41
10 Butrinti 40
11 Dinamo 40
12 Elbasani 40
13 Besëlidhja 38
14 Iliria 37
15 Gramshi 31
16 Naftëtari 20