Pas shqetësimit të ngritur nga studentët kosovar për mosnjohjen e diplomave të lëshuara nga universitetet private në vendin tonë, burimet zyrtare të Ministrisë së Arsimit thonë se kjo vonesë mund të vijë për shkaqe proceduriale. Kjo duke iu referuar rasteve në të cilat diplomat janë lëshuar nga programe studimore të akredituara.
Drejtoresha e Arsimit të Lartë në MASH, Edlira Late, një ditë pas protestës së bërë nga dhjetëra studentë kosovar ka bërë të ditur se të gjitha programet e akredituara dhe diplomat e lëshuara pranë tyre do të sigurojnë edhe njohjen në Kosovë, kjo në kuadër të marrëveshjes së bashkëpunimit që ekziston ndërmjet dy vendeve sa i takon arsimit të lartë.
“Unë nuk e quaj ngërç, por e quaj bashkëpunim dhe pjesë e procedurave teknike për të saktësuar dhe lehtësuar numrin në rritje të studentëve që studiojnë në vendet respektive”, bën të ditur drejtoresha e arsimit të lartë, Edlira Late. Konkretisht bëhet fjalë për rreth 1200 diploma të fituara nga studentët kosovarë që kanë ndjekur studimet në universitetet private të vendit tonë. Shqetësuese situata shfaqet për ata studentë që mund të kenë mbaruar studimet në një institucion, programi i të cilit ka qenë në proces akreditimi.
Ministria e Arsimit të Kosovës nuk njeh diplomat e të gjithë studentëve që kanë mbaruar studimet në një kohë që programi i ndjekur nuk ka qenë i akredituar. Duke qenë se janë me dhjetëra programet studimore të universiteteve private që janë ende në proces akreditimi, bën që shumë studentë që i kanë mbaruar studimet në këto programe të vihen përballë një realiteti të shëmtuar: atë të mosnjohjes së diplomës së marrë në këtë program.