Shkaktari parësor i kancerit të lëkurës është ekspozimi ndaj rrezeve ultravjollcë në diell. Të dhënat e raportuara nga strukturat ndërkombëtare të shëndetit, tregojnë se çdo vit diagnostikohen rreth 130 000 melanoma malinje në gjithë rruzullin.
Sipas ekspertëve të shëndetit publik, ekspozimi i paktë ndaj rrezeve ultravjollcë është i dobishëm për njerëzit, dhe luan një rol të domosdoshëm në prodhimin e vitaminës D.
Ekspozimi i shpeshtë dhe djegiet e shpeshta të lëkurës nga dielli në fëmijëri mund të shkaktojnë dëmtime të pakthyeshme, të cilat më pas mund të bëhen shkak për shfaqjen e kancerit të lëkurës.
Njerëzit me lëkurë të errët kanë mundësi më të pakta për shfaqjen e kancerit të lëkurës, por ata përsëri preken nga dëmtimet e shkaktuara nga ekspozimi në diell, kryesisht te sytë dhe sistemi imunitar.
Masa më e rëndësishme për parandalimin e kancerit të lëkurës është sigurimi i një mbrojtjeje sa më 
efektive nga rrezet ultravjollcë.
Për këtë duhet:
Të shmanget me çdo kusht djegia nga dielli.
Të qëndrohet në hije në orën 11:00-15:00, atëherë kur ngarkesa me rreze UV është më e madhe.
Të mbahen kapelë, syze dielli dhe rroba të përshtatshme.
Të përdoret krem me faktor të lartë mbrojtës.
Të mos ekspozohen kurrë drejtpërdrejt në diell, foshnjat deri në moshën 1-vjeçare.
Veçanërisht fëmijët është mirë të mbrohen maksimalisht nga dielli.
p.k/dita