Ditëlindja e Zenit dhe lajmi i Fazlliçit

Në këtë fund muaji kishte ditëlindjen Shkëlzen Berisha, djali i ish-kryeministrit, që së fundmi është kthyer edhe personazh shou-bizi. E kanë uruar shumë miq në rrjetin social, nuk ka harruar ta bëjë këtë as Zana Guxholli, ish-këshilltarja ekonomike e Berishës. Ai vetë i ka falënderuar të gjithë duke postuar një buqetë lulesh ngjyrë blu. Ditë është bërë edhe më interesante për të, pasi një lajm që Fazlliçi ishte fitues i tenderit për linjën e interkonjeksionit mori dhenë. Shkëlzeni, mesditën e djeshme, po në Facebookun e tij, e poston këtë lajm me titull: “Linja me Kosovën: Akuzoi Berishën, Rama ia jep tenderin Fazlliçit”. Në fakt, vetë Fazlliç e përgënjeshtroi këtë lajm duke thënë për gazetën Dita se “Nëse gjeni lidhje të mia me Energoinvest, ua shes aksionet juve si gazetë për 1 cent”. Edhe vetë Shkëlzeni e di që firma boshnjake nuk ka lidhje me mikun e tij Fazlliç, por me sa duket i pëlqen të ngrejë mjegull rreth këtij lajmi.