Dojaka: Të votojmë të gjithë, ndryshe qeverisin militantët

Aleanca Popullore u bashkohet zërave që apelojnë për pjesëmarrje masive në zgjedhjet parlamentare të 23 qershorit. Pas apelit të bërë nga Ambasada e Uashingtonit në Tiranë ka reaguar dhe partia Aleanca Popullore. Kreu ikësaj partie, Artur Dojaka në një konferencën për mediat u shpreh se pjesëmarrja masive është me një rëndësi të jashtëzakonshme për vendin. “Aleanca Popullore beson se ushtrimi i të drejtës së votës nga çdo qytetar ka një rëndësi të jashtëzakonshme në këto zgjedhje. Ne u bëjmë thirrje jo vetëm mbështetësve tanë, por të gjithë bashkëqytetarëve me të drejtë vote: Kush nuk voton, lejon të qeveriset nga militantët partiakë. Shqipëria nuk duhet të qeveriset nga një vullnet jopërfaqësues. Si bashkëqytetarë të përgjegjshëm për fatet tona dhe të vendit, ne nuk duhet ta dorëzojmë Shqipërinë, në dorën e një pakice – e kujtdo ngjyrimi ajo qoftë,” u shpreh kreu i Aleancës Popullore, Artur Dojaka.

Sipas kreu të AP-së të mos votosh është t’i heqësh vetes të qenit qytetar.  Ai theksoi se revolta qytetare shprehet duke votuar dhe jo duke mos votuar. “Të mos votosh do të thotë të mohosh një të drejtë të fituar me sakrifica. Të mos votosh do të thotë të hedhësh poshtë mundin e atyre që kanë luftuar për liritë qytetare në Shqipëri. Revolta nuk shprehet duke mos votuar. Revolta shprehet duke votuar masivisht. Vota është jetike. Votimi masiv këtë 23 qershor është jetik. Populli mund dhe duhet të përfaqësohet nëpërmjet shumicës qytetare e cila garanton fatet e saj dhe të vendit”, tha Dojaka për mediat.

Aleanca Popullore është një forcë e re politike e cila kryesisht është e fokusuar të çështja kombëtare dhe në veçanti te komuniteti çam. AP është pjesë e koalicionit opozitar dhe pritet të jetë një nga surprizat e 23 qershorit.