Donald Lu: Ka edhe ministra të korruptuar…të ndiqen penalisht

Ambasadori i Shteteve të Bashkuara të Amerikës, Donald Lu po i përgjigjet pyetjeve të qytetarëve dhe gazetarëve në faqen online në Facebook, duke u përqendruar kryesisht tek reforma në drejtësi dhe lufta ndaj korrupsionit.

Ambasadori jep disa rrugë për luftën ndaj këtij fenomeni, siç është rritja e pagës për gjyqtarët, por shton se të korruptuarit duhet të dalin jashtë këtij sistemi. Madje, ambasadori ka shkuar edhe më tej kur ka deklaruar se ka edhe ministra të korruptuar.

“Gjyqtarët dhe prokurorët e korruptuar duhet të pushohen nga puna dhe të ndiqen penalisht. Politikanët e inkriminuar duhet të hiqen nga liderët e partive politike, nga parlamenti dhe nga pozicionet lokale. Ministra të korruptuar, të mëparshëm dhe të tanishëm, duhet të mbahen përgjegjës për krimet e tyre. Populli shqiptar duhet të kërkojë që kjo të ndodhë”, tha ai.

Pyetja dhe përgjigje:

–I nderuar Ambasador ju po flisni me emra konkret dhe po konstatoni realitetin e hidhur Shqiptar, por pyetja ime është se si mund te shkojmë nga konstatimi te veprimi? Sepse t’u kërkosh të korruptuarve të dënojnë veten e vet është problem i madh kush do jete ajo formulë magjike që t’i japi goditjen e forte që ta rrëzojë këtë strukturë kriminale që ekziston në Shqipëri!!

LU: Pyetje shume e mirë. Ndryshimi i Shqipërinë do të fillojë me ligje te reja – për dekriminalizimin, Zyrën Kombëtare te Hetimeve, dhe reformën e gjyqësorit. Por vetëm ligjet nuk do të ndryshojnë Shqipërinë. Implementimi është puna e vështirë. Gjyqtarët dhe prokurorët e korruptuar duhet të pushohen nga puna dhe të ndiqen penalisht. Politikanët e inkriminuar duhet të hiqen nga liderët e partive politike, nga parlamenti dhe nga pozicionet lokale. Ministra të korruptuar, të mëparshëm dhe të tanishëm, duhet të mbahen përgjegjës për krimet e tyre. Populli shqiptar duhet të kërkojë që kjo të ndodhë.

Në Shqiptaret nuk duam korrupsion. Por jemi të detyruar të paguajmë , i tillë është sistemi që ka ngritur politika hajdute për 25 vite në Shqipëri. Korrupsioni te ne është si ajsbergu që i duket vetëm pjesë sipër. Por problemi është me i madh nga sa e mendojmë ne. Pyetja ime është: a mund ta shkulin pemën e korrupsionit ata që e mbollën? Kjo pemë për ta sjell pushtet fuqi pasuri në kurriz të shqiptarëve të ndershëm.

LU: Korrupsioni nuk ka nevojë të luftohet nga ata që e krijuan atë. Korrupsioni duhet të luftohet nga njerëz normalë. Njerëz normalë që votojnë. Njerëz normalë që punojnë në biznes, në qeveri apo në shkolla. Njerëz normalë që punojnë në OJQ-ë, universitete dhe media. Mos i lejoni politikanët të kontrollojnë nismën anti-korrupsion.

Mire zotnia do përgjigjet po korrupsionin kush do ta luftoj në këtë vend?

LU: Ti do ta luftosh! Dhe tre milionë qytetarët e tjerë shqiptarë. Kjo nuk është një luftë për të huajt apo politikanët. Kjo duhet të jetë një luftë e qytetarëve të rregullt.

Zoti Ambasadador amerika ka sjelle demokracinë ne shume vende te botes perse këtu ne Shqipëri, Amerika është indiferente për korrupsionin e larte nga vetë deputetët e Shqipërisë dhe ju heshtni dhe populli shqiptarë vuan nga skamja dhe varfëria a është kjo demokracia që ne shqiptaret kemi kërkuar?

LU: Shtetet e Bashkuara sigurisht promovojnë demokracinë duke zhvilluar OJQ-të, partitë politike dhe mediat. Ne gjithashtu inkurajojmë vendet për t’u marrë seriozisht me korrupsionin e nivelit të lartë. Në Shqipëri, ne kemi punuar me të dyja palet, qeverinë dhe opozitën për të hequr anëtarët e parlamentit dhe kandidatët për kryetarë të komunave apo bashkive me rekorde në arrestime dhe dënime penale. Miratimi i ligjit të dekriminalizimit do të rezultojë në largimin e shumë prej këtyre politikanëve me precedentë penalë.

Përshëndetje Z. Ambasador Lu! Ju përgëzoj pa mas për fjalimet pa dorashka dhe përplasjen në fytyrë të realitetit që Ju i bëni politikës dhe politikaneve shqiptar. Në lidhje me korrupsionin unë mendoj se një nga mënyrat për ta luftuar atë është rritja e rrogave per te gjitha ato pozicione që janë me shume te ekspozuar ndaj korrupsionit. Pyetja ime konsiston: A mendoni se me këto politikane qe kemi ne, do arrijmë ta luftojmë korrupsionin dhe te anëtarësohemi ne BE ne 5 vitet e ardhshme apo jo? Faleminderit!

LU: Kjo është një pyetje e mirë. Shtetet e Bashkuara nuk janë anëtarë të BE-së kështu që unë nuk e di se sa e mundshme është që Shqipëria do të futet në BE së shpejti. Ajo që unë di është se BE-ja është serioze në lidhje me kërkesat që Shqipëria të bëjë progres kundër korrupsionit, krimit të organizuar dhe reformën gjyqësore përpara fillimit të negociatave. Dhe po, ju keni të drejtë se pagesa me rroga te arsyeshme është një pjesë e rëndësishme e luftës kundër korrupsionit.

Zoti Ambasador në shtetet në gjendje luftë shpesh shpërnguljet janë shumë të mëdha. Shqipëria nuk është në luftë mirëpo të larguarit janë kaq shumë njësoj si në luftë Çfarë mendimi keni për këtë fenomen. Dhe e dyta nëse ju keni informacione të klasifikuara dhe unë besoj se keni për politikanë gjykatës apo biznesmen me ndikim të cilët kanë vjedhur apo vrarë për tu pasuruar a do t’i publikoni ato në ndër të shqiptarëve pas bërjes së reformës në drejtësi?

Lu: Përshëndetje Flori, pyetje e mirë. Unë e di se shqiptarët janë të zgjuar. Unë jam i sigurt se ata mund të kuptojnë se cilët janë zyrtarët e korruptuar dhe kriminalë. Ata janë ato ose ata që nuk e bëjnë punën e tyre. Ata nuk e mbështesin reformën dhe ata nuk kanë arritur asgjë në pozicionet e tyre. Ata janë ata ose ato te cilët kalojnë gjithë kohën e tyre duke vjedhur paratë tuaja.

Z,Ambasador LU! ju përgëzoj për mësimin e gjuhës shqipe, ne lidhje me luftën kundër korrupsioni: a mendoni se duhet një sistem i integruar dixhital ne te gjitha institucionet qe tu vihet ne shërbim qytetarëve për të ulur nivelin e korrupsionit ne Shqipëri?

Lu: Lazer, sugjerimi juaj është i shkëlqyer. Jam dakord me ju, qasja online ndaj informacionit dhe shërbimeve është një nga mënyrat më të mira për të luftuar korrupsionin në nivelin kur qytetarët e zakonshëm kërkojnë shërbime zyrtare. Ekziston një nismë, e mbështetur nga qeveria e Shteteve të Bashkuara dhe Ministria shqiptare për Teknologjinë dhe Inovacionin, e cila quhet Open Government Partnership (Partneritet i Qeverisjes së Hapur) dhe që përpiqet të përhapë këtë teknologji midis qeverisë kombëtare dhe vendore.

Ambasador përshëndetje! Edhe 15 vite dhe të dy periudhat ajo komuniste dhe e demokracisë hibride barazohen. Sigurisht periudhat nuk mund të krahasohen për avantazhet dhe disavantazhet me njëra-tjetrën por desha të di a kanë konkurrentë politikanët tanë diku në vende të tjera lidhur me mënyrën se si bëjnë korrupsion? A do të ishte e mirë një lëvizje e shoqërisë civile ajo që mund të merrej me publikimet e pronave të politikanëve, gjyqtarëve dhe prokurorëve në vend të përfituara prej korrupsionit?

Lu: Faleminderit për sugjerimin tuaj. Është normale në shumë demokraci, përfshirë edhe Shtetet e Bashkuara, që pasuritë e ministrave dhe parlamentarëve të bëhen publike çdo vit. Ne e kemi sugjeruar këtë si një nga mënyrat më të rëndësishme me anë të së cilës partitë politike dhe politikanët mund të përmirësojnë transparencën në Shqipëri. /Dita/