Donatorët e huaj do të vazhdojnë mbështetjen e tyre për Shqipërinë, në sektorët e energjisë dhe industrisë. Zëvendësministri i Energjisë dhe Industrisë, Dorian Duçka zhvilloi një takim me përfaqësuesit e UNOPS, njëra prej agjencive kryesore të zbatimit të projekteve të Kombeve të Bashkuara në vende të ndryshme.
Zëvendësministri Duçka u shpreh se Shqipëria duhet të mësojë nga eksperienca e kësaj agjencie për të përfituar sa më shumë fonde nga donatorët për projekte të ndryshme në fushën e energjisë dhe të industrisë. Në vlerësimin e tij, çdo vend i Ballkanit mund të luajë një rol të caktuar sa i takon çështjes së energjisë. Duçka shprehu gatishmërinë për të ndërtuar një bashkëpunim sa më afatgjatë e të qëndrueshëm. “Shqipëria duhet të përfitojë nga momenti për të përthithur fondet duke mos humbur asnjë mundësi”, nënvizoi zëvendësministri Duçka.
Ndërkaq, përfaqësuesit e UNOPS deklaruan se Shqipëria po shkon në rrugën e duhur drejt përmirësimit të standardeve. Sipas tyre ekziston vullneti për të ndërtuar një bashkëpunim në kuadër të rritjes së kapaciteteve dhe investimeve në fusha të ndryshme përfshirë energjetikën dhe industrinë. Një temë e diskutimit ishte edhe mundësia për të tërhequr fondet e donatorëve me fokus rritjen e transparencës së funksionimit të institucioneve.