Dr. Kujtim Izet Memaj, mjek misionar, mësues i apasionuar

In memoriam

Dr. Llukë Gjidede

Kujtimi u lind në qytetin Vlorë në vitin 1939 nga prindër  biologjikë Izet e Anife Memaj. U rrit e edukua nga nёna e tij, pasi kur ende ishte 4 vjeç  mbeti jetim, pa baba. Pushtuesit e huaj nazistët gjermanë dhe kolaboracionistët tradhëtarë shqipëtar në tetorin e vitin 1943 rrёmbyen qindra vlonjatё, mes te cilёve të jatin, Izet Memaj, i internuan e i dogjën në kampin më famëkeq të historisё njerëzore,  Mathauzen. Izeti ishte patriot, u lidh me Luftën Nacional Çlirimtare, endëronte për një Shqipëri të lirë, të pavarur, të begatë e përparimtare. Kur e nxirrnin dhunshëm nga shtëpia e tij, Izeti me shikim të përqëndruar nga e shoqja, Anifeja, i tha:

• Amanet djalin, Kujtimin!

Ishte besëdhënie që  kurrë nuk u tradhëtua!

E ndër vite Kujtimi u rrit, eci nëpër rrugët e jetës me plot optimizëm  rrënjëzuar në ADN e karakterit të tij. Dritë me diell pati shkollimin e pandërprerë dhe idealet e të jatit. Në vitin 1959 mbaroi Gjimnazin në Vlorë me rezultate të larta, dhe shteti arsimkërkues i kohës e dërgoi në Çekosllovaki për studime të larta nё  Inxhinjeri Metalurgjike. Aty studjoi dy vjet dhe kthehet mbas prishjes sё  marrëdhënieve diplomatike mes shteteve. Nuk u ligështua, me plot pasion e dinjitet vazhdoi studimet në Universitetin e Mjekësisë, Tiranë për stomatologji, të cilat i përfundoi me sukses në vitin 1966.

Fatmirësisht, prej këtu nis edhe miqësia jonë vllazërore, e sinqertë, e pandërprerë që vazhdoi në dekada dhe do ngelet në histori.

Studimi  i  vazhdueshëm, kryesisht në shkencën e jetës, mjekësinë dhe psikologjinë njerëzore kanë qënë armët e progresit në jetë e në veçanti në profesion. Ishte i gatshëm për gjithshka në shёrbim tё shëndetit tё  njerëzve në nevojë.

Emërohet stomatolog në qytetin e Vlorës, simbol i përkushtimit dhe përgjegjësisë, me etikë bashkëpunuese me të sëmurin me kolegun. E ndër vite mjeku mëson më shumë e gjykon më mirë.

Dr. Kujtimi në vijimësi ka investuar dije shkencore, etikë mjekësore dhe edukatë qytetare. Diturinë e kërkonte nëpër libra, konsultat me kolegët e aktivitete shkencore. Pёr vite me radhё punonte mbi temë doktorature “Artritet e artikulacionit temporo-mandibular”.

Dr. Kujtimi i përket brezit të stomatologëve vlonjatë, që bënë ndryshimin e madh në këtë shërbim shëndetësor. E reformuan duke vendosur në themel  profilaksinë, mjekimi nga empirik u ngrit  në shkencë e art, kirurgjia plastike e fytyrës nga inekzistente gradualisht arriti nivele bashkëkohore.

Për këto është punuar me vullnet e pasion, janë realizuar studime shkencore në nivel Kandidat i Shkencave  e Doktor i Shkencave, e, kur është  dashur janë bërë edhe sakrifica ekstreme. Midis shumë rasteve të vështira të operacioneve në spitalin e Vlorës, sjellim në vëmendje:

Në sallën operatore zhvillohej “betejë” pёr jetёn!

Me urgjencë njoftohemi se në Ishullin e Sazanit, një ngjarje e rëndë kishte vënë në alarm strukturat ushtarake. Ushtari në detyrë kishte tentuar të vetëvritej me armë zjarri. Brigada kirurgjikale maxillo-faciale vihet në gadishmëri të lartë. Dr. Kujtimi është i pari që mbwrrin në spital. I vetëplagosuri sillet me urgjencë drejt e në sallën operatore, në gjendje shoku, më shumë i vdekur nga sa i gjallë.

Dr. Kujtimi me gjakftohtësinë që e karakterizonte, tepër i përqëndruar, intervenon me saktësi  për të ndaluar  hemoragji vdekjeprurëse. Bisturia e tij shpëtimtare vepronte me saktësi anatomike, ndërsa unë për disa minuta realizoj traheostominë për të shmangur asfiksinë.

Me shumë vështirësi e përgjegjësi të lartë profesionale u bë e mundur ligaturë e arterie karotide externe. Është kjo një nga ndërhyrjet më të vështira në kirurgjinë faciale. Në sallë veprimet realizohen në bashkëveprim, secili në pozicionin e vet. Përvoja jonë argumenton se puna me sistem brigade, rrit cilësinë e mjekimit, shmang maksimalisht gabimet e mundëshme, shpëtohen më shumë  jetë njerëzish. ”Trimi i mirë me shokë shumë!” – thotё njё fjalё e urtё popullore shqiptare.

Kush mendon se gjithё manipulimet gjatё mjekimit mundet t’i bëj vetëm, asgjë të saktë nuk do të mund të  realizojё!!!

Fatmirësisht i sëmuri mbas disa seancave  operatore kaloi rrezikun e ju kthye jetës normale.

Në vitin 1972 Dr. Kujtimi ftohet si pedagog në Fakultetin e Stomatologjisë, Tiranë.

• Do pyes nënën – tha ai.

Zv.Rektori ra në mendime, – Po kjo ?!

Dhe pëgjigja ishte “jo”. Kujtimi vendosi Vlorën përpara Tiranёs!

Për disa vite 1972 – 1979 Dr. Kujtimi punon mësues në Shkollën e Mesme Mjekësore në Vlorë, si dhe drejtues i Poliklinikës pranë kësaj shkolle. Vështirësitë organizative ishin të shumta. Falë përgjegjësisë  edhe përvojës së fituar nga funksionimi i Poliklinikës Qëndrore të Qytetit, gradualisht ato u kapërcyen. Shumica e nd/dentistёve, që përfunduan këtë shkollë, vazhduan studimet e larta në stomatologji. Ata e vlerësonin mësuesin e tyre, i cili u ndriçoi rrugën.

Mbas viteve 90 Dr. Kujtimi ushtroi profesionin në kabinetin privat, të cilin ia besoi të birit, Izetit, Stomatolog. Nga Shoqata e Stomatologëve ka marë titull Mirënjohje.

Gjatё jetës së tij, Dr. Kujtimi ka përjetuar me dhembje mungesën e tё atit, fjalën e tij bindëse, kaq të domosdoshme në vendimmarjet rinore. Në të njëjtën kohë ka qënë po aq krenar për aktin e tij në emër të Atdheut. Brengë kanë qenë edhe hamendësitë për vendndodhjen e eshtrave të babait. Kujtimi ishte i bindur se varri i tё atit në panteonin e dëshmorëve të kombit fizikisht ishte bosh, por shpirtërisht plot. Mes rrëfenjave jo bindëse ai kёrkoi të vërteten e faktuar! Në vitin 2014  bashkë me të shoqen, Shqiponjën dhe djalin e tij, Izetin, që mban emrin e gjyshit,  bёjnё udhëtimin për në kampin Mathauzen, Austri. Në librin e Muzeut gjeti emrin e tё jatit: “Memaj Izet 1944”. Aty  në një kodër me hirin  e  mijëra njerëzve ishte dhe hiri i babait të tij!

Ra në gjunjë, i shprehu mirënjohjen e pakufishme si prind e Atdhetar!

Pa këtë veprim, ne sot do ta kishim paksa të vështirë të pohojmё:

“Dr. Kujtimi, prehu i qetë, detyrat e jetës i kreve denjësisht!”

Koha rrjedh, shembulli i Dr. Kujtim Memaj do tё mbetet i ndritur!

Këto pak fjalë të shkruara  me shumë dashuri, respekt e mirënjohje  për jetën e veprën e Dr. Kujtim Memës i mbyll me predikimin e Biblës:

“Të mos trishtohemi që na iku, të gëzohemi që e patëm!”

***

Mё 12 shkurt 2022 vlonjatёt pёrcollёn me dhembje e hidhёrim Dr. Kujtim Izet Memaj! Prej vitesh vuante nga një sëmundje e  rëndë, u ndesh me të për dy dekada!

Frikë nuk pati, është kjo një dhunti e optimizmit të mjekëve në përgjithësi ndaj sëmundjeve kërcënuese, që janë mijëra. Kur fitojnë janë heronj, kur dështojnë janë mëkatarë!