Ish-drejtori i “Shtëpisë së të Moshuarve” në Tiranë, Resul Domi, akuzohet për përvetësim të pensionit të një të moshuari shurdhmemec.
Domi, i cili ka drejtuar shtëpinë e të moshuarve në lagjen “Ali Demi”, akuzohet për përvetësimin e rreth 4.1 milionë lekëve të vjetra, pensioni i H.Z., 70 vjeç. Gazeta “Shekulli” ka botuar sot pjesë të dosjes së tij në prokurori.
“Sipas hetimit dhe kallëzimit të kryer, ka rezultuar se 7 vite më parë, kallëzuesja e ka lënë vëllanë në kushtet e azilit dhe është larguar në Greqi. Dy vite më pas ajo është kthyer pasi kishte mësuar se i vëllai nuk qëndronte në azil.
E kishin larguar pasi nuk merrte pensionin e pleqërisë, me pretendimin se kishte humbur librezën. Gjatë kësaj kohe ai përfitonte vetëm 4 mijë lekë të reja si ndihmë sociale”- shkruan sot “Shekulli”. Ndërsa Domi e ka mohuar akuzën.