Drejtori i Metës, i dyshuar për gjobëvënie dhe afera miliona euro

Ekskluzive – Skandali ‘Pesha’: Arsyet e zhdukjes në heshtje nga posti të drejtorit të AKBN, Besjan Pesha.

Përplasja me Metën, për ‘gjoba’ ndaj biznesit të kromit në veri të vendit dhe një aferë milionëshe me puset problematike të naftës në jug. I përfshirë, edhe një kryebashkiak

Disa ditë më parë një nga të përditshmet e Tiranës raportoi këtë lajm të shkurtër:

“Jep dorëheqjen në mënyrë të papritur kreu i AKBN-së, Besjan Pesha, funksionar i lartë i LSI-së. Lajmi konfirmohet nga vetë Pesha, por nuk jep sqarimet e largimit… Tashmë, prej dy ditësh, Ministria e Ekonomisë ka emëruar drejtorin e ri ekzekutiv të Agjencisë Kombëtare të Burimeve Natyrore, Petrit Gjoni, i cili vjen në këtë detyrë nga pozicioni i zv.drejtorit ekzekutiv i po kësaj Agjencie si dhe ka qenë deputet i Parlamentit në periudhën 2005-2009. Pesha ishte emëruar në këtë pozicion më 27 Qershor 2011”.

Vetë Pesha i pyetur nga gazetarët ato ditë për këtë largim të papritur nga posti, tha se kishte probleme familjare dhe do ikte për ca kohë jashtë vendit.

Por si qëndron e vërteta? Drejtuesi i një prej agjensive shtetërore më të rëndësishme, ka dhënë dorëheqjen, është detyruar të japë dorëheqjen, apo e kanë shkarkuar? Dhe ç’është më e rëndëishmja: Cilat janë arsyet? 

DITA ka kryer një investigim gjatë këtyre ditëve mbi arsyet e largimit të Peshës nga detyra dhe informacionet e mbledhura flasin për afera të rënda, dosja e të cilave ndodhet prej disa ditësh pa reagim edhe në tryezën e kreut të qeverisë.

Largimi i Besjan Peshës ka ardhur pas përplasjeve të forta me kreun e LSI-së Ilir Meta për çështje që kanë të bëjnë me dy nga “zonat” më të nxehta të korrupsionit dhe krimit ekonomik dhe jo vetëm: minierat e kromit në veri dhe nafta në jug të vendit. E para është një fushë që ka prodhuar edhe viktima të herëpashershme, po është gjithashtu një vatër aferash milionëshe. Burimet e DITA-s bëjnë me dije që drejtori Pesha është akuzuar me prova nga Meta se ka hyrë në raporte aferash korruptive me disa përfaqësues të rëndësishëm të biznesit të galerive të kromit në veri duke kërkuar prej tyre shuma parash kundrejt mosveprimeve, shuma të cilat janë paguar në forma gjobash përgjatë muajve të Peshës në këtë post. Përplasja mes Metës dhe drejtorit të emëruar prej tij në agjensinë nën varësi të Ministrisë së Ekonomisë ka nisur pas një denoncimi privat që ka bërë një prej biznesmenëve të galerive të kromit në veri. Shifra të sakta të akuzës për gjobëvënie nuk ka por mendohet se janë shifra që variojnë nga 50 deri në 70 mijë euro e më shumë dhe numri i personave që janë shtrënguar të paguajnë është mbi dhjetë – i tha DITA-s një burim në dijeni të veprimtarisë së AKBN.

I njëjti burim shton se punët mes Metës dhe drejtorit Pesha janë acaruar më tej kur është raportuar se personi në fjalë dhe një kryetar bashkie në jug të vendit janë përfshirë në një biznes të përbashkët për çimentimin e disa puseve të naftës, në kontrata që kapin shuma deri në 5 milionë euro.

Mbetet për t’u hetuar arsyet dhe niveli i dijenisë së vetë kreut të LSI-së në veprimet e Peshës, por është fakt që Pesha tashmë është hequr me sherre nga ai post që nën zë në administratë konsiderohet si “karrige e artë” për shkak të aksesit në vatra ku luajnë miliona euro investime dhe interesa të forta.

Pesha nuk ka humbur vetëm postin por edhe një premtim të Metës që do ishte i pari në listën e deputetëve të LSI-së në Fier, madje disa raportime elektorale të kohëve të fundit në media bënin të ditur se ish-drejtori i AKBN e kishte filluar “mirë” fushatën.